Зарлу т1варар | Гьахъ-адалат хуьнин рекьевайди

Инсанар жеда вири уьмуьрда девлетар к1ват1унин гелевайбур, инсанар жеда гьамишанда гьахъ- адалатдин рекьевайбур. Йикъара вичин 70 йисан юбилей шад гьалара къейднавай, абурукайни 30 йисахъ агакьна вичин уьмуьрдин гуьзел вахт низам-къайда хуьнин кардиз бахш авур къенепатан крарин органрин подполковник Куьребегов Эскендар Къаинбегович вирибуруз масадан дердидикай хабар кьадай, гьамиша куьмек гуз гьазур, гьахъ-адалат к1ани инсан яз чида. Адаз санал к1валах авур полициядин работникрин, гьак1ни райондин агьалийрин арада гилани еке гьуьрмет ва авторитет ава.

Вичин бине чи райондин Гуьне пата аваз хьайи виликан Чантархуьряй тир ам алай вахтунда вичин хизанни галаз Кьасумхуьрел яшамиш жезва. Вичин къенивилин ва инсанвилин ерийралди ада инани халкьдин арада вичиз еке гьуьрмет къазанмишнава.

Зегьметдин биография 1974-йисуз Махачкъала шегьердин Ленинский РОВД-дин участковый инспекторвилин къуллугъдилай башламишай ам юстициядин подполковниквилин чинда аваз 1999-йисуз Сулейман-Стальский РОВД-дин силисчидин к1валахдилай пенсиядиз экъеч1на. Эскендар Къаинбеговича вири санлай кьурла къенепатан крарин органра 29 йисалай виниз к1валахна.

Ада гьак1 сечкидин 2 муддатда и хилен райондин ветеранрин организациядин председателвилин къуллугъни намуслувилелди кьиле тухвана.

Мадни а кар еке разивиливди къейд ийиз к1анзава хьи, Э. Къ. Куьребегова инсанар райондин маса хуьрериз куьч хьана баябан яз амай вичин хайи хуьр тир Чантархуьре хсуси такьатрин гьисабдай, 100 агъзур манатдилай виниз пул харж авуна, дяведа телеф хьайи хуьруьнвияр эбеди яз рик1ел хуьнин мураддалди аквадай чкадал обелиск эцигна ва ам шад гьалара ачухна.

Идахъ галаз сад хьиз, хуьр гьак1 гадарнавайди хьиз акун тавунн патал, ада ана мал-къарани хуьзва, яни лежбервилинни фермервилин майишатни кардик кутунва.

Ихьтин баркаллувилин к1валахрин сагьиб руьгьламишун патал ветеранрин организацияди РОВД-дихъ галаз санал ОВД-дин ветеран Куьребегов Эскендар Къаинбеговичаз «Почетный член Совета региональной ветеранской организации ОВД и ВВ по РД» гьуьрметдин т1вар гунин патахъай герек тир органриз документар рекье туна.

Вич хайи югъ къейд авур и йикъара, полициядин работникрин пешекарвилин суварин вилик ам и гьуьрметлу т1варц1ин сагьибни хьана. Мубаракрай! Квехъ яргъал уьмуьр, руьгьдин к1убанвал хьурай, гьуьрметлу Эскендар Къаинбегович!

Райондин «Куьредин хабарар» газетдин мумкинвилерикай менфят къачуналди, за райондин къенепатан крарин отделдин вири работникриз ва ветеранриз чпин пешекарвилин сувар рик1ин сидкьидай мубаракзава.

Ф. Жамалдинов, Сулейман-Стальский районда авай Россиядин ОМВД-дин ветеранрин Советдин председатель

Шикилда: Э. Къ. Куьребегов