Метлеблу гуьруьшар

Нетижада чилин участокар чпи-чпиз кьунихъ галаз алакъалу яз 2019-йисуз Герейханован хуьруьн поселенидин территорияда эцигунрин нормаяр ва къайдаяр чIуруналди тухвай 44 высоковольтный электропередачайрин линияр тайин мензилдиз хутахунихъ галаз алакъалу ва маса чIуру гьалар дуьздал акъудна.

Гуьгъуьнлай райадминистрацияда райондин Кьил Нариман Абдулмуталибова тухвай совещанидал электропередачайрин высоковольтный линияр автомагистралдивай яргъа авуниз ва капитальнидаказ ремонт ийизвай «Мамрач-Ташкапур-Араканский мост» автомобилрин рекьин 4км.-10км. участок вахтунда ишлемишуниз вахкунин ва ахтармишунрин вахтунда малум хьайи кимивилер арадай акъудунин месэлайриз килигна.

Совещанидин кIвалахда райондин депутатрин Собранидин Кьил Штибег Мегьамедханова, «Эмералд проект» ООО-дин генеральный директор Мегьамед Мегьамедова, Дербентдин «Дорожно-строительное управление №3» ОАО-дин гендиректордин заместитель Муталиб Эмсетова, «Дорсервис-09» ООО-дин гендиректордин

заместитель Камалдин Атагишиева, «Дагестанавтодор» ГКУ-дин руководителдин заместитель Ханмегьамед Рагьимова, «Дагестанавтодор» ГКУ-дин ОР-дин ва СТД-дин начальникдин заместитель Гьажибег Гьажибегова, Кьасумхуьруьн РЭС-дин кьилин инженер Марат Шамхалова, «Сулейман-Стальское ДЭП №32» ОАО-дин начальник Икзамудин Бремова, райадминистрациядин АС-дин ва ЖКХ-дин отделдин начальник Хейрулагь Сефералиева ва Герейханован хуьруьн поселенидин администрациядин кьил Руслан Алдырова иштиракна.

Совещанидал заказчикдин ва подрядный организациядин векилри са бязи месэлайрай, кьилди къачуртIа, рекьин къерех тирвал 1,1 километрдин яргъивал аваз тротуар эцигун патал 44 ЛЭП проектдихъ галаз кьадайвал тайин мензилдиз хутахунин месэлайрай 25-августдалди тади серенжемар кьабулун лазим тирди къейдна.

И месэла райондин Кьил Нариман Абдулмуталибова вичин хивез къачуна, совещанидал ада талукь къуллугъриз тапшуругъарни гана.

Совещанидал жуьреба-жуьре маса месэлайризни килигна.

***

Райондин Кьил Нариман Абдулмуталибов, Дагъустан Республикадин МВД-дин далу патан начальник – къенепатан къуллугъдин полковник Сефедин Эмирбеков ва ДР-дин къенепатан крарин министрдин заместитель – къенепатан къуллугъдин полковник Агьмед Бабалиев Сулейман-Стальский районда ОМВД-дин цIийи дарамат эцигзавай гьалдихъ галаз таниш хьана.

И месэла веревирд авур совещанидин кIвалахда гьакIни райадминистрациядин, РОВД-дин ва подрядный организациядин векилри иштиракна.

Районда ОМВД-дин типовой къайдадин цIийи дарамат РФ-дин МВД-ди къенепатан органрин отделар патал цIийи дараматар эцигунин ва авайбур цIийикIа туькIуьр хъувунин программадай эцигда. И кар патал райадминистрацияди Агъа-СтIалрин хуьруьн поселенидин территориядал, республикадин шегьре рекьин патав, 1,4 гектар чил чара авунва. Дарамат 2 йисан къене эцигна акьалтIарда.

Райондин Кьил Нариман Абдулмуталибова райондин полициядин отдел патал цIийи дарамат эцигунихъ еке метлеб авайди къейдна, ДР-дин МВД-диз чухсагъул малумарна ва эцигунрин кIвалахра куьмек гун хиве кьуна.