Абдулбари Магьмудован 90 йис РикIел хкана
И йикъара чи машгьур писатель ва драматург Абдулбари Магьмудов дидеди хайидалай инихъ 90 йис тамам хьунихъ галаз алакъалу яз адан хайи ватан тир ЦIийи Макьарал анин юкьван школадин лезги чIаланни литературадин кабинетда юбилярдин уьмуьрдиз ва яратмишунриз бахшнавай чIехи мярекат кьиле фена.
Ана иштирак авун патал райцентрадайни чи машгьур шаирар – адан са къелемдин дустар – Сажидин Саидгьасанов, Абидин Камилов, писатель Нажмудин Шихнабиев, райондин РУО-дин «ИМЦ»-дин методист Назират Азимова, лезги чIалан муаллимрин райондин ассоциациядин председатель Гуьзел Межидова, ЦIийи поселокдин СОШ-дин лезги чIаланни литературадин тарсар гузвай муаллим Заира Селягьова атанвай.
Адан уьмуьрдикай ва яратмишунрикай анал куьруь суьгьбетар гваз 7-классдин аялар рахана. Абуру писателдин яратмишунрикай юмордин куьруь эсерар кIелна, гъвечIи сегьнеяр (сценкаяр) къалурна. 10-классдин ученица Абдурагьмановади къалурай «Туьтуькъуш» сценка и межлисдин иштиракчийри иллаки еке хушвилелди кьабулна, гьакIни «Акьалай гъил» ва маса сценкайрини инсанрин гуьгьуьлар ачухарна.
Анал аялри и хуьруьнвияр – шаирар тир Шагьабудин Шабатова ва Мирземет Салманова Абдулбари Магьмудоваз бахшна кхьенвай чIалар хуралай кIелна.
Анал рахай и хуьруьнвийри – писателдин багърийри рикIел хкайвал и хуьре са цIийи куьчедиз Абдулбари Магьмудован тIвар ганва, адан гьуьрмет хуьзва.
Гуьгъуьнлай анал гаф гана рахай шаирар ва писателар тир Сажидин Саидгьасанова, Наж мудин Шихнабиева ва Абидин Камилова чIехи бажарагъдин сагьиб писатель ва драматург Абдулбари Магьмудован яратмишунрин кьетIенвилерикай, адан чIалан девлетлувиликай, ам чи жегьилриз вири вахтара еке чешне тирдакай лагьана. Эхиримжида анал писателдин 70 йисан юбилейдиз бахшна кхьей вичин са шиирни кIелна.
Эхирдай анал юбилярдин ва и мярекатдин гьакъиндай хуш келимаяр гваз писателдин хтул, и школадин муаллим – социолог, художник Айвар Магьмудов рахана. Ада и мярекатда иштирак авур аялриз, писателдин хва «Мавел» типографиядин регьбер Мегьамед Магьмудован патай цIийиз акъуднавай чи шаиррин ва писателрин ктабар пишкеш яз багъишна.
Эхирдай чи райондин КТВ-дин журналист Мизамудин Магьмудова вичин регьметлу бубадин юбилейдин гьуьрметдай ихьтин маракьлу мярекат тешкилунай ва иштиракунай вири юлдашриз чухсагъул лагьана, и мярекат кьиле тухвайди тир Диана Пирвелиевадин алакьунрилай вичин разивал къалурна. Куьре Аби
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
