Меню
6+

Сетевое издание «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Саратовда сейли Шамиль духтур

Жуван лезги халкьдин векилри хайи ватандивай яргъа,маса миллетрин арада гьуьрмет къазанмишун – чун, ватанэгьлияр, патални шадвал кутадай кар я.

Жув яшамиш жезвай чкада, кIвалахзавай коллективда гьуьрмет къазанмишун гьар са кас патал еке бахт я. Жуван лезги халкьдин векилри хайи ватандивай яргъа, маса миллетрин арада гьуьрмет къазанмишун – чун, ватанэгьлияр, патални шадвал кутадай кар я. Гъурбатда авай кас, лезги вах ва я стха жуваз чидайди, акурди туштIани. Саратов шегьерда медицинадин хиле кIвалахзавай кьасумхуьруьнви Шамиль Мейланов хьиз. Ваъ, ам чаз патавай чидач, акур касни туш. ЯтIани ам чи рикIиз мукьва хьанва, чна адакай газетда макъалани кхьизва.

… И йикъара чна кIвалахзавай «Куьредин хабарар» газетдин редакциядиз «Шииратдин Меккедай» — Агъа-СтIалдилай 75 йис яш хьанвай мегьрибан дишегьли Рабият Абдурашидовна Гьуьсейнова атана. Ада чаз вичин «дерди» ахъайна. Малум хьайивал, алатай мукьвал вахтара ам Саратов шегьерда яшамиш жезвай вичин рушан патав мугьмандиз фенвай. Садлагьана адаз пис хьана. Руша вичин диде шегьердин уронефрологиядин клиникадиз тухвана. Рабият Абдурашидовна операция авуна, адан дуркIунрай къванер акъудна, са шумуд йикъан къене ам сагъар хъувуна.

- Жув-жувал хтайла заз чир хьана хьи, операция авурди, лугьудайвал, зун ажалдин къармахрай акъуд хъувурди лезги духтур, кьасумхуьруьнви Шамиль Низамиевич я. Палатадиз атайла ам захъ галаз «диде» лугьуз рахана, захъ вичин хайи дидедихъ хьиз гелкъвена.

Р. Гьуьсейновади гуьгъуьнлай чаз Шамиль духтурдикай, адан ширин мецикай, хуш рафтарвиликай ихтилатар авуна.

Рабият Абдурашидовнадив духтур Шамиль Низамиевичакай кхьенвай макъалаяр авай «Саратовдин хабарар» газетдин са шумуд нумрани гвай. Са макъалада 86 йис хьанвай Лидия Семеновади Шамиль вичин хва я лугьузва. Маса макъаладай малум жезвайвал, Ватандин ЧIехи дяведин ветеран, орденринни медалрин сагьиб Михаил Колесникова Саратов шегьердин администрациядиз чар кхьенва, Шамиль духтурдиз «Саратов шегьердин гьуьрметлу агьали» гьуьрметдин тIвар гунин патахъай…

Яргъал шегьерда лезги хциз урус миллетдин векилри, ада сагъар хъувур начагъбуру гьуьрмет-хатур ийизвайди чир хьайила, чазни кьадар авачир кьван шад хьана.

Журналистар я ман, шад хабар атайла лувар акатдай. Газет кIелзавайдан тIалабун кьилиз акъудун журналистриз къанун я. Пакадал вегьин тавуна, гьа юкъуз чун Шамиль духтурдин диде-буба вужар ятIа жагъурунин къайгъуйра гьатна. Духтурдин диде-буба чаз фадлай хъсандиз чизвайбур яз хьана: Пенсионный фондунин Сулейман-Стальский районда авай отделенидин кьилин пешекар Низами Мейланов ва райондин центральный больницадин духтур-эндокринолог Анжела Мейланова.

Дуьз лугьузва бубайрин мисалда: катран мукай кард къарагъда. Хуьре-кIвале, кIвалахзавай коллективра гьуьрмет-хатур авай Низами ва Анжела Мейлановрихъ низамлу кьве хва ава – Шамиль ва Муслим. Муслим гъвечIи гада я. Кьилин образование авай юрист тир ада вичин пешедай кIвалахзава.

Гила чун Шамиль Мейлановакай рахада.

Шамиль Кьасумхуьрел (ЦIийи хуьре) 1993-йисуз дидедиз хьана. Ада юкьван школа лап хъсан къиметар аваз акьалтIарна. Гьеле школада 8-классда кIелзавайвала, гьарда вичиз гележегда хкядай пешедикай сочинение кхьинин тапшуругъ гайила, Шамила сочиненидиз «Закай духтур жеда» лагьана кьил ганай. Жаван вахтарилай рикIе авай мурад кьилиз акъудун патал Ш. Мейланов 2010-йисуз В. И. Разумовскийдин тIварунихъ галай Саратовдин государственный медицинадин университетдик экечIна. Ана кIелдай йисара, сад лагьай курсунилай эгечIна, эхирдалди, Шамиль университетдин лап хъсан студентрин арада хьана.

2016-2018-йисара Ш. Мейланова Саратовда кардик квай С. М. Миротворцеван тIварунихъ галай клинический ординатурада кIелна, вичин чирвилерин дережа артухарна, пешедин рекьяй тежриба къачуна.

Хъсан чирвилер авай пешекардиз – кьегьал лезги хциз вичи акьалтIарай медицинадин университетда преподавателвилин кIвалахни теклифна. Амма Шамила вичин кIвалахдин чка больница, хиве авай везифани начагъбуруз куьмек гун яз гьисабна.

2018-йисалай инихъ Шамиль Низамиевич Мейланова Саратов шегьердин уронефрологиядин клиникада духтур-уролог яз кIвалахзава. Инал «кIвалахзава» гаф кхьейла, чи рикIел мад сеферда ада операция авур агъастIалви дишегьли Рабият Гьуьсейновади лагьай алхишдин келимаяр, газетрай чна кIелай макъалаяр

хуьквезва. Низ чида ихьтин алхишдин келимаяр Шамиль Низамиевичаз гьикьван инсанри лагьанватIа ва лугьун хъийидатIа?!

Коронавирусдин инфекциядин вахтундани Ш. Мейланова югъ-йиф талгьана кIвалахна, шумудни са кас ада кьиникьикай къутармишна, тIегъуьн чкIунин вилик пад кьун патал гьам клиникада, гьам шегьерда еке кIвалах тухвана. И бегьерлу кIвалахдай ам Саратов шегьердин администрациядин патай Чухсагъулдин чарчиз, Саратовский областдин здравоохраненидин министерстводин патай Гьуьрметдин грамотадиз лайихлу хьана.

Шамиль Низамиевича са шумудра шегьердин ва областдин урологрин арада тухвай пешекарвилин конкурсра иштиракна, анра кIвенкIвечи чкаяр кьуна. Чи фикирдалди, ина мягьтел жедай кар авач: Ш. Мейланов Саратовский областда лап хъсан духтуррикай-урологрикай сад я.

Вич хайи гъвечIи ватандивай – Лезгистандивай — яргъа яшамиш жезвай ва кIвалахзавай Шамиль Низамиевичакай макъала кхьидайла, чи рикIел Англиядин писатель ва тарихчи Томас Карлейлла кхьей гафар хтана: «Жуван пеше, кар жагъайди хушбахтлу кас я…» Чавай лугьуз жеда хьи, Ш. Мейланов вичин кар жагъанвай, датIана уьмуьрдин макьсад намуслувилелди тамамарунихъ ялзавай кас я.

Вахъ мягькем сагъламвал, гзаф четин, гьа са вахтунда герек ва гьуьрметлу кIвалахда мадни еке агалкьунар хьурай, Саратов шегьерда сейли Шамиль духтур!

Асият Мирзалиева,

Хазран Кьасумов

Шикилда: Ш. Мейланов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

29