Куьчейра къир цазва

И йикъара чун КIварчагърин хуьруьз мугьман хьана. Кьилин куьчейра къир цунин кIвалахрал машгъул тир техника ва рабочияр акурла, чи гуьгьуьл шад хьана.

- Санлай къачурла, алай вахтунда махсус бригада хуьруьн кьилин куьчейрикай сада ва адахъ галаз алакъалу жезвай куьчейрин хивера къир цунал машгъул я, санлай абуру 650 квадратный метрдин майдан кьазва, — лугьузва «сельсовет Карчагский» хуьруьн поселенидин кьил Завидин Загьирбегова. – Гележегда КIварчагъа, гьакIни поселенидик акатзавай Зизикрин, НуьцIуьгърин ва Экенрин хуьрера куьчейра къир цунин, херхем вегьена, куьчеяр къайдадиз гъунин кIвалахар давамарда. И кIвалахар райондин рекьерин фондунин такьатрихъ галаз санал, чна «Мои дороги» программадайни давамарда.

КIварчагърин хуьре кьилин куьчеда къир цунал Дербент районда кардик квай «Прогресс» карханадин махсус бригада машгъул я.

- Пуд-кьуд йис я чна Сулейман-Стальский райондин хуьрера куьчейра къир цунин кIвалахар кьиле тухуз, — лугьузва карханадин прораб Селим Абдулкеримова. – Райондин администрациядихъ, руководстводихъ галазни чи хъсан, сих алакъа ава. Абуру чаз кIвалахда вири рекьерай куьмекар гузва. Ихьтин алакъади вичин хъсан нетижани гузва: хуьрерин рекьер къулайбур ва хатасузбур жезва.

Агьалийрин гьакъиндай ихьтин къайгъударвал авунай жемятди райондин Кьил Нариман Абдулмуталибоваз, хуьруьн по селенидин кьил Завидин Загьирбеговаз ва куьчейра къир цазвай «Прогресс» карханадин махсус бригададиз чухсагъул лугьузва.

Хазран Кьасумов