Фахми хьтин инсанриз аферин

Зи фикир са зегьметчидикай газетдиз макъала кхьин тир.

- Хуьруьн майишатдин карханайрилай, лежбервилин майишатрилай гъейри, районда хуьруьн майишатдин суьрсет гьасилунал 960 кас арендаторарни машгъул я, гьакI хьайила, хъсандиз кIвалахзавай сад-вад касдин тIварар кьун регьят кар туш, — лагьана Гь. Абдулкъафарова. – Вучда кьван, ви кIевивал акурла, за гьа вун яшамиш жезвай Эминхуьряй тир чилин къадир авай, зегьметдал рикI алай Фахми Кьасумовакай макъала кхьин меслят къалурзава. Гаф авач, ам халисан лежбер итим я.

Гьамидин Абдулкъафарова вичин тIвар кьур Фахми Кьасумов хъсан зегьметчи тирди, ам мал-къара, лапагар хуьнал, техилар гьасилунал машгъул тирди заз хъсандиз ва фадлай чизва.

- Хуьруьн чкада яшамиш жез, туьквенрай, базаррай як, чIем, ниси, картуфар, чичIекар маса къачузвай ксар акурла, зун мягьтел жезвайди я, — лугьузва Фахми Кьасумова. – Чахъ тIебиатдин хъсан шартIар, булвилелди мулкар, дигидай яд ава, вучиз чи инсанри чпи недай суьрсет гьасилзавач, сала-багъда кIвалахзавач? Мягьтел я зун.

Хуьруьн чкада яшамиш жезвай инсандивай хизан патал гьар са нямет гьа чкадал гьасилиз жедайди Ф. Кьасумова вичин чешнедалди къалурзава.

Фахмиди Эминхуьруьн кIанихъ галай 4 гектардай вичин хсуси «Т-40» маркадин трактордалди векьер яна, 1000-далай виниз туькар кьуна.

Ф. Кьасумовахъ 2 гектар къуьлуьн никIерни ава. Чун фейила ам гад агудунал машгъул тир. Анаг хъсан гьалда ава. Гектардай 25-28 центнер бегьер кIватI хъийидайдахъ ам инанмиш я. Ада лугьузвайвал, цIи самун алафни хъсанди жеда.

Фахми Кьасумовахъ 100 лапаг ва 30-дав агакьна къара-маларни ава.

- Уьруьшрай кIватI хъийизвай векьер ва никIерай кIватIзавай самар за мал-къаради кьуьд акъудзавай чкайрал хкизва, гъвечIи-гъвечIи таяйра твазва, — лугьузва Ф. Кьасумова. — Идалайни гъейри, за жуван малар, лапагар патал комбикормани регъвезва.

Мадни, чилин къадир авай ва зегьметдал рикI алай Фахмиди вичин хизандин игьтияжар патал 15 сотыхда картуфар, помидорар, афнияр, чичIекарни гьасилзава.

Гьелбетда, чилел кIвалахзавай, шей гьасилзавай касдиз техникадин куьмекни чарасуз герек къвезва. Фахмидихъ, куьгьнебур ятIани, «ГАЗ-53» маркадин машин, «Т-40» маркадин трактор, хуьруьн майишатдин алатарни ава. Ида лежбер итимдиз чуьлдин кIвалахар тухунин, парар дашмиш хъувунин кIвалахра куьмекар гузва.

Ф. Кьасумовахъ лежбервилин майишат тешкилдай, мал-лапагдин кьадар, гьакIни техилар цазвай никIерин майданар артухардай фикир ава. Амма, и кар патал адахъ бес кьадар чил авач.

- Захъ чкадал мал-лапаг хуьдай чил авач, гьавиляй за лапагар, икьрар хьана, Кьурагь райондин Тителрин хуьруьз акъуднава. Ида хейлин четинвилерни арадал гъизва. Эминхуьруьн мулкунай чил гунин патахъай зун райондин талукь идарайризни фена, жуван дерди-бала лагьанва. За умудзава хьи, абурун куьмекдалди заз чкадал чил чара ийида, ида зи майишатни вилик тухуда, — лугьузва арендаторди.

Фахми Кьасумов хьтин зегьметкеш инсанриз аферин ва баркалла!

Хазран Кьасумов