Хийирлу меслятар

Чугъундурар

И майва яру ранг алайди я. Вични фосфордин ва калийдин кьелерни квайди, марганецдалди девлетлуди. Чугъундуррин дувулрик кьетIен шейэр — бетанин ва бетаин ква.

ФИКИР ЦЕ! Чугъундурриз нитратар чпел кIватдай чемпион лугьузва.

Афнияр

И майвади иштягь ачухзава, ягълудин шейэр иливаруниз куьмекзава.

Абурук акьван витаминар квач, амма минеральный кьелер, фосфор, кальций, магний, ракь гзаф ква.

Абуруни бедендикай артухан яд ва кьел хкудзава. Таза афнийрик тартроновый кислота лугьудайди ква. Адани углеводар ягълудиз элкъуьрунин кIвалахдин вилик пад кьазва. Гьаниз килигна афнияр бедендиз гзаф хийир авай шей яз гьисабзава.

КIвалин шартIара таза афнияр кьве суткадилай, 1-3 градус чимивал авай чкада 20 йикъалай виниз хвена кIандач.

Кьелен цик квай афнияр фад хъуьтуьл жеда ва абурухъ хъсан дадни амукьдач. Абур кутунвай целни мурс акьалтда.

Мурс акьалт тавун патал горчица вегь.

Помидорар (томатар)

Помидоррик С витамин ква. Гьам лимонрикни квайди я — гена, В1, В2, каротин, шекер, ракь, калийни.

Абурукай гзаф уьзуьрриз дарман жезва.

Тайинарнавайвал, датIана хуьрекдик кваз помидорар ишлемишзавай итимрик рак азар тIимил акатзава, гена маса уьзуьрарни.

Помидорар варзни зура хуьз жеда. И кар патал таза майваяр ящикра ва я маса къапара мичIи къайи чкада тумар виниз хкажна хвена кIанда. Ара-ара абуруз килигиз, хъсандиз дигмиш хьанвайбур хкудун герек я.

Эгер помидорар хъсандиз амукьна кIанзаватIа, абур кIарасдин шуьткьвелралди кIевайтIа хъсан я.

Хъсандиз дигмиш хьанвай помидорар адетдин шартIара 2-3 юкъуз, холодильникда 7 юкъуз хуьз жеда. Анжах холодильникда абурун дад квахьда.

ФИКИР ЦЕ! И майвайрин къацу чкайрихъ чIуру затI соланин хьун мумкин я.