Чун террордиз акси я!

Чун террордиз акси я!

Эхиримжи вахтара дуьньядин винел алай гзаф гьукуматрик терроризмди еке къалабулух кутазва. Кьилди къачуртIа, Ирак, Сирия, Афгъанистан ва са жерге маса гьукуматарни террористрин организацийри михьиз чпин пацук кутаз алахънава.

Са шумуд йис идалай вилик террористри чи гьукуматдани чпин кьацIай къайдаяр тваз алахънай. Алатай вахтар рикIик къалабулух квачиз рикIел хкиз жезвач. Бесландин школа, Москвадин метро, Каспийскдин парад, Волгограддин вокзал ва са кьадар маса террористрин хаинвилер чи халкьдин тарихда чIулав леке яз амукьда.

Гьайиф хьи, и йисара душманрин эмиссари вишералди чи республикадин жегьиларни чпин жергейриз желбнай. И кар дериндай веревирд авуна, Россиядин гьукуматди къенепатан ва къцепатан вири террориствилин организацияр законсузбур тирди ва абурухъ галаз женг чIугунин гьакъиндай къарар кьабулнай.

Терроризмдихъ ва адан идеологиядихъ галаз женг чIугуниз чи райондин руководстводини акьалтIай еке фикир гузва: жегьилар кIватI жезвай чкайра, иллаки школайра, планрин бинедаллаз террордиз акси жуьреба-жуьре мярекатар мукьвал-мукьвал кьиле тухузва. И жигьетдай вилик йисарани къанун-къайдаяр хуьдай органра кIвалахай, терроризмдихъ галаз женг чIугур, вичихъ а рекьяй чIехи тежриба авай, жегьилрихъ галаз кIвалахиз чидай общественный хатасузвилин рекьяй райадминистрациядин Кьилин заместитель Фатулаев АбутIалиб Бабаевича агалкьунривди кIвалахзава.

Гьелбетда, райондин хатасузвал хуьнин рекьяй чIугвазвай зегьметдин патахъай ийидай ихтилатар яргъалди жеда, амма заз куьрелди Фатулаев АбутIалиб Бабаевича чи райондин школайра кьиле тухузвай кIвалахдал куьрелди акъвазиз кIанзава.

Фатулаев АбутIалиб Бабаевич чи, Кьасумхуьруьн 1-нумрадин юкьван школадихъ галаз фадлай алакъаяр хуьзвай кас я. Ада школьникриз алай девирдин важиблу темайрай, иллаки международный терроризмдихъ галаз женг чIугунин рекьяй, жегьилрин руьгьдиз дериндай таъсир ийидай мисалар гъиз суьгьбетар кьиле тухузва.

Ихьтин мярекатри чи жегьилриз таъсир ийизвайдахъ, дугъриданни, зун инанмиш жезва. Заз рикIел хкиз кIанзава, чун 9-11-классра авай аялар галаз «Россиядин Игит» чIехи тIвар ганвай Зейнудин Батманован дидедин, хизандин патав КIиридиз фенай. Абурун хажалат екеди тир. Дидедин рикIелай вичин хва гьич са декьикьадани алатзавачир, адан дерт деринди тир. Игит яз кьейи Зейнудин Батмановаз школа-интернатда бахшнавай са пIипI авай. Анал чаз анин директор тир Надир Сабировича адакай гзаф суьгьбетар авунай. Хкведай рекье чи аялар-рушар шехьиз гатIунна. Абуруз хизан, диде лап язух атанвай. Са шакни алач, аялрин рикIелай и кIвалах алатдач. Гьи мярекат къачуртIани, ада гел тазва.

Еке шадвилелди кьиле тухвай чи райондин 90 йисан юбилейдин мярекатди вири халкьарик, иллаки аялрик, еке руьгь кутуна. Райондиз бахшнавай гьар жуьре конкурсра иштиракна. Исятда тухузвай «Зи Россия», «День единства народов Дагестана», «День народного единства» ва маса акцийри чи аялар террордиз акси ийизва. Абуруз жуван хайи чил, ватан генани кIан жезва.

Са бязи чи аялар чпи хкянавай диндал ала, амма абур чи гуьзчивиликай хкатзавач. Гьи халкьарин дин къачуртIани, ам террордин патал алач. Чаз чизвайвал, чIехи-гъвечIи чир хьун, диде-бубадиз гьуьрмет авун – ибур динда авай асул несигьатар я. Абур чир хьана кIанда чи аялриз.

Гьайиф хьи, са бязибуру шегьерриз фейила халкьарин арада тефир тваз алахънава. Гьина яшамиш жезватIани, чна чи, дагъустанвилин намус хвена кIанда, абурун адетриз гьуьрмет авуна кIанда. Гьар са касди вичиз гуьрмет хъсан кIвалахралди къазанмишда.

Са кIвалахди зак шадвилин лувар кутунай. И мукьвара зун Унцукульский райондиз акъатнай. Аниз Ивановский областдайни Хабаровский крайдай журналистар атанвай. Чи халкьарин мугьман кьабулун, жегьилри чпиз ийизвай гьуьрмет акурла, чаз, дишегьлийриз, хъсан тербия гунай икрамна, чIехи чухсагъул лагьанай. Бес им чи рикIерик шадвал акатдай кIвалах тушни!

Чаз кьегьал рухваяр хьунни авурди я, хъженни ийида. Амма кьисмет тахьуй чи аялриз Мегьамед Нурбагандованни Зейнудин Батманован хьтин куьруь уьмуьрар.

Гьайиф хьи, са бязибур Сириядиз, Игилдиз хизанарни галаз физва. Дяведа чеб пуч хьана, аялрин ийир-тийир хьана амукьзавай вахтарни ава. А аялрин къайгъу чи гьукуматди ийизва: абур чпин харжидалди хайи ватандиз хкизва, школайра, садикра твазва ва маса куьмекар гузва.

Урус мисалда лагьайвал, «Где родился, там и пригодился» («Гьина ханатIа, гьана герекни къведа») жув хайи чка гьахъ я, Ватанда цларини, къванерини куьмек гуда лугьудай мисал гьахълуди я. Чаз гзаф писателар, шаирар чида маса гьукуматриз фейи, амма абурун фикирар, шиирар хайи Ватандикай тир. Чпин пашманвал абуру шиирралди къалурнай. Жув хайи чка са девлетдихъни къведач. Жуван куьчеда авай къванни кваз чаз мукьва я. Хайи хуьре чIугвазвай нефесни кваз масад я!

Эхиримжи варцара инсаниятдал гьужум авунвай вирус-тIегъуьн бес тахьана, Азербайжандини Арменияди, кьве стха хьиз яшамиш жезвай халкьари чилин патахъай дяве къурмишна. Гзаф телефвилер хьана. Гена, Аллагьдиз шукур, Россияди ам вахтуналди хьайитIани акъвазарнава. Чи рикIелай къени Ватандин ЧIехи дяведа хьайи мусибатар алатзавач. Телеф хьайи гьар сад, дяведин иштиракчи рикIел хкунин акцияр кьиле тухузва. Хажалатар хьанвай дидейриз монументар эцигзава. Ша чна вири дуьньяда ислягьвал хуьн патал женг чIугван! Ша чун, вири сад хьана, террордиз акси экъечIин! Къуй чи аялрин кьилел михьи цав ва чими рагъ хьурай!

Кьасумова Айишат Къурбаналиевна, Кьасумхуьруьн 1-нумрадин юкьван школадин тешкилатчи, райондин дишегьлийрин Союздин председатель