Меню
6+

Сетевое издание «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Тешкиллувилин заседанидал

9-октябрдиз 7-сеферда эвер ганвай депутатрин райондин Собранидин сад лагьай тешкиллувилин заседание кьиле фена.

Ана райондин Кьил Нариман Абдулмуталибова, райадминистрациядин Кьилин заместителри, администрациядин къурулушдин подразделенийрин руководителри, хуьрерин поселенийрин кьилери, общественный тешкилатрин ва СМИ-дин векилри иштиракна.

Заседанидин иштиракчияр тебрик авуналди, Нариман Абдулмуталибова райондин Собранидин депутатриз абур хкягъун мубаракна ва мукьвал тир 5 йисуз абурухъ кIвалахда агалкьунар хьана кIанзавайди лагьана.

«Гьуьрметлу депутатар, квез куьн хкягъун мубаракрай. Райондин кьисмет патал куь хиве жавабдар везифаяр акъвазнава. Депутатрин кIвалахди агьалийриз хийир гун, район яшайишдинни экономикадин жигьетдай гележегда вилик тухуниз куьмек гун герек я. Халкьдин ихтибарвал къазанмишун кьилин шартI я, куьне ам гьисс авун лазим я», — къейдна ада.

Сергьятдин сечкидин комиссиядин председатель Нариман Мейланова депутатар 7-сеферда эвер ганвай депутатрин райондин Собранидин депутатарвиле хкянавайдан гьакъиндай комиссиядин къарардихъ галаз танишарна ва абурун векилвилер гьакъикъибур тирди лагьана.

Къейд ийиз кIанзава хьи, чкадин чпи-чеб идара ийидай векилвилер гвай органриз депутатар хкягъун патал сесер гун алай йисан 11-13-сентябрдин йикъара кьиле фена: 221 кандидат «Сад тир Россия» политический партиядин патай, «Справедливая Россия», «Яблоко» ва КПРФ партийри райондин хуьрерин 16 поселенийрин патайни 162 мандат къачун патал женг кьиле фена. Сечкияр къайдаяр чIурунар авачиз кьиле фена.

Икьван чIавалди вири 16 хуьрерин поселенийра сифтегьан тешкиллувилин заседанияр кьиле фенва, анрал кандидатураяр къалуруналди, депутатрин райондин Собранидин къурулуш хкянава.

Ирид лагьай сеферда эвер ганвай депутатрин райондин Собранидин сад лагьай заседание цIийиз хкянавай депутатрикай яшлуди тир Штибег Мегьамедханова ачухна. Ада заседанидин иштиракчияр адан йикъан повесткадик кутунвай месэлайрихъ галаз танишарна.

Гуьгъуьнлай райондин депутатрин Собранидин аппаратдин руководитель Мейлан Тарланова заседанидин иштиракчияр арадал атанвай депутатрин составдихъ галаз танишарна. Ада къейд авурвал, райондин Собранидиз 35 депутат хкянава, абурукай 25-дахъ кьилин, пуд касдихъни юкьван, 7-дахъни умуми образование ава.

Заседанидал алай кьилин месэла муниципальный райондин депутатрин Собранидин Председатель хкягъун тир.

Цмуррин хуьруьн поселенидин патай депутат Нариман Агъабекова Алкьвадрин хуьруьн поселенидин патай Мегьамедханов Штибег Гьажимегьамедовичан кандидатура теклифна. Адан тереф ачух сесер гуналди вирида сад хьиз хвена. Ада мукьвал тир 5 йисуз райондин депутатрин корпусдиз регьбервал гуда.

Штибег Мегьамедханова вичел и еке ихтибарвал авунай вири депутатриз чухсагъул лагьана, вичин тежриба ва чирвилер район яшайишдинни экономикадин жигьетдай вилик тухунин, агьалийрин агьваллувал хкажунин кардиз бахш ийидайди къейдна.

Гуьгъуьнлай анал депутатри, сад хьиз сесер гуналди, депутатрин райондин Собранидин председателдин заместителвиле депутат Аскеров Максим Маюдинович хкяна.

Заседание акьалтIаруналди, райондин Кьил Нариман Абдулмуталибова депутатриз ва цIийиз хкянавай райондин депутатрин Собранидин председателдихъ чпин хивевай жавабдар кIвалахда агалкьунар хьана кIанзавайди лагьана. Ада гьакI депутатрин корпусдиз хуьруьн поселенийрин администрацийрихъ галаз санал коронавирусдин инфекциядикай хуьнин, субботникар тухунин ва маса мярекатра активвилелди иштирак авуниз эвер гана.

Гьазурайди – Абидин Камилов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2