Аскерди Ватандиз къуллугъзава Чухсагъул лугьузва
Чи жегьилар чпин хивевай ватанпересвилин буржи кьилиз акъудун патал Урусатдин Яракьлу Къуватриз рекье тунин зулун призыв кьиле тухузвай и йикъара чи районэгьлийри къуллугъзавай военный частарин командиррилай абурун диде-бубайрин тIварцIихъ, абуру кIелай школайриз, абур къуллугъиз рекье тур военный комиссариатдиз Чухсагъулдин чарар хквезва.
Ихьтин хуш келимайрив ацIанвай Чухсагъулдин чар и йикъара ЦIийи поселокдин юкьван школадизни хтанва.
Ана икI кхьизва:
«Гьуьрметлу «ЦIийи поселокдин СОШ» МКОУ-дин директор Ягъибеков Бег Абдулашимович!
35-армиядин машгьур, Ленинан 2 ордендин ва Яру пайдахдин, гвардиядин кьилдин мотострелковый бригададин командованиди Куь выпускник Къурдулов Джангир Багьаудинович виниз тир ватанпересвилин ва хайи Ватан кIан хьунин руьгьдаллаз тербияламишунай Квез еке чухсагъул. Джангира вичин военный пешекарвал лап хъсан чирнава, Россиядин Федерациядин битаввал хуьн таъминарунин жигьетдай Амурский областдин сергьятда вичин хивевай аскервилин буржи намуслувилелди кьилиз акъудзава. Куь выпускникдиз
санал къуллугъзавай аскеррин ва батальондин командованидин патай еке гьуьрмет ава. Квевай женгинин гьазурвилин рекьяй Куь ученикдин агалкьунрал дамах ийиз жеда.
Квехъ мягькем сагъламвал, Куь хивевай жавабдар кIвалахда мадни еке агалкьунар хьурай!
Гьуьрметдивди, батальондин командирдин заместитель, гвардиядин майор С. Антонов».
Гьелбетда, ихьтин хуш келимайрив ацIанвай Чухсагъулдин чарари неинки аскеррин диде-бубайрин, гьакI абуруз тарсар гайи муаллимрин гуьгьуьларни хкажзава, абурук еке дамах кутазва.
Куьре Абид
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
