Меню
6+

Сетевое издание «Кюре»

29.05.2020 13:44 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

РикIелай алатдач

Заз къе зи чIехи буба «Сталинград хуьнай» медалдин сагьиб Амирасланов Гьажичуьнгуьтакай суьгьбет ийиз кIанзава.

Амирасланов Гьажичуьнгуьт 1921-йисан 1-нюлдиз Татарханрин хуьре лежбердин хизанда дидедиз хьана. Ада Кьурагь райондин КьепIиррин школада, ахпа Бакуда авай ими Рамазан Керимован кIвале яшамиш жез, гьана кIелун давамарна. Мектеб агалкьунралди куьтягьай жегьил Азербайжандин КIцар шегьерда авай военный училищедик экечIна. Анаг куьтягьдалди Гьажичуьнгуьт Яру Армиядин жергейриз тухванай.

Гь. Амираслановаз Сталинград патал кьиле фейи къизгъин женгера иштиракун кьисмет хьана. Са шумудра залан хирер хьайи ам, сагъ хъхьайла, элкъвена фронтдиз хъфенай.

Женгера къалурай кьегьалвилерай Гьажичуьнгуьт Амирасланов Ватандин ЧIехи дяведин ордендиз, "Сталинград хуьнай", "Германиядин винел гъалибвал къазанмишунай"медалриз лайихлу хьана.

Ватандин ЧIехи дяведилай кьулухъ Гьажичуьнгуьт Амирасланов старший лейтенантдин чинда аваз хайи хуьруьз хтанай. 1946-1947-йисара жегьилди Татарханрин хуьруьн 7 йисан школада математикадинни физикадин тарсар гуз кIвалахна. Гуьгъуьнлай ада Цмуррин 7 йисан мектебда завучвиле кIвалахна. Эхиримжи 43 йисан вахтунда Гьажи муаллимди Татарханрин хуьруьн школада акьалтзавай несилдиз математикадай, физикадай чирвилер гана. Чидайбуру ам тIебии алакьунар, зигьин, бажарагъ авай муаллим тир лугьудай. Ада вичин везифаяр намуслувилелди кьиле тухудай, жемятдин патай адаз еке гьуьрмет авай.

Гьажичуьнгуьт Амирасланова уьмуьрдин юлдашдихъ галаз санал 5 хвани 2 руш тербияламишна. Адан рухвайри яшайишдин гьар са хиле алакьунар авай регьберар, пешекарар яз кIвалахзава.

Алай вахтунда ветерандин чешнелу кIвалах адан хтул Гуьлнара Амираслановади давамарзава. Гуьлнаради ДГПУ-дин математикадин факультет акьалтIарна, Сургут шегьерда мектебда вичин пешедай тарсар гузва.

Амирасланов Камиль, тарихдин муаллим

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3