Меню
6+

Сетевое издание «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Сулеймана халкь, халкьди Сулейман хкажзава!

СтIал Сулейманан Шииратдин йикъар.

ТIебиатдин гуьзел вахт тир майдин варз суварралди, лишанлу вакъиайралди, гурлу мярекатралди, тIвар-ван авай шаиррин, писателрин, искусстводин устадрин, алимрин – са гафуналди, къадим лезги халкь, такабурлу Лезгистан неинки Урусатда, гьакIни виридуьньяда машгьур авур кьегьал рухвайралди ва баркаллу рушаралди девлетлу я.

И суваррин, юбилейрин арада Дагъустандин халкьдин шаир, ХХ асирдин Гомер, чIалан устад, эбеди яз амукьдай зурба шаир СтIал Сулейман хайи йикъахъ галаз алакъалу яз майдин вацра тухузвай Шииратдин йикъари – сувари кьетIен чка кьазва.

Къенин аямдин дуьньядиз машгьур шаир Расул Гьамзатова Сулейман хьтин хва гайи Агъа-СтIалрин хуьруьз «Шииратдин Мекка» лагьана, гьар йисуз ана СтIал Сулейман хайи юкъуз сувар яз къейд авунин, Шииратдин йикъар тухунин теклиф гана. Гьар йисан 18-майдиз халкьдин виридалайни кIани шаиррикай, арифдаррикай сад тир СтIал Сулейманан хайи юкъуз Агъа-СтIалдал Шииратдин сувар, Кьасумхуьрел ва маса хуьрера гьар жуьредин шадвилин мярекатар кьиле тухун адет хьанвай кар я. Шииратдин суварик Урусатдин гзаф субъектрайни шегьеррай, Азербайжандай ва къецепатан маса уьлквейрай, Дагъустан Республикадин саки вири районрайни шегьеррай гзаф кьадар инсанар къвезвай, гьа идалди абуру чIехи шаирдиз чпин патай авай кIанивал къалурзавай. Гьакъикъатдани СтIал Сулейманан Шииратдин йикъар халкьдин суварин мярекатдиз элкъвезвай.

2020-йисузни, 18-майдиз, «Шииратдин Мекка» тир Агъа-СтIалдал Сулейманан Шииратдин йикъар махлукьатдин еке иштираквал аваз ва гурлудаказ кьиле фин лазим тир, идаз районда вири патарихъай гьазурвилерни акунвай. Амма… Виридуьнья къарсурай коронавирусдин тIегъуьнди, гьайиф хьи, цIинин йисуз и сувар гурлудаказ кьиле тухудай мумкинвал ганач. РикIел СтIал Сулейманан шиирдин цIарар къвезва:

Иеси кьин тавур дуьнья,

Вун алаш-булаш хьана хьи.

Зерре кьванни чина гьая

Амачиз угъраш хьана хьи…

«Заз ва – а кар заз чизва – неинки тек са заз ашукь СтIал Сулеймана зурба таъсир авуна. Заз и савадсуз, амма камаллу кьуьзуь касди, президиумда ацукьна, куш- кушдалди вичин шиирар гьикI теснифзаватIа, акуна, ахпа ада, ХХ асирдин Гомера абур гьейран жедай тегьерда кIелна. Сулеймана яратмишзавай хьтин поэзиядин жавагьирар арадиз гъиз алакьзавай инсанар хуьх», — лагьанай Максим Горькийди.

Мадни, Максим Горькийди Сулейманаз кхьенай: «Вун ви къадирлу халкьди хуьрай!». Йисар къвез фида, абурухъ галаз – несиларни. ЧIехи шаир, чIалан зурба устад СтIал Сулейман, адан гуьзел жавагьирар, камаллу тарсар мегер рикIелай фидани?! Ам къадирлу халкьди хуьзва!

2020-йисан 18-май. СтIал Сулейманан 151 йис тамам хьунихъ галаз алакъалу яз Кьасумхуьрел паркуна ва Агъа-СтIалдал шаирдин КIвал-музейда СтIал Сулейманан памятникрал цуьквер эцигунин мярекатар кьиле фена. Санитариядинни эпидемиологиядин рекьерай хатасузвал хуьн патал мярекатра сергьятламишнавай кьадар инсанри иштиракна.

Шииратдин суварин мярекатар Кьасумхуьрел паркуна райондин Кьил Нариман Абдулмуталибова СтIал Сулейманан памятникдал цуьквер эцигунилай башламиш хьана. Ада вичин рахунра СтIал Сулейманан зурбавал, бажарагълувал къейдна, адан уьмуьрдин ва яратмишунрин рекьерикай лагьана.

- Зурба ва камаллу СтIал Сулейман Дагъларин уьлкведин тарихда вич хайи югъ Шииратдин сувар яз къейдзавай тек са шаир я, — давамарна Нариман Абдулмуталибова. – Сулейман чи халкьдин, чи тарихдин ярж я. ЧIехи шаирди вичин халкь машгьурна, виниз хкажна, къе СтIал Сулейман халкьдини хкажзава.

СтIал Сулейманан памятникдал цуьквер эцигунин мярекатда Дагъустандин халкьдин шаир Майрудин Бабахановани иштиракна.

Агъа-СтIалрин хуьре шаирдин КIвал-музейда кьиле фейи мярекатда Агъа-СтIалрин хуьруьн поселенидин администрациядин кьил Низами Абдурагьманова, КIвал-музейдин директор Лидия Сталскаяди, хуьруьн культурадинни ял ягъунин центрадин работникри ва волонтеррини иштиракна.

Къейд авун лазим я хьи, СтIал Сулейманан Шииратдин йикъарин сергьятра аваз мярекатар онлайн къайдадани кьиле фена. ИкI, районда «Его стихи пленительная сласть» лишандик кваз поэзиядин флэшмоб, культурадин ва образованидин идарайрин работникри СтIал Сулейманан шиирар кIелунай декломация кьиле фена.

Кьасумхуьруьн телевиденидай «Шиир икI арадал къвезва», «Малум тушир Сулейман», «ХХ асирдин Гомер» художественный ва документальный фильмаяр, «Билбил» видеоролик, гьакIни шаирдин шикилрин видеобзор къалурна.

Райондин «Куьредин хабарар» газетди СтIал Сулейманан Шииратдин йикъарин сергьятра аваз тухвай вири мярекатрикай кIелзавайбур хабардар авуна.

Текст кхьейди ва шикилар ягъайди Хазран Кьасумов я.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3