Меню
6+

Сетевое издание «Кюре»

23.06.2020 11:44 Вторник
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Чи ватанэгьлияр - гьар сана Ватандихъ кузвай рикIер

Кьегьал рухвайринни баркаллу рушарин ватан тир СтIал Сулейманан тIварунихъ галай райондай гзафбуру алай вахтундани республикадилай къеце – Россиядин субъектра, къецепатан уьлквейра жуьреба-жуьре рекьерай пешекарар яз кIвалахзава, чпин низам-ахлакьдалди, кIвалахда агалкьунралди гьанра гьуьрмет къазанмишнава.

Ватандин сир алцум жедач

Камарални чипIерал, -

Ам алцумиз жеда анжах

Адахъ кузвай рикIерал,-

кхьенва Дагъустандин халкьдин шаир Майрудин Бабаханова. Хайи ватандивай яргъара халкьдин тIвар хкажзавай, хайи ватандихъ чпин рикIер кузвай кьегьал кьве касдикай – Россиядин Федерациядин Яракьлу Къуватрин подполковникар тир С. А. Абдулвагьидовакай ва М. С. Меликовакай къе заз чи газет кIелзавайбуруз куьрелди суьгьбет ийиз кIанзава.

Селим Абдулвагьидович Абдулвагьидов 1976-йисуз Кьулан СтIалрин хуьре дидедиз хьана. Ада 1993-йисуз хуьруьн юкьван школа, 1996-йисуз яру диплом къачуналди Дербент шегьердин медучилище акьалтIарна. РикIе къаст авай, чирвилерихъ къаних жегьилди 2003-йисуз Саратов шегьердин Военно-медицинадин институтни акьалтIарна. РФ-дин оборонадин министрдин приказдалди медицинадин къуллугъдин лейтенант Селим Абдулвагьидов къуллугъ давамарун патал Кеферпатан Кавказадин военный округдиз ракъурна. Адакай Ставропольский крайдин Буденовск шегьерда авай военный частуна медицинадин къуллугъдин начальник хьана. Жавабдар и къуллугъни, хиве авай везифаярни намуслудаказ кьиле тухуз, Селим Абдулвагьидовича Ставрополь шегьерда Высший военный училищедин юридический факультетни заочнидаказ кIелна акьалтIарна. Чи районэгьлидиз вахтундилай вилик медицинадин къуллугъдин капитанвилин чин гана.

С. А. Абдулвагьидов 2013-йисалай 2015-йисалди Москва шегьерда П. В. Мандрыкинан тIварунихъ галай ГИУВ-да «Организация здравоохранения и общественное здоровье» пешедай ординатура кьиле фена. Анаг медицинадин къуллугъдин майорвилин чин гуналди акьалтIарай С. Абдулвагьидов Москвадин областда Западный военный округдин дивизиядин медицинадин къуллугъдин начальниквиле тайинарна. Алай вахтунда ада и къуллугъ медицинадин къуллугъдин подполковникдин чинда аваз давамарзава.

Кьилин категориядин духтур тир Селим Абдулвагьидовичахъ туькIвей хизан, 3 велед ава.

***

Мадрид Султанмежидович Меликовани вичин уьмуьрдин рехъ яз Ватандиз къуллугъ авунин офицервилин рехъ хкяна.

М. Меликов 1981-йисуз Герейханован хуьруьн 1-отделенида чIехи ва низамлу хизанда дидедиз хьана. Гьеле школада кIелдай йисара ам хъсан къиметар аваз кIелуналди, ахлакьдалди, хци зигьиндалди амайбурулай тафаватлу тир. Ада школадин общественный уьмуьрдани активвилелди иштиракзавай, ам спортдални машгъул жезвай.

Школа лап хъсан къиметар аваз акьалтIарай М. Меликов Махачкъала шегьерда юридический институтдик экечIна, анаг, гуьгъуьнлай Военный училище ва Москва шегьерда Военный Академия акьалтIарна.

Кьегьал лезги хци РФ-дин жуьреба-жуьре военный округра гьар жуьредин жавабдар къуллугъар кьилиз акъудна, са шумуд йисуз Нарофоминск шегьерда авай частуна, подполковникдин чинда аваз, полкунин командирдин заместителдин жавабдар везифаяр кьиле тухвана.

Мадрид Султанмежидовича вичин ватанпересвилин, интернациональный буржи Сириядани кьилиз акъудна.

Алай вахтунда подполковник М. Меликов Москвадин Таманский дивизияда жавабдар къуллугъдал ала, Ватандиз къуллугъ авунин баркаллу кар давамзава.

Низамлу хизанди, лезги адетриз, бубайрин баркаллу крариз вафалу пуд веледди подполковник М. С. Меликоваз руьгьдин таъминвал, рикIин шадвал гузва.

… РФ-дин Яракьлу Къуватрин подполковникар тир Селим Абдулвагьидовакай ва Мадрид Меликовакай кхьенвай и макъала за чи играми шаир Майрудин Бабаханован шиирдин бендинилай башламишнай. Макъала заз Д. Фонвизинан келимайралди акьалтIариз кIанзава: «Хьун кIан ятIа ваз вун михьи инсан, Ватандиз бахш ая вири яшарин сан».

Эхь, Ватандихъ кузвай рикIер авай Селим Абдулвагьидовича ва Мадрид Султанмежидовича чпин яшарин санни Ватандиз бахшзава.

Хазран Кьасумов

Шикилра: С. Абдувагьидов ва М. Меликов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

6