Меню
6+

Сетевое издание «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Обелискрал цуьквер эцигна

Алай йисан 9-майдиз, ЧIехи Гъалибвилин 75 йисан гьуьрметдай, районда кьилин мемориальный комплексдал ва хуьрера авай женгинин баркалладин памятникрал цуьквер эцигунин мярекатар кьиле фена.

Коронавирусдин инфекциядихъ галаз алакъалу яз мярекатар хатасузвал хуьнин къайдайрал амал авуналди кьиле фена, анра сергьятламишнавай кьадар инсанри иштиракна. Абурун арада муниципальный райондин Кьил Нариман Абдулмуталибов, Агъа-СтIалрин хуьруьн поселенидин Кьил Низами Абдурагьманов, образованидин управленидин векилар, волонтеррин гьерекатрин ва Жегьилрин парламентдин членар авай.

Мярекатар сятдин 9-даз райондин Кьил Нариман Абдулмуталибова, военный комиссар Рейзудин Женетова, образованидин управленидин начальник Гьуьсейн Шихбабаева, агъсакъалрин Советдин председатель Аслан Асланова мемориальный комплексдал цуьквер эцигунилай башламиш хьана.

Къейд авун лазим я хьи, алай вахтунда и комплексдал ремонтрин кIвалахар кьиле тухузва. «Формирование комфортной городской среды» программадай мемориальный комплекс цIийикIа туькIуьр хъийида, дуьзмишда.

Муниципальный райондин Кьил Нариман Абдулмуталибова Гъалибвилин 75 йис тамам хьун район эгьлийриз мубаракна, Ватандин ЧIехи дяведин йисара чи аскерри, халкьди къалурай жуьрэтлувилерикай, и Гъалибвилик чи районэгьлийрини еке пай кутурдакай гегьенш рахунар авуна.

Районэгьлийриз тебрикдин келимаяр гваз военный комиссар Рейзудин Женетовни рахана.

Дуьньяда ва уьлкведа эпидемиологиядин гьалар аваз хьун себеб яз, районда онлайн-режимдин къайдада акцияр, флэшмобар, онлайн-конкурсар, ватанпересвилин тарсар ва маса мярекатарни кьиле фена. Анра 2000-далай виниз инсанри иштиракна.

***

Мемориальный комплексдал тухвай мярекатдилай гуьгъуьниз «Волонтеры Победы» Вирироссиядин общественный гьерекатдин ва Жегьилрин парламентдин членри «Георгиевская ленточка» акция, «Письмо Победы» онлайн-акция, «Память сердца», «Наследники Победы», «Окна Победы», «Стихи и песни Победы», «Песни военных лет» ва маса конкурсар-флешмобар тухвана.

***

ЧIехи Гъалибвилин 75 йис тамам хьунихъ галаз алакъалу яз Вини СтIалрин хуьряй тир блокадница Жанна Мегьамедовадиз «Волонтеры Победы» общественный гьерекатдин патай цуьквер ва суварин зинбил (корзина) гана. И мярекатда иштиракай хуьруьн поселенидин кьил Селим Казимова Жанна Мегьамедовадиз Гъалибвилин 75 йис тамам хьун тебрикна, алхишдин келимаяр лагьана.

Мугьман хьунай, гуьгьуьл къачунай, савкьатар гунай блокадница Жанна Мегьамедовади волонтерриз ва Селим Казимоваз чухсагъул лагьана.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1