Меню
6+

Сетевое издание «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Лацу халат алайбур|Пешедиз вафалувал къалуруналди

Духтурвилин пеше герекди, гьуьрметлуди, гьа са вахтунда, гзаф четинди тирди виридаз чизва.

Духтурвилин пеше герекди, гьуьрметлуди, гьа са вахтунда, гзаф четинди тирди виридаз чизва. Духтур гьар са касдиз, мус хьайитIани, эверай гьай я. Коронавирусдин инфекция чкIай, инсанрин сагъламвал хаталувилик акатай вахтунда медицинадин хилен работникри, чпин пешедиз, Гиппократан кьинез вафалувал къалуруналди, югъ-йиф талгьана намуслудаказ зегьмет чIугуна, цIудралди инсанар хаталу инфекциядикай хвена. И келимаяр чавай Сулейман-Стальский райондин здравоохраненидин работникрикайни лугьуз жеда. Четин вахтунда абурун дурумлу зегьмет къалурун яз чавай ихьтин мисалар гъиз жеда: Дагъустан Республикадин Кьил Владимир Васильеван Указдалди райондин центральный больницадин терапевтический отделенидин заведующий Эльвира Мирзехановадиз, врач-терапевт Измира Гьабибовадиз «Дагъустан Республикадин лайихлу духтур» лагьай гьуьрметдин тIварар, райондин центральный больницадин кьилин духтурдин везифаяр тамамарзавайди тир Жафер Къурбанисмаловаз Дагъустан Республикадин Гьуьрметдин грамота гана, муниципалитетдин 337 медработникдиз Чухсагъул малумарна.

Мадни, коронавирусдин инфекция чкIанвай вахтунда галатун тийижиз зегьмет чIугунай райондин 6 медработникдиз райондин Кьил Нариман Абдулмуталибован патай тIвар кхьенвай сятер ва Чухсагъулдин чарар, 210 кас медработникдиз меценат Салман Бабаеван ва «Рычал-су» минеральный ятар акъуддай заводдин патай гьевеслу жедай пулунин такьатар гана.

Дагъустан Республикадин Кьил Владимир Васильеван Указдалди Чухсагъулдин чарар ганвайбурун арада ДаркIуш-Къазмайрин фельдшервилинни акушервилин амбулаториядин заведующий Агъарагьимов Агъаверди Агъарагьимовични (шикилда) ава. Награда вахкайдалай ва хуш келимаяр лагьайдалай гуьгъуьниз, райондин центральный больницадин кьилин духтурдин везифаяр тамамарзавайди тир Жафер Къурбанисмаилова чаз Агъаверди Агъарагьимовакай газетдиз макъала кхьинни теклифна.

Фельдшервилинни акушервилин пункт (ФАП) ДаркIуш-Къазмайрин юкьвал ала, школадин къаншарда ава. «Кавказ» шегьредилай ФАП-дал кьван фенвай кьилин куьчеда къир цанва. ФАП-дин дараматни кутугайди я, ана михьивал, къайда ава, экуь я. Чи ихтилатни гьана кьиле фена.

Малум хьайивал, Агъаверди Агъарагьимова 1985-йисуз хуьруьн юкьван школа лап хъсан къиметар аваз акьалтIарна, совхозда рабочивиле кIвалахна, 1986-1987-йисара Советрин Армиядин жергейра къуллугъна.

Гьеле школада кIелзавай йисарилай рикIе духтур хьунин къаст авай Агъавердиди са йисуз Дагъустандин медицинадин институтдин гьазурлухвилин отделенида кIелна.

1989-йисуз А. Агъарагьимов Дагъустандин медицинадин университетдик экечIна ва 1995-йисуз анаг хъсан чирвилер къачуналди акьалтIарна. Са йисуз Дербент шегьердин центральный больницада интернатура фейидалай гуьгъуьниз Агъаверди ДаркIуш-Къазмайрин ФАП-дин заведующийвиле тайинарна. Жегьил руководителдин еке чалишмишвилер себеб яз, хуьруьнвийрин игьтияжар ва вахтунин истемишунар фикирда кьуна, 1997-йисуз врачебный амбулатория фельдшервилинни акушервилин пунктуниз элкъуьрна. Анин дараматни гегьеншарна, медработникриз кIвалахдай кутугай шартIарни яратмишна, ФАП-дин материально-технический база мягькемарна.

Чаз ихьтин са карни якъин хьана: А. Агъарагьимов и хуьре медицинадин рекьяй кьилин образование къачур сад лагьай кас я.

- Агъаверди Агъарагьимович, халкьдиз гуьзлемишни тавур писликвилер гъайи коронавирусдин инфекциядикай гьич рахазни кIанзавач. ЯтIани хабар кьун тавуна жедач: адан нетижаяр хуьре гьихьтинбур хьана?

- КIвалах артухарна, инсанрал гьар са карда сергьятар, къадагъаяр эцигна. Коронавирусдин инфекция чкIун себеб яз чна хуьре алай йисан 27-мартдилай ахтармишунар тухуз башламишна. Адан нетижада 12 кас кIвалера ва са кас стационарда сагъар хъувуна. Инфекциядик рагьметдиз фейи ва алай вахтунда адак начагъзавай кас хуьре авач. ЯтIани чи медработникри игьтият квадарнавач, инфекция чкIунин вилик пад кьадай серенжемар тухузва, чи медработникар халкьдин арада ава.

А. Агъарагьимова чаз лагьайвал, ФАП-да 8 кас медицинадин работникри кIвалахзава. Коронавирусдин инфекциядин вахтунда абуру вирида югъ-йиф талгьана, галатун тийижиз зегьмет чIугуна, инфекциядикай цIудралди хуьруьнвияр хвена. Абуруз аферин ва баркалла.

Фельдшервилинни акушервилин пунктунин работникри 2500 касдиз медицинадин рекьяй къуллугъзава. 14 йисал фидалди яшда авай 568 аял, кIвачел залан дишегьлияр, набудар тир ва гзаф яшар хьанвай инсанар духтуррин кьетIен гуьзчивилик ква. ФАП дарманралди, герек маса шейэралдини таъмин я.

ДаркIуш-Къазмайрал командировкада авайла чна хуьруьнвийрихъ галазни ихтилатар авуна, А. Агъарагьимовакай абурун фикирар чирна.

- Квез вуч аватIа чидани, Агъаверди Агъарагьимович хьтин нисанрикай, духтуррикай рахадайла, лугьуз жеда хьи, ам духтур хьун патал Худади халкьнавайди я, — лугьузва пенсияда авай муаллим, лезги писателрин Союздин член Эйзудин Сайдумова. — Дарманрикай, рапарикай хьиз, Агъавердидин кьезил гъиликай, ширин мецикайни начагъ касдиз чара-дава жезва. Ам неинки и хуьре, гьакIни дагъдин куьгьне ДаркIушрин хуьре яшамиш жезвай инсанрин сагъламвал хуьнин къаравулдани уях яз акъвазнава. Вичин хиве авай везифайрив рикI гваз эгечIзавай Агъаверди Агъарагьимовичаз даркIушвийри аферин ва баркалла лугьузва. Къуй адан гъиликай вирибуруз куьмек хьурай.

Агъаверди Агъарагьимови-чан кIвалахдин гьар са югъ, хуьруьнвийри лугьузвайвал, 24 сятиникай ибарат я. Адан, гьакIни амай медработникрин намуслу зегьметдин нетижа яз, хуьруьн ФАП райондин медицинадин лап хъсан идарайрин арада ава.

2010-йисалай А. Агъарагьимов Дагъустан Республикадин здравоохраненидин отличник я. Адахъ гьакIни намуслу зегьметдай ганвай РФ-дин здравоохраненидин министерстводин, «Красный крестдин» обществодин, райондин центральный больницадин руководстводин Гьуьрметдин грамотаяр ава.

- Жуван кIвалахдилай хуьруьнвияр рази, жуван гъиликай начагъ касдиз дава-дарман хьун – им зун паталди виридалайни чIехи награда я, — лугьузва А. Агъарагьимова.

Чаз малум хьайивал, духтурвал и хизандин пеше я. Медицинадин училище акьалтIарнавай Агъавердидин уьмуьрдин юлдаш Ниябат Абдужалиловнадини хуьруьн фельдшервилинни акушервилин пунктуна регистратор яз кIвалахзава.

Ич ичин тарцивай яргъаз аватдач, лугьузва бубайрин камаллу мисалда. Агъаверди ва Ниябат Агъарагьимоврихъ 4 руш ава. Абурукай са руша – Ифриза – педагогический институт акьалтIарна, акьалтзавай несилдиз чирвилер ва тербия гузва. Амай рушар диде-бубадин пешедал ашукь хьанва. ИкI, медучилище акьалтIарнавай Миланади Хив райондин Фригърин хуьре участковый медсестра яз кIвалахзава. Наимади Саратов шегьердин медицинадин университетдин педиатрический факультетда (6-курсуна) кIелзава. Лап хъсан къиметар аваз 11-класс акьалтIарнавай Сиясатан къастни Саратовдин медуниверситетдик экечIун я.

И макъала кхьидайла чи рикIел райондин Кьил Нариман Абдулмуталибова медработникрив муниципалитетдин грамотаяр вахкудайла лагьай гафарни хтана: «Пандемиядин вахтунда агьалийрин сагъламвал хуьн чи виридан умуми кардиз элкъвена. Вири четинвилериз дурум гана, коронавирусдин инфекциядихъ галаз женг чIугвадайла, медработникар вилик жергейра хьана, чи агьалийрин сагъламвал хуьн, гьатта абур ажалдин къармахрай акъудун патал абуру намуслудаказ зегьмет чIугуна. Им пешедиз вафалувал къалурун, халис игитвал я».

Вири медработникриз хьиз, и келимаяр Агъаверди Агъарагьимовазни хас я. Къе медработникриз вири махлукьатди чухсагъул лугьузва.

Асият Мирзалиева, ДР-дин культурадин лайихлу работник.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

39