Меню
6+

Сетевое издание «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Коронавирусдин инфекцияди бегьердиз кьецI тагудайвал…

Хуьруьн майишатдин карханаяр, лежбервилинни фермервилин майишатар, арендаторар патал алайди чуьлдин кIвалахрин къизгъин вахт я.

Агротехникадин серенжемар галай-галайвал ва чпин вахтара тухунилай уьзуьмлухра, багълара, никIера, салара гьасилдай бегьердин кьадар гзаф аслу я.

Дуьньядин гзаф уьлквейра хьиз, алай вахтунда коронавирусдин инфекция чи уьлкведа, республикадани чкIанва. Ида производстводин хилера агротехникадин кIвалахар тухуниз манийвал ийизвани? И суал чна Сулейман-Стальский райондин хуьруьн майишатдин ва суьрсетдин управленидин начальник Мегьамедзагьид Бабаеваз гана.

- Гьелбетда, коронавирусдин инфекцияди инсандин уьмуьрдин вири терефриз хьиз, хуьруьн майишатдин хилезни таъсир ийизва, са жерге манийвилер арадал гъизва, — лугьузва М. Бабаева. – ЯтIани, райондин хуьруьн майишатдин карханайри, КФХ-ри, ЛПХ-ри Роспотребнадзордин, карантиндин, санитариядин къайдайрал ва истемишунрал амал авуналди, багъларани салара, никIерани уьзуьмлухра агротехникадин серенжемар тухузва, бегьердин бине кутазва.

УСХП-дин начальник Мегьамедзагьид Бабаевахъ ва адан заместитель Гьамидин Абдулкъафаровахъ галаз чун са шумуд карханадиз, майишатдиз ва арендадин участокриз фена, анра коронавирусди «агъавалзавай» алай вахтунда кIвалахар тешкилнавай гьаларихъ галаз таниш хьана.

Ингье, чун Герейханован хуьруьн поселенидин мулкунал кардик квай лежбервилинни фермервилин «Амир» майишатда (КФХ-да) ава. Чаз акурвал, ина уьзуьмлухар Герейханован хуьруьн кьилихъ галай дагъдин участокда (кIунтIара) кутунва – им райондин шартIара цIийивал я.

- Райондин мулкунал уьзуьм лухар ва я багълар кутаз жедай дуьзен чилер амач, — лугьузва КФХ-дин руководитель Къазиагьмед Къазиагьмедова. – Гьавиляй чна 20 гектарда вилик йисара са менфятни къачун тийизвай дагъдин участокда уьзуьмлухар кутуна. Ана чна стIал-стIал яд гудай къайда кардик кутада, вучиз лагьайтIа, вири майданар лекъвер-синер тир аниз къаналдай ахъайна яд гуз жедач, чил тухуда. Гьелелиг чна цIийи уьзуьмлухриз яд опрыскивателар галай тракторрин куьмекдалди гузва.

Чаз акурвал, жегьил уьзуьм лухар элкъвена сеткадалди кIевирнава, столбаяр акIурнава, абурай симер чIугунва, уьзуьмлухра жергейрин араяр цанва, тегьенгриз гатфарин ятар ганва. Иесивилелди гелкъуьн тешкилнавай уьзуьмлухар тарифдай къайдада ава.

Чун фейила 6 кас рабочияр жегьил уьзуьмлухриз дарманар ягъунал машгъул тир.

- Чна уьзуьмлухра кIвалах-дайла коронавирусдин тIе-гъуьндихъ галаз алакъалу яз малумарнавай карантиндин, санитариядин истемишунрал амални ийизва, гьавиляй рабочиярни кIвалахал гьар юкъуз 5-6 кас экъечIзава, — лугьузва рабочий Шейрихан Къарабеговади. – И чIуру ва хаталу инфекция чкIунин вилик пад кьун яз чав майишатдин руководителди гъилерал алукIдай бегьлеяр ва сивелни нерал гьалдай маскаярни вуганва, абур вахт-вахтунда дегишарзава. Чаз умуд кутаз кIанзава хьи, талукь къуллугъри ва пешекари кьабулзавай серенжемар себеб яз коронавирусдин инфекция терг жеда ва хуьруьн майишатдин хилени кIвалахар гуьнгуьна гьат хъийида.

Герейханован хуьруьн поселенидин кьил Руслан Алдырова чаз алава хъувурвал, хуьруьн поселенидин мулкунал алай хуьруьн майишатдин вири карханайра, арендадин участокра кIвалахар къайдадик кваз кьиле физва, хуьруьн майишатдин суьрсет гьасилзавайбур дигидай целдини таъмин я. Поселенида майишатдин къенепатанбур тир дигидай цин вири къаналар вахтундамаз михьна, къайдадиз гъанва.

Текст кхьейди ва шикил ягъайди Хазран Кьасумов я.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1