Культурадин уьмуьр Шаиррин гуьмбет ачухна

И мярекат ДР-да авай МВД-дин дараматдин вилик квай аллеяда Дагъустандин маса чIехи шаир ва писатель Гьамзат ЦIадасадиз хкажнавай гуьмбетдин патав кьиле тухвана. Шаиррин гуьмбет шад гьалара ачухунин мярекатда Дагъустандин Гьукуматдин Председатель Артем Здунова иштиракна.

И монументдин авторар Дагъустандин скульптор, Россиядин Федерациядин лайихлу художник Али Мегьамедов ва адан хва Мегьамед я. Абуру и монумент арадал гъун патал зур йисуз кIвалахна. Паркунин композиция куьгьне дуст Гьамзат ЦIадасадин патав атана ацукьна, чпи-чпихъ галаз суьгьбетзавай кьве касдин гуьмбетрикай ибарат я. И композиция ачухунин фикир аллея цIийика туькIуьр хъийидайла Дагъустандин халкьдин шаирар рикIел хуьнин, гьакIни акьалтзавай несил руьгьдинни ахлакьдин ва ватандашвилинни патриотвилин рекьерай тербияламишунин мурад кьилиз акъудун тир.

ДР-дин Гьукуматдин Председателди гуьмбет эцигунин месэла къарагъарунай къенепатан крарин министерстводиз чухсагъул лагьана .

«Дагъустандин халкьдин шаирар неинки Россияда, гьакI адалай къецени чизва. Чна суварар тешкилдайла чиниз гзаф кьадар мугьманар, туристар къвезва. Абур Дагъларин уьлкведин алатай чIехи тарих чириз алахъда. Дагъустан гьамиша мугьманар хушвилелди кьабулдай чка я. Къе анаг мугьманар атунал вил алай шаирралди эвеззава. Ихьтин гъвечIи вакъиайралди чна Дагъустан ачухарзава», — къейдна Артем Здунова и кIвалахдихъ галаз алакъалу тир вирибуруз чухсагъул лугьуналди.

Вичин нубатдай и композициядикай рахадайла Абдурашид Мегьамедова алава хъувуна: «Ибур, — лагьана ада, — уьмуьрдин четин рехъ фейи кесиб ксар тир. Абурун къаматда чи халкьдин къуват, поэзия, кIанивал ва сада-садаз гьуьрмет авун кIватI хьанва».

Шадвилин мярекатдал гьакIни Махачкъала шегьердин кьил Салман Дадаев, Дагъустандин писателрин Союздин председатель Мегьамед Агьмедов ва гьакIни и шаиррин аялар, хтулар ва птулар рахана.

Гуьмбет ачухун адал цуьквер эцигуналди акьалтI хьана.