Меню
6+

Сайт «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Игитрин юкъуз – Игитдин мярекат

9-декабрдиз Кьасумхуьруьн 1-нумрадин юкьван школада Россиядин Игит, капитан-пограничник Радим Халикьован 50 йис тамам хьуниз талукьарна «Ему исполнилось бы 50 лет» тIвар алаз чIехи мярекат кьиле фена.

Сергьят хуьдай чирагъ хьайи,

Куьруь уьмуьр экв-рагъ хьайи,

Дережадиз Шагь дагъ хьайи,

Гьа Игит хва Радим я чи!    Хазран Кьасумов

Коронавирусдин тIегъуьндихъ галаз алакъалу яз эцигнавай сергьятрал ва Роспотребнадзордин истемишунрал амал авуна тухвай мярекатда Россиядин Игит Радим Халикьован диде Ханпери Халикьовади, стха Алибалади, «Куьредин хабарар»» газетдин отделдин заведующий, РФ-дин журналистрин ва лезги писателрин Союзрин член Хазран Кьасумова, «ИМЦ» МКУ-дин директордин заместитель Венера Абдуселимовади, районда кардик квай терроризмдиз акси комиссиядин кьилин пешекар Юзбег Юзбегова, школадин директор Зубаил Устаева, теклифнавай жавабдар маса ксари, школадин муаллимри ва кIелзавайбуру иштиракна.

Игитдин йикъан сергьятра аваз тешкилай мярекат школадин муаллим Маина Османовади ва тербиядин рекьяй школадин директордин заместитель, райондин дишегьлийрин Советдин председатель Айишат Кьасумовади кьиле тухвана.

Сад-садан гуьгъуьналлаз рахай школьникри Россиядин Игит Радим Халикьован уьмуьрдин, ам аскервилелай пограничный «Мокок» заставадин начальниквилел кьван фейи къуллугъдин рекьерикай, 2003-йисан 15-декабрдиз ада къалурай игитвиликай гегьенш рахунар авуна.

Игит Радим Халикьован диде Ханпери Халикьовади, вилерал накъвар алаз, 33 йисан яшда аваз Ватан, халкь патал вичин чан къурбад авур хцин аял, жаван ва ада Ватандиз къуллугъ авур йисар рикIел хкана, Радиман тIвар эбеди авун патал тухузвай кIвалахдай райондин Кьил Нариман Абдулмуталибоваз, ихьтин мярекат тешкилунай школадин муаллимриз ва кIелзавайбуруз чухсагъул лагьана, кIелзавайбурун патай хьайи суалриз жавабар гана.

Школьникри Ханпери Халикьовадиз цуьквер ва рикIел аламукьдай пишкешар гана.

Журналист Хазран Кьасумов мярекатдиз вичи Радим Халикьовакай «Куьруь, амма баркаллу уьмуьрдин сагьиб» кьил алаз гегьенш макъала – очерк кхьенвай «Куьредин хабарар» газетдин нумрани гваз атанвай. Ада мярекатдал Игит хцикай, адан кьегьалвилерикай, ада тербия къачур Халикьоврин чIехи ва гьуьрметлу хизадикай итижлу ихтилатар авуна, кIелзавайбуруз Радим Халикьов хьтин кьегьал ксарин баркаллу крариз, игитвилиз вафалу хьуниз эвер гана.

Рахунрин эхирдай Х. Кьасумова вичи Игитдиз бахшна кхьенвай шиирни кIелна.

Игит хва Радим Халикьован экуь къамат, адан лайихлувилер мярекатдал рахай «ИМЦ» МКУ-дин директордин заместитель Венера Абдуселимовади, АТК-дин пешекар Юзбег Юзбеговани рикIел хкана.

Мярекатдин сергьятра аваз кIелзавайбуру Р. Халикьоваз бахшнавай шиирар кIелна, Игитдин дидедиз бахшна мани лагьана.

Лагьана кIанда, мярекат тухузвай актовый залда Радим Халикьоваз талукьарнавай чIехи стендни акъуднавай.

Мадни, анал школьникрин арада «Квез Игитар тир мад вужар чида?» викторинани кьиле тухвана.

Эхирдай мярекатдин иштиракчийри, кIвачел къарагъна са декьикьада кисна акъвазуналди, Радим Халикьован экуь къамат рикIел хкана.

Хазран Кьасумов

Гьа Игит хва Радим я чи

Кьулан СтIал вичин бине,

Шарвилидин хьанвай неве,

Чан къурбандай халкьдин рекье,

Гьа Игит хва Радим я чи!

Сергьят хуьдай чирагъ хьайи,

Куьруь уьмуьр экв-рагъ хьайи,

Дережадиз Шагь дагъ хьайи,

Гьа Игит хва Радим я чи!

Дамах тир гьар хуьруьн – кIвалин,

Хуьзвай элди пак тIвар вичин,

Пуд веледдиз – буба ширин,

Гьа Игит хва Радим я чи!

Пакдиз хвейи намус лезги,

Ви игитвал я чаз веси,

Къилих хьайи секин-къени,

Гьа Игит хва Радим я чи!

Къанлу душман хьана пайда,

Ягъун-кьиникь хьанвай къайда,

Ажугъ кткай уьтквем гада,

Гьа Игит хва Радим я чи!

Ватан хуьн яз къастни мурад,

Тавуна са акьван муддат,

Хаинариз кьурди инад,

Гьа Игит хва Радим я чи!

Йифен бере, мичIи тамуз,

Дустар галаз, тушиз ялгъуз,

Фейи кьегьал, душманд хуруз,

Гьа Игит хва Радим я чи!

Писни-хъсан фагьумайди,

Даим дуьзгуьн рекье хьайди.

Мидаим яз амукьдайди,

Гьа Игит хва Радим я чи!

РФ-дин Игит Радим Халикьован 50 йис

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

67