“Шарвили - 2020” | Районда «Шарвили» эпосдиз талукьарнавай мярекатар

- Лезги халкьдин кьегьал хва, общественный деятель Имам Музамудинович Яралиеван теклифдалди 2000-йисалай эгечIна «Шарвили» эпосдин сувар гьар йисуз къадим Ахцегьрин хуьре кьиле тухузва, — лугьузва «Сулейман-Стальский район» муниципальный райондин Кьил Нариман Шамсудинович Абдулмуталибова. – И лишанлу серенжем республикадин суваррин официальный календардик кутунва. Сувариз гьазурвилер акунин сергьятра аваз гьар йисуз эпосдин игит Шарвилидин ватан тир Ахцегьа куьчеяр, скверар, общественный дараматар гуьрчегдаказ безетмишзава, республикадин ва федеральный рекьерин къерехар тирвал эпосдин мана-метлеб къалурзавай баннерар, гуьрчег плакатар эцигзава. Суварин юкъуз Ахцегьа культурадин ва спортдин серенжемар тухузва, милли майданар ачухзава, милли хуьрекар гьазурзава, гала-концертар гузва, машгьур спортсменриз, илимдин, культурадин ва искусстводин устадриз, «Шарвили» эпосдин премиядин лауреатриз пулдин призар, къиметлу пишкешар гузва. Ахцегьа тухузвай мярекатра гьар йисуз чи райондин агьалийрини активвилелди иштиракзава. Гьайиф хьи, коронавирусдин инфекциядихъ галаз алакъалу яз цIинин йисуз къадим Ахцегьа игитвилин «Шарвили» эпосдин сувар тухудай мумкинвал хьанач, республикадин оргкомитетдин къарардалди сувар тухун 2021-йисал хутахзава. Эцигнавай сергьятар фикирда кьуналди, алай йисуз Сулейман-

Стальский районда «Шарвили» эпосдин серенжемар онлайн-къайдада кьиле тухузва. Шарвили гьамиша чахъ гала!

Алай йисан 26-июндиз муниципальный районда «Шарвили чахъ гала» акция кьиле фена. Адан сергьятра аваз агьалийриз махсус значокар, «Шарвили» эмблема алай кепкаяр, урус ва лезги чIаларал чеб-чпиз алкIидай чарарал кхьинар авунвай 10 жуьредин призар гана.

Эпидемиологиядин истемишунрал амал авуна тухвай серенжемрин сергьятра аваз райондин Культурадин Дворецдин вилик инсанар кIватI хьана, «Шарвилидиз» талукьарнавай плакатарни гваз рикIел аламукьдай шикилар яна.

«Шарвили чахъ гала» акция муниципальный райондин культурадин отделди (начальник – Майрудин Бабаханов) тешкилнавайди тир. Акцияда райондин администрациядин структурный подразделенийрин, Кьасумхуьруьн поселенидин администрациядин ва Кьасумхуьрел кардик квай Россиядин халкьарин адетрин культурадин Центрадин работникри иштиракна.

«Шарвили» эпосдин сувариз талукьарна райондин печатдин орган тир «Куьредин хабарар» газетдин чинриз эпосдикай, адахъ авай еке метлебдикай кхьенвай макъалаяр, литературадин эсерар гана.

Кьасумхуьруьн телевиденидай алатай йисара Ахцегьа тухвай мярекатар къалур хъувуна, школьникри «Шарвили» эпосдикай, халкьдин къагьриманвиликай шиирар кIелна.

26-июндиз телестудияда игитвилин эпосдиз талукьарна «элкъвей стол» тешкилна. Ана иштиракай РФ-дин писателрин Союздин член, бажарагълу шаир Сажидин Саидгьасанова, РФ-дин журналистрин Союздин членар – «Куьредин хабарар» газетдин отделрин заведующияр тир Абидин Камилова ва Хазран Кьасумова эпосдикай, ам кIватI хъувун ва халкьдал агакьарун патал зегьмет чIугур алимрикай, шаиррикай, гьар йисуз Ахцегьа сувар тухуник пай кутазвай Шарвилидин невейрикай метлеблу рахунар авуна, чпи эпосдиз бахшна кхьенвай шиирар кIелна.

Райондин образованидин, культурадин ва спортдин идарайра «Шарвили» эпосдиз талукьарнавай эсерар хъсандиз кIелунай конкурсар, «Шарвилидин къамат» лишандик кваз шикилар чIугунай конкурс тухвана, ктабрин выставкаяр акъудна, спортдин акъажунар тешкилна. ИкI, райондин центральный библиотекада тухвай мярекатда школьникри активвилелди иштиракна, эпосдикай чи шаирри кхьенвай эсерар кIелна.

Алкьвадрин хуьруьн библиотекадин заведующий Лаура Шабановади «Шарвили» эпос тарихдин къимет авачир гуьмбет я» край чирдай мярекат тухвана, ктабрин выставка ва стенд акъудна, библиотекадин кIелдайбуру «Шарвили» эпосдикай, къагьриманвиликай шиирар кIелна.

Райондин педработникрин, школьникрин, аялрин бахчайрин тербиячийрин арада шиирар кIелунай, эпосдикай ихтилатар авунай онлайн-флешмобар, «Шарвилидин гужлу рангар» шикилар чIугунин конкурсар кьиле тухвана.

Районда, библиотекайра, образованидин идарайра «Шарвили» игитвилин эпосдиз талукьарна тухвай серенжемрикай материалар социальный сетра ганва.

Къейд авун лазим я хьи, игитвилин «Шарвили» эпос – им лезги халкьдин уьмуьрдин къакъудиз тежер пай я, ам галачиз милли культура вилик тухун фикирдиз гъиз хьун четин я. «Шарвили» эпос – им лезги халкьдин надир тир тарих къалурзавай «гуьзгуь», лезги халкьдин фикиррин суьрет я. Идахъ галаз алакъалу яз чакай гьар сада чпихъ къимет авачир эпосдикай кхьенвай эсерар жегьил несилдал агакьарун патал вири къуватар эцигун, абурукай жегьил несил тербияламишунин карда бине, диб авун лазим я.

Эхь, «Шарвили» чахъ гала ва ам чаз гьамиша герек я.

Текст кхьейди ва шикил ягъайди Хазран Кьасумов я