Чарарин обзор

ГьикI лагьайтIа, абуру гъиле авай йисан бегьердин бине кутун патал багъларани уьзуьмлухра, саларани производстводин маса хилера агротехникадин серенжемар кьиле тухузва. Идакай редакциядиз хуьрерин мухбиррилай къвезвай чарарай ашкара жезва.

- Эминхуьруьн поселенидин мулкунал хуьруьн майишатдин са шумуд КФХ кардик ква, — кхьизва хуьруьн мухбир Марсель Бабаева. – КIвалахда гьар йисуз тарифдин нетижаяр жезвай майишатрикай яз чавай Миламудин Мегьамедован КФХ-дин тIвар кьаз жеда. Адан кIвачихъ 8 гектар уьзуьмлухар гала. Анра хъуьтIуьн ятар гана, жергейрин араяр цана, тегьенгрин кьурай ва герек авачир хилер атIана акьалтIарнава. И йикъара уьзуьмлухра шпалера ремонтзава, тегьенгрин хилер симерал кутIунзава.

Алай йисуз М. Мегьамедовахъ уьзуьмлухрай 75 тонндилай тIимил тушиз ципицIар кIватI хъувунин фикир ава.

Хуьруьн мухбир Марсель Бабаева вичин кьвед лагьай чарче ЦIийи Макьарин хуьряй тир уьзуьмчи-арендатор Умрудин Агьмедован намуслу зегьметдикай тарифдин келимаяр кхьенва. Ана къейд ийизвайвал, арендатордин кIвачихъ галай 4 гектардин уьзуьмлухар чешнелу гьалда ава.

- ДаркIуш-Къазмайрин поселенидин мулкунал кардик квай «Гуьлгери–вацI» ООО районда уьзуьмчивилел машгъул тир кIвенкIвечи карханайрикай сад я, — кхьизва А. Селимова. – Ана зегьмет чIугунин кIвенкIвечи къайдаяр ишлемишзава. Агротехникадин гьар са серенжем чпин вахтара ва галай-галайвал кьиле тухузвай карханада гьар йисуз гектардай 90-110 центнер ципицIар кIватI хъийизва.