СТАРЕЙШИНЫ СУЛЕЙМАН-СТАЛЬСКОГО РАЙОНА ПРИЗВАЛИ ЖИТЕЛЕЙ СОБЛЮДАТЬ РЕЖИМ САМОИЗОЛЯЦИИ

Гьуьрметлу стхаяр, вахар, азиз балаяр! Квез аквазва хьи, вири дуьньяда гьихьтин гьалар арадал атанватIа. Къе чун чIехи хаталувилик акатнава. Лугьуз кIанзава хьи, Ватандин ЧIехи дяведилай гуьгьуьниз ихьтин чIуру гьалар хьайиди туш. Хаталу душмандихъ галаз хьиз, вири халкьди, санал тупламиш хьана, женг чIугвадай гьалдиз ухшар я.

Анжах гьайиф чIугвадай кар ам я хьи, и хаталувилин чIехивал, хиянатвал чна вирида сад хьиз аннамишзавач. Имни гъавурда акьадай кар я. Вучиз лагьайтIа, Дуьньядин Кьвед лагьай дяведа душман – фашизм, адан чапхунчивал, инсансузвал гьар садаз вичин вилералди аквазвай. Амма къе пайда хьанвайди вилериз таквадай душман я. Ам акун патал гилан аямдин гужлу микроскоп герек къвезва. Ада, ислягьди яз аквадай, кисна кьулухъай кьадай, элуькь тийидай кицIи хьиз чал вегьезва. Чаз лагьайтIа, «кицIи кьунвайди» кар кардай фейила хабар жезва.

Къе инсандиз дяве малумарнавайди са куьлуь, амма чIехи барбатIвилерал гъизвай са затI – вирус я. Душмандиз гъвечIиди-чIехиди, итим-дишегьли, гьаким-лежбер, кесиб-девлетлу – вири сад я, хурук акатай гьич садазни инсафзавач. Адан винел гъалибвал къачун патал туп-тфенг, ракетар, ядерный яракь герек къвезвач.

Инсаниятдин къенин мумкинвилериз килигна исятда герек къвезвайди, сифтени-сифте, гьар сада вичи инсан гьихьтин бедбахтвилик акатзаватIа, гьам дериндай аннамишун, гьар юкъуз чаз духтурри-пешекарри малумарзавай серенжемар кьиле тухун я. Духтурри, алимри и мусибатдикай инсаният хуьн патал югъ-йиф талгьана, игитвилиз барабар зегьмет чIугун я.

Къурхулувал кутазвай, мегьтел жедай кар ам я хьи, COVID-19 гьакъикъатдани авайдан, ам акьалтIай хаталу вирус тирдан чIалахъ хейлин инсанар ч1алахъ къенин юкъузни жезвач. «Ваъ», — лугьузва «гзаф чидайбуру», — ам «фенд» я. Чун алдатмишзава». Им авамвал ятIа, саймазвал ятIа? Им вуч я?

ЦIийи вирусди дуьнья, къарсурна, дегишарзава. Вири уьлквейрин экономикаяр, яшайиш кIаняй акъудзава. Дагъустанда, лагьайтIа, эпидемиядихъ галаз алакъалу гьалар къвердавай четин жезва. Духтурханаяр азарлубурув ацIанва. Еке къалабулух кутазвай кар ам я хьи, гьар юкъуз телеф жезвайбурун кьадар гзаф жезва. Чаз инай-анай къвезвай ванерай Дагъустанда са юкъуз 10 касдилай гзаф вирусдин къурбандар хьайи хуьрер ава. Аллагьди рагьмет гурай чпиз.

Дагъустандин медицина лап четин гьалда ава. Кардин гъавурда авай халис пешекар духтурар бес жезвач. Дагъустанвийриз куьмек ийиз Москвадай, Россиядин маса шегьеррай пешекарар, такьатар рекье тунва. И четин гьалдикай хабар хьайила, гьатта къецепатан уьлквейрай, месела, Туьркиядай куьмек агакьарнава. РФ-дин Оборонадин министерстводи Дагъустандиз военврачар рекье тунва, инфекциядин уьзуьррик азарлубур сагъар хъийидай госпиталар картик кутуна, ц1ийи больницаяр эцигзава.

Медицинадин идарайриз, духтурриз, дарда гьатнавай хизанриз куьмек гузвай баркаллу рухвайриз Сулейман Керимоваз, Имам Яралиеваз, Салман Бабаеваз, Марат Шайдаеваз ва масабуруз чна рикIин сидкьидай чухсагъул лугьузва.

Гзаф чIуру, вичиз гьеле дарман жагъун тавунвай, кьиникьар гъизвай вирусдин хаталувиликай хкудун патал чIехи куьмекар гузва. Амма духтурри алахъунар гьикьван гзаф авуртIани, паталай гьикьван гзаф куьмекар гуз хьайитIани, и завалдин вилик пад кьун эвелни-эвел чалай гьар садалай аслу я.

Чун сакIани и кар аннамиш тийизвай чун вири тахсирар гьукумдик кутадай, къуллугъэгьлияр критика ийидай русватдай устIарар я. Дуьньяда виридалай хъсанди хьайи советрин здравоохраненидин къайда «оптимизация» авуникди чи медицинадин хилез еке зарар хьана. Хейлин татугайвилериз, гъалатIриз рехъ ганва. Хъсан чирвилер авай пешекарар бес жезвач. Ришветбазвални авчиз туш. Амма чи «гзаф чидайбуруз» чпин ва гьар са агьалидин хиве авай жавабдарвал аквазвач.

Гегьенш майданра чикIизвай садакай садак акатдай завалдин вилик пад карантиндин серенжемар галачиз кьаз жедайди туш. И месэлада кар алайбур чун я. Аллагь Таалади вичи хуьрай! Кьилел акъвазнавай хаталувал кваз такьуна саймазвал авуналди, чна жува жув, жуван хизан, мукьва-кьили ва чара ксар завалдик кутадай чкадал гъизва. Чна гьар сада сифте нубатда вичи вич хуьн, жуван хиве авай жавабдарвал кIевелай аннамишун герек я. Чиновникринни духтуррин тахсиррикай, эгер абур аваз хьайитIа, рахана к1анда, анжах пешекарвилелди, меслятар къалуриз. Къенин юкъуз, энгел тавуна, гьялна кIанзавай месэла масад я, ам сагъардай дарманар тахьун.

Играмибур! Чав агатнавай хаталувал чIехиди я. Вири дуьньяда театрар, музеяр, университетар, стадионар, ресторанар агалнава, инсанар гзаф кIватIдай марекатар акъвазарнава, виринра карантиндин къайдайрал амал ийизва. Чи инсанри им кваз такьун, лазим тир веревирдар тавун аламатдин кар я. Мад сеферда – саймазвал ятIа?

Ша, чун камаллу жен. Гзаф крар герек къвезвач. КIанзавайди карантиндин, самоизоляциядин къайдаяр чIур тавун я. Эпидемиядин шартIара чарасуз тирвал, маскаяр, бегьлеяр алукIун, рахадайла сад садан мукьув гзаф агат тавун ва санитариядин маса истемишунар кьиле тухун я. Дагъустанда, гьа жергеда аваз чи райондани коронавирусдик азарлубурун кьадар гзаф жезвайвилин кьилин себеб карантиндин къайдайрал чна амал тавун я. Ша, жуван сагъламвилин къайгъуда, духтуррал аватдалди, жув чун жен.

Жуван сагъламвилин къайгъу чIугвазвайбуруз Аллагьди куьмек гузвайди я. Квез Аллагьди куьмек гурай.