Меню
16+

Сетевое издание «Кюре»

13.03.2020 10:47 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Зегьметда бахт жагъайди

Алкьвадрин хуьруьн тIвар кьунмазди, чи фикирдиз сифте нубатда алимар тир Гьуьсейноврин тухумдин векилрин тIварар къведа.

Гьа са вахтунда, и хуьр намуслу зегьметчийрин, чешнелу хизанрин маканни я. Виридуьньядин дишегьлийрин йикъан вилик квай йикъара завай зегьметдин ветеран Мислимат Алияровадин тIвар еке гьуьрметдивди кьаз жеда.

Яшар 90 йисалай алатнавай М. Алияровадиз зегьметдин дад фад акуна. Гьеле 14 йисни тамам тахьанваз ада колхозда кIвалахиз башламишна. Санлай къачурла, мегьрибан и дишегьлиди саки 50 йисуз производствода зегьмет чIугуна. «Алкадарский» совхозда саки 300 гектарда багълар кутуник, анрай гьар йисуз емишрин бул бегьерар кIватI хъувуник М. Алияровади вичин лайихлу пай кутуна.

1990-йисара совхозда арендадин къайдада салан майваяр (помидорар) битмишариз башламишна. М. Алияровади 5 йисан муддатда 1 гектардин участок арендада къачуна, ана помидорар гьасилна. И участокдай чилин ва зегьметдин къадир авай дишегьлиди гьар йисуз 50-60 тонн помидорар кIватI хъийиз хьанай.

- Гьикьван лагьайтIани, абур инсанар кIвалахдик квай, чIугур зегьметди арадал гъайи бегьерди, нетижайри рикIерик шадвал кутадай йисар тир, — лугьузва М. Алияровади.

Яргъал йисарин намуслу зегьметдай Мислимат Алияровадиз Зегьметдин Баркалладин орден, «Намуслу зегьметдай», «Зегьметдин ветеран» медалар, пятилеткайрин зарбачивилин, соцсоревнованида гъалиб хьайивилин знакар, 20-далай виниз Гьуьрметдин грамотаяр ганва, адакай 15 йисуз хуьруьн Советдин депутат хьана.

Вири уьмуьрда зегьмет уьмуьрдин игьтияждай кьур, вичи лугьузвайвал, гьа зегьметда бахт жагъай Мислимат Алияровадиз хуьре-кIвале, жемятдин арада еке гьуьрмет ава. Ам хуьруьн агъсакъалрин Советдин член, жегьилрин несигьатчи ва меслятчини я.

Хазран Кьасумов

Шикилда: М. Алиярова

Шикил ягъайди – Р. Набиев

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

17