Культурадин амукьдай ирс
Сулейман-Стальский районда, тарихдин метлеб авай ва тIебиатдин гуьзел чкаяр хьиз, са шумуд музейни ава: Дагъустандин халкьдин шаир СтIал Сулейманан КIвал-музей, райондин краеведческий музей, Алкьвадар Гьасан эфендидин музей, Вини СтIалрин краеведческий музей, Эминхуьре Етим Эминан музей, Цмурдал Гъалибвилин музей, Герейханован 1-нумрадин, ЦIийи-Макьарин, Эминхуьруьн юкьван школайрин музеяр, Агъа-СтIалдал Алимегьамед Эседулаеван ва Ичина Ариф Рустамован музеяр.
Районда виридалайни «яшлуди» СтIал Сулейманан КIвал-музей я. 1950-йисуз ачухай и музей культурадин ирс яз амукьдай федеральный метлеб авай объект я. 1970-1980-йисар музей патал виридалайни бегьерлубур хьана.
1988-йисан майдин вацра, накьвадин керпичрикай эцигнавай, лап чIуру гьалдиз атанвай музейдин дарамат чукIурна, къванерикай эцигай КIвал-музейдин цIийи дарамат ачухна.
2009-йисуз гьа вахтунда райондин Кьил Имам Яралиева КIвал-музейдин территорияда дуьзмуьшунин кIвалахар тухвана, музейдин вилик квай майданда къир цана.
2016-йисан 21-мартдилай 22-март алукьзавай йифиз СтIал Сулейманан КIвал-музей цIай кьуна кана. Чи районэгьли Фируза Керимовадин «Территория добра» мергьеметлувилин фондуни, «Рычал-су» ОАО-ди, «Посольство Москвы» ООО-ди, халкьдин кьегьал хва Имам Яралиева, Сардароврин хизанди, карчи Зураб Шайдаева ва меценатар тир маса ксари, цIудралди районэгьлийри куьмек ва пулунин такьатар гуналди КIвал-музейдин дарамат цIийи кьилелай ахциг хъувуна.
СтIал Сулейманан КIвал-музей къе республикада культурадин машгьур мукарикай сад я.
Республикадин общественный деятель, меценат Имам Яралиева теклиф гъуналди ва пулунин такьатар гуналди 2009-йисуз Алкьвадрин хуьре Дагъустандин зурба алим, тарихчи, шаир ва камалэгьли Гьасан-эфендидиз музей ачухна. Ана чIехи кьадарда аваз экспонатар, шикилар, документар эцигнава. Абур кIватIунин карда Гьасан-эфендидин невеяр тир писатель ва муаллим Гьуьсейн Гьуьсейнова, профессор Амри Шихсаидова, музейрин рекьяй пешекар Нурият Алкадарскаяди ва масабуру еке зегьмет чIугуна.
500 агъзур квадратный метрдин майдан кьунвай музейда 5 зал кардик ква.
Тамам 40 йисан вилик тарихдин муаллим Нурмегьамед Мегьамедова арадал гъайи Вини СтIалрин музейни райондин дамах яз гьисабиз жеда. Республикада лап хъсанбурун жергеда авай музейда 4500 экспонат ава.
Музейдиз неинки чи республикадай ва уьлкведай, гьакIни Германиядай, Франциядай, Норвегиядай, Ирандай, Пакистандай, Вьетнамдай гзаф кьадар инсанар атана, абур музейда авай вилик девиррин шейэри гьейранарна.
Музейдин са отдел адаз ганвай пишкешри кьунва, абурун кьадар вишелай виниз я.
ГъвечIи-гъвечIи музеяр (музейрин кIвалер) райондин маса школайрани кардик ква, абурун кьадар йисандавай-суз артух жезва.
Хазран Кьасумов
Шикилра: СтIал Сулейманан ва Гьасан эфендидин музейрин акунар
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
