Меню
6+

Сетевое издание «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Хизандин, кIанивилин ва вафалувилин Югъ КIанивални вафалувал хьайила

Хизан обществодин бине я.

Гьуьрметлу, вафалу, общество патал менфятлу хизан хьун, алава яз, бахтлувал язни гьисабиз жеда. Хизандин бинеяр хуьзвайди, са шакни алачиз, кIанивални вафалувал я. Хизан датIана государстводин къаюмвиликни ква. Вири и ерияр фикирда куьналди ва Россиядин Федерациядин Государственный Думадин депутатрин теклифдалди 2008-йисалай чи уьлкведа Вирироссиядин хизандин, кIанивилин ва вафалувилин югъ 8-июлдиз сувар хьиз къейдзава. И сувариз талукь яз «КIанивиляй ва вафалувиляй» («За любовь и верность») медални акъудна. Ам 25 йисалай тIимил тушиз санал яшамиш жезвай хизандин руьгьдин ивирар, хизандин кесер хуьзвай ва обществодин лайихлу членар яз веледар тербияламишай хизанриз гузва. Алай йисуз «КIанивиляй ва вафалувиляй» медалар къачур бахтлу хизанрин арада Сулейман-Стальский райондай тир Алиеврин ва Аслановрин кьве хизанни ава. ИкI, Кьасумхуьрелай тир Али ва Жамила Алиевар арада кIанивал, вафалувал аваз, рикIерни сирер сад авуна санал яшамиш жез 43 йис я.

Сийидрин хуьряй тир Аслан ва Майисат Аслановри алай йисуз санал яшамиш хьун 47-сеферда къаршиламишна. Кьве хизанни мягькем бинейралди, ислягьвилелди, меслятвилелди тафаватлу жезва, абуруз хуьрера ва районда лайихлу гьуьрмет, авторитет ава.

Дагъустан Республикадин зегьметдин ва социальный жигьетдай вилик финин министерстводин «КIанивиляй ва вафалувиляй» медалар Алиеврин ва Аслановрин хизанрив шад гьалара «Сулейман-Стальский район» муниципальный райондин Кьил Нариман Шамсудинович Абдулмуталибова вахкана, тебрикдин келимаяр, хизанрихъ мягькем сагъламвал, дуланажагъдин хъсанвал, саналди тир яргъал йисарин уьмуьр хьана кIанзавайди лагьана.

- Мягькем хизан – им обществодин цуьк акъудунин бине ва мягькемвал къалурзавай лишан я, — къейдна Нариман Абдулмуталибова. – Фадлай тайин хьанвай кар я хьи, хизанди руьгьдин къиметлувал арадал гъуниз ва хуьниз куьмекзава, хизан кIанивилин ва хъсанвилин, гьуьрмет авунин, меслят хьунин чешме я.

Хизандин тербия гунин жигьетдай чи райондихъ лап хъсан адетар ава. Зи мурад и адетрилай жезмай кьван гзаф хизанри, санал яшамиш жезвай гъуьлуьни папа чешне къачун я. Къуй чи хизанри са меслятдал атунин, сабур авунин, дурумлувилин жигьетдай ва хизандин кIанивилихъ, вафалувилихъ галаз алакъалу тир маса месэлайрай къе чна медалар вахкай Алиеврин ва Аслановрин хьтин хизанривай тежриба къачурай. Райондин руководстводи къенлай кьулухъни хизандин девлетлувал хуьн патал герек серенжемар кьабулда ва абур раиж авуниз кьилин фикир гуда. Чна винидихъ лагьайвал, санлай обществодин хьиз, гьуьрметлу ва мягькем хизанар чи райондин даяхни, дамахни я. Абуру хизанда, школада ва обществода акьалтзавай несилдиз дуьз тербия гуниз куьмекзава.

Али ва Жамила Алиевар, Аслан ва Майисат Аслановар лап куьруь гафар рахана. Дикъет ва къимет гунай абуру райондин Кьил Нариман Шамсудинович Абдулмуталибоваз рикIин сидкьидай чухсагъул лагьана, сагълам обществодин асул бине хизан тирдал чпин разивал къалурна.

Хазран Кьасумов

Шикилра: медалар вахкузвайла

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1