Райондин уьмуьр: мярекатар, гуьруьшар | Министр мугьман хьана

Гуьруьшмиш хьунилай гуьгъуьниз министерстводин работникарни галаз ам ва чи муниципальный райондин Кьил Нариман Абдулмуталибов Агъа-СтIалрин Къазмайрал ва Алкьвадрал цIийи школайрин дараматрал эцигунрин кIвалахар кьиле физвай гьалдихъ галаз таниш хьана.

А карни рикIел хкиз кIанзава хьи, алай вахтунда чи районда «Комплексное развитие сельских территорий» госпрограммадай Агъа-СтIал Къазмайрал ва Алкьвадрал юкьван школайрин цIийи дараматар эцигунин кIвалахар кьиле физва. И мумкинвални чаз ана иштиракдай шартIар яратмишуни, яни «Полоса» ООО, «Стальские сады» проект-миллиардник уьмуьрдиз кечирмишуни, агропромышленный комплексдиз 500 млн. манатдин кьадар кьилдин ксарин инвестицияр желб авуни, госэкспертизадин рази жедай заключение галаз объектар эцигун патал проектдинни сметадин документация хьуни гана.

Агъа-СтIал Къазмайрал школадин цIийи дарамат эцигун патал адан проектдинни сметадин документар гьазурунин гьакъи и хуьруьнви Салман Бабаева гана. Дарамат эцигунин икьрарнамадин къиметди 310 708 874, 60 манат тешкилзава. Эцигунрин кIвалахрин заказчик ДР-дин «Дагсельхозстрой» ГКУ, эцигунар кьиле тухузвайдини «Дагсвязьинвест-1» подряддин организация я. Алай вахтунда и дараматдин 1-мертеба хкажунин эцигунрин кIвалахар кьиле физва. Алай йисан эхирдалди 150 млн. манатдин эцигунрин кIвалахар кьиле тухун фикирдиз къачунва. Дарамат 2021-йисуз ишлемишиз вахкуда.

Алкьвадрин юкьван школадин дараматдин эцигунрин кIвалахрин умуми кьадарди 122,482 млн. манат пул тешкилзава. Алай вахтунда и объектдал кьве мертебадин ва спортшколадин эцигунрин кIвалахар акьалтIарнава.

Школадин эцигунрин кIвалахар алай йисан эхирдалди куьтягьдайвал я.

Эцигунрин кIвалахрихъ галаз таниш хьайидалай гуьгъуьниз министр абурун еришрилай ва еридилай рази яз амукьна.

Гуьгъуьнлай министерстводин делегация райондин руководствони галаз «Полоса» ООО-дин территорияда хьана, «Стальские сады» проект-миллиардер уьмуьрдиз кечирмишзавай гьалдихъ галаз таниш хьана.

Райондин Кьили къейд авурвал, инвестиционный проектдихъ неинки са СтIал Сулейманан район, гьакIни вири республика яшайишдинни экономикадин жигьетдай вилик тухунин жигьетдай еке метлеб ава. Ада 1000-далай виниз цIийи виниз тир технологиядин кIвалахдай чкаяр арадал гъидай, гадарнавай цик квачир чилерал чан хкидай, гьакI еке хийирар къачудай, райондин бюджетни артухардай мумкинвал гуда.

Алай вахтунда зулухъай цIийи багълар кутадай майданарни гьазурнава, анра герек рекьер туькIуьрзава..

Производстводихъ галаз таниш хьайи вахтунда са жерге татугайвилер, гьялиз тахьанвай месэлаярни амайди малум хьана.

ИкI, емишар хуьдай гьамбархана патал 10000 киловатдин гужлувал авай алай аямдин трансформатордин станция герек я. И кар себеб яз емишар хуьдай гьамбарханадин эцигунрин кIвалахарни энгел жезва. Майишатрин уртах дигидай яд гудай къаналарни капитальный ремонт авуна кIанзава. Кирован дигидай церин къаналдин 2-нубатдин къурулушдин технический гьални хъсан туш ва икI мад.

Министр Абзагир Гьуьсейнова ихьтин чIехи проектар кьилиз акъуддайла четинвилерни гьалтдайди ва винидихъ къейд авур четинвилер, татугай гьалар арадай акъудун, кIвалах къайдадик кутун патал и профилдин маса ведомствойрин иштираквал аваз хуьруьн майишатдин ва суьрсетдин министерство вири жуьредин куьмекар гуз гьазур тирди лагьана, санлай кьурла и жигьетдай тухузвай кIвалахрилай вичин разивал къалурна.

Эхирдай райондин Кьил Нариман Абдулмуталибова мугьман хьунай, район яшайишдинни экономикадин жигьетдай вилик тухунин месэлайриз фикир гунай ва жедай куьмекар гуз гьазур тирди къейд авунай чухсагъул лагьана.

Гьазурайди – Абидин Камилов