Сагълам уьмуьр патал Шад гьалара ачухна

И йикъара СтIал Сулейманан райондин Гуьне пата чIехибурукай сад тир Шихидхуьре мини-футболдин ва валейболдин спортдин майданар шад гьалара ачухна. Чкадин теклифар (инициативаяр) хуьнин проектар уьмуьрдиз кечирмишунин сергьятра аваз эцигнавай спортдин майданар ачухунин шадвилин мярекатда муниципальный райондин Кьил Нариман Абдулмуталибова, депутатрин райондин Собранидин председатель Штибег Мегьамедханова, райадминистрациядин жавабдар работникри, «Касумкентское СМУ» ООО-дин генеральный директор Загьир Гьажимирзоева, хуьруьн агъсакъалрин Советдин председатель Къурбансмяли Пирвелиева, какахьай къайдадин женгерин акъажунрай 3 сеферда дуьньядин чемпион Зубаир Келбялиева, Кьасумхуьруьн СМУ-дин векилри, хуьруьн агьалийри ва общественностди иштиракна.

Спортдин майданар ачухарунин лишан яз яру лент гьуьрметлу мугьманри ва Шихидхуьруьн юкьван школадин аялри шад гьалара атIана.

Анал сифтегьан тебрикдин гаф рахай райондин Кьил Нариман Абдулмуталибова Гуьнепатан зонадин агьалийри сагълам уьмуьр кьиле тухун, азад вахт менфятлудаказ ишлемишун патал и спортдин тадаракрин важиблувал къейдна.

Спортдин майданар ачухун тебрик авунихъ галаз санал Нариман Абдулмуталибова анаг жегьилар санал агуддай центр гила райондин Гуьне патан зонада тренировкаяр кьиле тухудай,спортдин акъажунар, шадвилин мярекатар тешкилдай мумкинвал жедайди лагьана.

«Спортдин майданар ачухун райондин Гуьне патан гзаф хуьрер патал важиблу вакъиа я. Абур чкадин инициативайрин тереф хуьнин проектдин бинедаллаз эцигнавайбур я. Умуми къуватар сад авуналди, чавай гзаф кIвалахар кьилиз акъудиз жеда. И спортдин майдан чи районда арадал гъанвай 6-спортдин тадарак я. Мукьвал тир гележегда спортдин майданрин патарив аялрин гъвечIи майданар галай паркарни арадал къведа. ГьакIни Кьасумхуьрелай 2 АСП ва 7 хуьр авай Гуьне патаз 2 километрда, Испикрин хуьруьн кьилин куьчедани 1,5 километрда къир цада», — къейдна райондин Кьил Нариман Абдулмуталибова.

Спортдин майданар ачухунин гьуьрметдай и юкъуз мини-футболдай Шихидхуьруьн ва Испикрин хуьруьн гуьгьуьллу командайрин арада турнир кьиле тухвана. Адан иштиракчийриз кубокар, медалар, грамотаяр ва пулдин пишкешар гана.

Шихидхуьре спортдин имаратар ачухунин кардиз республикадин бюджетдай 4850363 манат пул ахъайна. И проектдиз алава пул ахъаюнин карда «Завод минеральных вод «Рычал-су» ОАО-ди (300000 манат), СтIал Сулейманан район социальный жигьетдай вилик тухунин Фондуни (300000 манат) куьмекар гана. И объектар эцигунин кардиз харж авур пулунин такьатрин умуми кьадарди 5,6 млн. манат тешкилна.

Эцигунрин кIвалахрин подрядчик «Касумкентское СМУ» ООО тир.

Спортдин ихьтин имарат эцигунай Шихидхуьруьн жемятди Дагъустандин Кьил Владимир Васильеваз, райондин руководстводиз, меценатриз ва гьакIни спортдин майданар эцигзавайбуруз чухсагъул лагьана ва чпин разивал къалурна.