Меню
6+

Сетевое издание «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

ОРДЕНОНОСЕЦ ИЗ АШАГА-СТАЛА

Ватандин ЧIехи дяведин иштиракчи Гьажимагьамед Къазимагьамедов 1920-йисуз Агъа СтIалдал кесиб Къазимагьамедан хизанда дидедиз хьана.

1939-йисуз ВЛКСМ-дин жергейриз гьахьай жегьил гададиз 1940-йисан октябрдин вацра армияда къуллугъ ийиз эвер гана. Хъсан кьатIунар авай, зиринг гада тир ам Азербайжан ССР-дин КцIар шегьерда авай гъвечIи составдин офицервилин командирар гьазурдай 406-учебный полкуниз рекье туна. 6 вацра ана кIелайдалай гуьгъуьниз жегьил аскер къуллугъун давамариз Гуржистандин Махарадзе шегьерда авай 121-горно-стрелковый полкуниз акъатна.

Дуьньядин гьалар къизгъин хьунихъ галаз алакъалу яз ада къуллугъзавай рота Батуми шегьердиз рекье туна. 1941-йисан февралдин вацра командованиди ам Телавидин военно-пехотный училищедиз рекье туна. Училище вахтундилай вилик ва лап хъсан къиметралди акьалтIарай ам лейтенантвилин чин гуниз лайихлу хьана

Ватандин ЧIехи дяве башламиш хьунихъ галаз алакъалу яз жегьил офицер Къаякент районда авай 317-стрелковый дивизиядин 761- стрелковый полкуниз рекье туна.

1942-йисуз немсерин командованиди Кавказдал ва Сталинграддал гьужум авун тешкилна. Гьажимагьамед Къазимагьамедова къуллугъзавай 761-стрелковый полк Кеферпатан Осетиядин Беслан шегьердиз рекье туна. Ина жегьил лейтенант 9-стрелковый ротадин командирвиле тайинарна, Заманкул хуьруьн сергьятда адан ротади 6 вацра женгинин сенгерар хвена. Вирида сад хьиз женг чIугуналди, абур Орджоникидзе шегьердин кIанихъ душмандин хура акъвазна. Адан ротадин иштираквални аваз 1943-йисуз Кеферпатан Осетия, Ингушетия, Кабардино-Балкария немсерин фашистрикай азад хъувуна, абуруз Дагъустандин ва Бакудин нафтIадин мяденар кьадай мумкинвал ганач. Гь Къазимагьамедован ротади Новоалександровск шегьер азад авун кьетIен вакъиа хьана. Ана кьиле фейи къати ягъунра ротадин командирдал залан хер хьана. Женгера къалурай викIегьвилерай ва игитвиляй адаз вахтундилай вилик старший лейтенантвилин чин гана. Госпиталда сагъламвал мягькемар хъувурдалай гуьгъуьниз Къазимагьамедов Гьажимагьамед 324-стрелковый полкуниз рекье туна. Ада Ростов ва Таганрог шегьерар азад авунин къати женгера иштиракна. Ина ам капитандин чин гуниз лайихлу хьана.

1943-йисан октябрдин вацра ротадин командирди, 1-Украинский фронтдин гвардиядин танковый 3-армиядин жергейра аваз, Украина, Львов, Киев ва Перемышль шегьерар азад хъувунин, 1944-йисан июндиз душмандин Бродский группировка гьалкъада тунин, 17 агъзур кас фашистар есирда кьунин женгера иштиракна. ПТР-дин ротадин командир яз ада а чIавуз кьве сеферда Советрин Союздин Игит полковник И. М. Якубовскийди регьбервал гузвай бригадада къуллугъна, гвардиядин танковый 91-бригададик кваз, ам Висла ва Одер вацIарилай элячIна.

Ада Польша азад хъувунин женгерани иштиракна ва адал 3-сеферда хер хьана. Ярославль шегьердин госпиталда хер сагъар хъувурдалай гуьгъуьниз ада гвардейский танковый 3-армиядин десантно-танковый ротадиз регьбервал гуз хьана. Женгера къалурай кьегьалвилерай ротадин командирдиз Ватандин дяведин 1-дережадин орден гана. 1945-йисан майдиз чи кьушунри Берлин шегьер къачуна.

Рейхстагдин цлал дирибаш командирди ихьтин гафар кхьена: "Дагъустандай Берлиндиз кьван фейи гвардиядин капитан Къазимегьамедов Гь...".

1945-йисан 6-майдиз Берлинда немсерин гарнизонди рей гана, лезгидин ротади, 2-гвардейский танковый армиядин жергейра аваз, Прага шегьер немсерин фашистрикай азад авуна. Гьа иналди ада вичин яргъалди тир женгинин рехъ акьалтIарна.

1945-йисан июлдиз Гь. Къазимагьамедов кIелун давамарун патал Тамбовдин высший офицерский школадиз рекье туна. Гуьгъуьнлай дяведин ветеранди хайи хуьруьн юкьван школада саки 40 йисуз муаллим-военрук яз кIвалахна, акьалтзавай несилдиз аскервилинни ватанпересвилин тербия гунин жигьетдай хуьре, районда ва адалайни къеце еке кIвалах тухвана.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

49