Куьруь, амма баркаллу уьмуьрдин сагьиб

Радим Халикьовакай, адан игитвиликай макъала кхьиз ацукьайла, зи рикIел са шумуд йисан вилик зун Кьулан СтIалдал Халикьоврин хизандиз мугьман хьайи, зун Игитдин дах Абдулхаликьовахъ, диде

Ханперидихъ, Радиман уьмуьрдин юлдаш Сечмегуьлахъ, абурун веледар тир Миланадихъ, Изминадихъ ва Рустамахъ галаз гуьруьшмиш хьайи вахт хуьквезва. За гьа чIавуз жуван блокнотда авур кхьинар, къейдер кIел хъийизва.

«- Гьиниз гуьлле гайитIани, ам дидедин рикIихъ галукьзава» — лагьанай Дагъустандин халкьдин шаир Фазу Алиевади.

Радимни Советский хуьряй тир мегьрибан дишегьли Сечмегуьл чпин рикIерни сирер ва муьгьуьббат сад авуна, гьуьрметлудаказ яшамиш жез 10 йис тир. Вичин итимди къуллугъзавай частара сифтедай медсестравиле, гуьгъуьнлай радиотелефонисткавиле кIвалах авур Сечмегуьл Буньямовнади вичин юлдашдиз цуьквер хьтин 3 велед багъишна. Вири хъсан тир. Амма къанчанах бандитри Радиманни Сечмегьулан михьи муьгьуьббат кьатIна. Чун гуьруьшмиш хьайила, Сечмегуьла лагьанай: «- За Радим зи уьмуьрдин юлдаш тир лагьана лугьузвач, ам ширин мез, ачух рикI авай, хъуьруьн-зарафатдал рикI алай, масабуруз хатур-гьуьрмет ийидай, гьахъвал кIандай инсан тир. Радимахъ дустар гзаф авай, пограничникриз ам гзаф кIандай. Радим хьтин кьегьал хцихъ галаз кьисмет сад авунал, тIимил йисара хьанатIани, адахъ галаз санал яшамиш хьунал за дамахзава. КIвале кьилел буба аламачиз амукьнавай пуд велелддиз вил ягъиз, за закди фикирзава: абур етимар туш, игит бубадин веледар я».

Хазран Кьасумов, РФ-дин журналистрин Союздин член