КIвалахар эхирдиз къвезва
Сулейман-Стальский райондин Кьил Нариман Абдулмуталибов, райадминистрациядин жавабдар работникарни галаз, «Сардаркент-Даркуш-Казмаляр» групповой водопроводдал къвезвай къаналдал ракьунни-бетондин къурулуш (конструкция) эцигунин рекьяй эцигунринни-монтаждин кIвалахар акьалтIарзавай чкадал фена, кIвалах тешкилнавай гьалдихъ галаз таниш хьана.
Лагьана кIанда, групповой водопроводдихъ район социально-экономический рекьерай вилик финин карда стратегиядин метлеб ава. Гьавиляй объектдал эцигунрин вири кIвалахар Н. Абдулмуталибован кьетIен гуьзчивилик ква.
Эхиримжи йисара Чирагъ-чай вацIал водозаборный узел эцигна ва ишлемишиз вахкана, 500 мм. – 1378 мм. диаметрдин ПВХ-дин турбайрикай 7 километр водовод ва 3,6 километрдин яргъивал аваз къанал тухвана, алай аямдин михьи ийидай тадаракар ва гьар сада 3 агъзур кубометр яд гьакьдай 2 гьамбархана (резервуар) эцигна. Санлай къачурла, магистральный водопроводдин яргъивал 38,75 километр я.
Хуьруьн майишатдин суьрсет гьасилзавайбур дигидай целди таъминарунин мураддалди яд къвалалай тухудай къубу янава. Михьи ийидай тадаракрин территория дуьзмишунин, магистральный водопроводда турбаяр кутунин ва маса кIвалахар давам жезва.
Магистральный водопровод Герейханован хуьруьвай ДаркIуш-Къазмайрал кьван тухун патал эцигунрин кIвалахар вилик кума. «Сардаркент-Даркуш-Казмаляр» групповой водопроводдин эцигунар тамамвилелди акьалтIарунин мураддалди 2020-йис патал республикадин бюджетдай 103,419 агъзур манат пул ахъайнава. Объект гъиле авай йисуз вахкуда.
Групповой водопроводди райондин 90 процент агьалияр хъсан еридин хъвадай целди таъминарда.
Водозаборный узелдай гьакIни Кировский къаналдиз дигидай ядни гуда. 7565 метр яргъивал авай къаналди КIварчагъ дередин агьалияр (2500 гектардилай виниз майданар) дигидай целдини таъминарда. Ида агропромышленный комплексда инвестиционный цIийи проектар уьмуьрдиз кечирмишунин кардиз куьмекда.
«Сардаркент-Даркуш-Казмаляр» групповой магистральный водопроводдик гьакIни 71 километрдин яргъивал авай хъвадай цин цIийи линияни акахь хъийида. Ида 13 агъзурдав агакьна райцентрадин агьалияр хъвадай целди таъминардай мумкинвал гуда.
Алай йисуз «Комплексное развитие сельских территорий» Госпрограммадай хъвадай цин цIийи линияр эцигунин кIвалахар башламишда.
Алай вахтунда мад 4 хуьруьн поселенийра «Чистая вода» проектдай хуьрерин къенепатанбур тир хъвадай цин линийрин ПСД гьазурна акьалтI жезва.
Хазран Кьасумов
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
