Меню
6+

Сайт «Кюре»

25.11.2020 15:24 Среда
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Чи жегьилар| Бажарагъдин бегьер

Эхь, бажарагъ аламатдин затI я. Бажарагъ шукур хьайи Халикьди инсандиз гузвай пай я. Ам, лежберди никIе цанвай къуьлуьн твар хьиз, фараш жезва ва са кьадар вахт алатайла, ада бегьер гузва. 

Чна, журналистри, газетриз макъалаяр гьар жуьре инсанрикай, пешекаррикай кхьизва. Гьич фикирдикни квачир, мукьувай чин тийизвай касдикай кхьизвай вахтарни тIимил туш… И йикъара чна, и макъаладин авторри, 1997-йисуз акъатай Сулейман-Стальский райондин печатдин орган тир «Халкьдин гаф» газетдин ( гилан – «Куьредин хабарар») куьгьне подщивка гъилелай ийизвай. Газетдин 28-июндиз акъатай 49-нумрада 3-чина са гъвечIи рушан шикил ганвай. Адан кIанихъай ихьтин гафар кхьенвай: «И шикилда авай пIини хьтин руш Абдулмежидова Мадина я. Вичин яшар тIимил ятIани, ада манияр яда, кьуьлер ийида. Адаз буба Гьажимегьамеда къулгьу чирна. Гила Мадина дуьа хуралай чириз (кIелиз, кхьиз гьелелиг чидачтIани) алахънава. Вун бахтлу хьуй, бала!». Са артух фикирни тагудай гъвечIи макъала ва пуд йисни зур хьанвай гъвечIи рушан шикил…

Яраб и гъвечIи рушан кьисмет гьихьтинди хьанатIа лугьуз, чун «сельсовет Касумкентский» АСП-дин кьилин заместитель Ферида Гьажимегьамедовнадин патав фена.

- Гьа куь вилик квай газетда авай шикилдай аквазвай Мадинадикай къе чIехи руш, духтур хьанва, — лагьана, сивел хъвер алаз, Ферида Абдулмежидовади чав къейдер авунвай чар вугана.

Чаз малум хьайивал, Мадинадин бажарагъ аял чIаварилай башламиш хьана. КIелиз, кхьиз чир жедалди манияр лугьун, къулгьу, дуьа хуралай чирун – бес им бажарагъ тушни? Эхь, бажарагъ аламатдин затI я. Бажарагъ шукур хьайи Халикьди инсандиз гузвай пай я. Ам, лежберди никIе цанвай къуьлуьн твар хьиз, фараш жезва ва са кьадар вахт алатайла, ада бегьер гузва. И келимайрин гьахълувал Мадинади вичин чешнедалди тестикьар хъувуна.

Мадина 1993-йисан 3-августдиз Агъа СтIалрин хуьре Абдулмежид Абдуселимович ва Ферида Гьажимегьамедовна Абдулмежидоврин чIехи, гьуьрметлу ва чешнелу хизанда дидедиз хьана. Къейд авун лазим я хьи, и хизанда 4 велед хьана, кьилин образованияр къачуналди, абуру чпин пешейрай кIвалахзава, хизандин баркаллу крар давамзава.

Веледрикай виридалайни гъвечIиди тир Мадинади 2010-йисуз Агъа-СтIалрин юкьван школа вири предметрай «5» къиметар аваз акьалтIарна. И тухумда, маса пешейрин иесияр хьиз, са шумуд кас духтурарни авай. Гьавиляй Мадина, гъвечIи чIавалай рикIе авай мурад кьилиз акъудун патал, Дагъустандин государственный медицинадин академиядик экечIна, 20I6-йисуз академиядин лечебный факультет лап хъсан чирвилер къачуналди акьалтIарна. Вичи хкянавай пешедай чирвилерин дережа хкажунин мураддалди Мадина Абдулмежидовнади 2016-2018-йисара Н. И. Пирогован тIварунихъ галай Россиядин милли ахтармишунрин медицинадин университетда ординатурада, медицинадин илимрин доктор, профессор, Россиядин акушеррин-гинекологрин ассоциациядин вице-президент, медицинадин илимрин Академиядин академик Галина Михайловна Савельевадин хизан туькIуьрунин ва репродукциядин акушервилин ва гинекологиядин Центрада ва ультразвуковой диагностикадай А. И. Бурназанянан тIварунихъ галай Россиядин ФМБА-да, Москвадин акушервилинни-гинекологиядин школада (кIвалахдивай къерех тахьана) вичин чирвилерин дережа хкажна, пешедин рекьяй хъсан тежриба къачуна.

2018-йисалай инихъ Мадина Абдулмежидовнади ЦПСиР ДЗМ ОСП ГБУЗ-да акушер-гинеколог ва ультразвуковой диагностикадин духтур яз кIвалахзава. Гьа са вахтунда ада Москва шегьерда ИНвитро ООО частный клиникада агьалиярни кьабулзава.

Мадина Шагьпазовади 2020-йисуз сифте яз тухвай продокторрин Вирироссиядин премияда «Лучший врач в своей специальности» номинациядай 1-чка кьуна, Москвадин акушеррин рейтингда (пациентрин фикирдалди) 3-чка кьуна.

Мадина Абдулмежидовна Вирироссиядин медработникрин форумрин, съездрин активный иштиракчи я.

КьетIен бажарагъдин сагьиб тир Мадинадин уьмуьрдин юлдаш Заур Шагьпазова Москвада са фирмада кIвалахзава, абурун жегьил хизанда са велед – Саид чIехи жезва.

Жаван йисара башламиш хьайи Мадинадин бажарагъди, са кьадар вахт алатайлани, бегьер гузва. Ида чак шадвални кутазва.

Асият Мирзалиева,

Хазран Кьасумов

Шикилда: М. Шагьпазова

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

87