Меню
6+

Сетевое издание «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Баркаллу уьмуьрдин сагьиб

Ибрагьимов Играмудин Гьасановичан — 90 йис

Инсан гьикьван марифатлу хьайитIа,

гьакьван ам Ватандиз вафалу жеда.

А. С. Грибоедов

Вичи чи районда гзаф йисара жавабдар къуллугърал алаз намслувилелди кIвалах авур, алай вахтунда лайихлу пенсияда авай Ибрагьимов Играмудин Гьасановича 5-майдиз 90-гатфар къаршиламишна. Ам 1930-йисуз Бакудин нафтIадин мяденра фяле яз кIвалахзавай Ибрагьиман хизанда дидедиз хьана. (Бубадин тIварцIин чкадал документра чIехи буба Гьасанан тIвар гьатнава). Жаван ва жегьил вахтар дяведин ва адалай гуьгъуьнин четин йисарал гьалтай адаз уьмуьрда азиятарни такуна амукьнач.

Вичихъ галаз авур суьгьбетда агъсакъалди рикIел хкизвайвал, абур Мике дидедиз 3 гадани са руш авай. Адан чIехи стха Муьгьуьдин, 1941-йисан февралдин вацра армиядиз фейиди (ада Украинада связист яз къуллугъзавай), анай ам фронтдиз акъатна, элкъвена хайи хизандиз хтун адаз кьисмет хьанач.

Гьеле 12 йиса авай аял яз Играмудин Гьасановича 1942-1945-йисара, кIвачел шаламар алаз ва тандал бегьем партал алачиз, хайи хуьруьн «Дагправда» колхозда жуьреба-жуьре кIвалахар ийиз хьана. 1945-1953-йисара ада Шихидхуьруьн 7 йисан мектебда кIелна. (И йисара адакай 8 йисан, эхирдайни юкьван школа хьана).

Хъсан зигьин ва кьатIунар авай жегьилди кIелун давамарун кьетIна ва ам а чIавуз СтIал Сулейманан тIварунихъ галай Дагъустандин педагогический институтдик кIелиз экечIна ва 1957-йисуз анаг агалкьунралди акьалтIарна, хайи хуьре сад лагьайди яз кьилин образование къачуна. 1957-1961-йисара жегьил пешекарди Шихидхуьруьн юкьван школада урус чIалан ва литературадин тарсар гудай муаллим яз кIвалахна.

Тапшурмишай кIвалах вахтунда ва намуслувилелди кьилиз акъуддай, уьмуьрда активный тереф кьунвай жегьил пешекар коммунистрин партиядин жергейриз кьабулна. Хизанни галаз Кьасумхуьрел куьч хьайи Играмудин Гьасановича 1961-1964-йисара КПСС-дин Кьасумхуьруьн райкомдин инструктор яз, гуьгъуьнлай 4 йисуз орготделдин заведующий яз кIвалахна. Вич хъсан тешкилатчи ва савадду пешекар яз къалурай ам Ростовдин высший партийный школадиз кIелиз ракъурна ва 1970-йисуз анаг акьалтIарна, гьа са вахтунда Дербентдин хуьруьн майишатдин техникумни кIелна куьтягьна.

1970-1975-йисара И. Гь. Ибрагьимова партиядин С.-Стальский райкомда мад орготделдин заведующийвилин къуллугъ давамарна. Играмудин Гьасановича гуьгъуьнлай гзаф йисара С.-Стальский райисполкомдин председателдин заместителвилин жавабдар къуллугъ вичиз хас тир намуслувилелди кьиле тухвана, 1993-1995-йисара агъсакъалди С.-Стальский райондин администрациядин кьилин советник яз кIвалахна, 1995-йисалай партиядин ва зегьметдин ветеран лайихлу пенсияда ава.

КIвалахдив яратмишдай къайдада, рикI гваз эгечIдай Играмудин Гьасановичан гзаф йисарин намуслу зегьмет са шумудра юбилейрин медалар, республикадин ва райондин патай Гьуьрметдин грамотаяр, къиметлу пишкешар гуналди ва чухсагъулар малумаруналди къейднава. Ам са шумуд сеферда С.-Стальский райондин халкьдин депутатрин райсоветдин депутатвиле, партиядин райкомдин ва бюродин членвиле, конференцийрин делегатвилени хкянай.

- Жаван вахтара азиятар акунатIани, зун зи кьисметдал рази я, — лугьузва агъсакъалди, — за зун бахтлу кас яз гьисабзава. Захъ зи вафалу уьмуьрдин юлдаш, пуд велед (кьве гадани са руш) ава: Сабир, Наида ва Тельман.

Сабира ДГТИ-дин эцигунардай факультет, Наидади ДГУ-дин филологиядин факультет, Тельманани ДГУ-дин экономический факультет акьалтIарна, чпин пешекарвилерай кIвалахзава. Абурухъни чпин хизанар ава. Захъ исятда 7 хтул ва 6 птул ава. Зи рикI абурукай архайин я. Абуру зазни чпин чIехи дидедиз руьгьдин кIубанвал гузва.

Вичин уьмуьрдин 90 лагьай гатфар тебрик авунихъ галаз санал, чаз намуслу инсан ва адалатлу хизандин кьил, насигьатчи Играмудин Гьасановичахъ чандин сагъвал, яргъал уьмуьр, руьгьдин кIубанвал, хизандани бахт, берекат ва вири хъсанвилер хьана кIанзава.

Абидин Камилов, ДР-дин культурадин лайихлу работник

Шикилда: И. Гь. Ибрагьимовав нубатдин награда вахкузвайла

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5