Меню
6+

Сетевое издание «Кюре»

03.08.2020 11:10 Понедельник
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

ЧIехи Гъалибвилин - 75 йис |Абидин Камилов |ГАФУНИН КЪУВАТ

ГАФУНИН КЪУВАТ

(гъвечIи сегьне)

Иштиракзавайбур:

1. Ведущий.

2. Камал буба — дяведин ветеран.

3. Беневша — 4-классдин ученица.

Ведущий: ЧIехи Гъалибвилин суварин вилик мектебда аялрихъ галаз гуьруьшмиш хьайи Ватандин ЧIехи дяведин ветеран, инвалид Камал буба хуьруьн юкьвай фенвай рекьин къерехда цIийиз кутунвай паркунин юкь кьуна, сад хьиз плитаяр тунвай чкадай гъиле авай аса чиле акIуриз-акIуриз, аялрихъ галаз хьайи гуьруьшмишвал, вичиз гайи суалар рикIел хкиз, яваш-яваш камаралди винелди, вичин кIвал галайвал, хъфизва. Адан гуьгъуьналлаз школадай тарсар куьтягь хьанвай 4-классдин ученица Беневша, школадин патав гвай туьквендай къачур чипсияр нез-нез, хуьквезва.

Пакет ичIи хьайила, ада яшлу касдиз ван къведатIа чирун патал, пакета ял туна, адан кIуф алчударна кьуна, кьулухъай адав агатна, пакет кьве капашдивди яна, хъиткьинарда. Бейхабар ван галукьай яшлу ветеран, садлагьана гадар хьана, кьулухъди элкъвена, килигда.

Вич-вичивай квахьна, чин яру хьанвай гъвечIи руш ва чилел гадарнавай пакет акурла ам гьасятда кардин гъавурда акьуна.

Камал буба: — Я бубадин Беневша цуьк, зун дяведа а кьиткьинай кьван бомбайринни снарядрин ванерикай михьиз икрягь хьанвайди я, вуна зи зайиф хьанвай рикI мад къарсурна хьи.

Беневша: — Вуна заз багъишламиша, буба, за ада ихьтин еке ван ийида лагьана фикирначир. Ваз зи тIвар Беневша ятIа гьинай чир хьана?

Камал буба: Я бубадин, ви вили вилери, курквачI хьтин вал алай перемди вун халис Беневша цуьк хьиз къалурзава.

Беневша: — Агь, буба, за са карни авачиз ви кефи хана, вуна, лагьайтIа, зи тарифарзава...

Камал буба: — Эй, бубадин, чунни са вахтара аялар яз хьайиди я. Надинжвилер, сарсахвилер вири аялриз хас я. Уьмуьр гьакI туькIуьр хьанвай затI я. Зун вакай инжиклу туш.

Ви гафарай, ви вилерай аквазвайвал, вун акьуллу руш я. Мад зун хътин яшлу ксарикай — дяведин ветеранрикай ихьтин зарафатар ийиз кIан жемир. Чун, дяведин цIаяр акур инсанар, куьчеда са аялди гадарай, исятда туьквенрай гузвай, хъиткьинардай са шейинин ван атайлани, цавари къукърумар авурлани ахварайни кваз гадар жезвайбур я. Къуй квез ахьтин бедбахтвилер такурай, куь кьилел ислягъ цав, суфрадик недай бул фу хьурай, зи балаяр!

Гила фена, къегьалди хьиз, вуна агъанал гадарай пакет вахчуна, атIа рекьин къерехда чи вилик квай зирзибил гадардай ящикдиз вегь.

Беневша: — Я буба, чилелай са-са чар кIватIиз кьиле фидайди яни? И паркунай гъар юкъуз хьайи мусор, калерин фитерни кваз, са халади, гъиле кулни хекендас ва мешок аваз, гьар пакамахъай михьзавайди я.

Камал буба: — Ваъ, бубадин, акI жедач. Садавай я кIвале, я куьчеда, я хуьре михьивал хуьз жедайди туш. Михьивал чна гьар сада хуьн герек я. За ваз са ихьтин мисал гъида: Дяве башламиш жедалди вилик за Прибалтикадин са шегьерда армияда къуллугъзавай. Захъ галаз шегьерда санал къекъвезвай са урус гадади пIапIрусдиз цIай яна, спичкадин кьал чилел гадарна. Патавай физвай са шегьерэгьлиди адаз туьнбуьгь авуна ва а кьал вахчуз туна, патав гвай урнадиз вегьез туна. ГьакI я, бубадин, эгер ваз кагьул ятIа, ам за вахчуда.

Беневша: — Ваъ, я буба, айиб тушни? Ам за вахчуда.

Камал буба: — Ма, бубадин зи гафуниз яб гунай, и шоколаддин плитка зи патай ваз савкьват, анжах чар чилел гадариз тахьурай.

Беневша: — Чухсагъул, мад за чилел са чарни гадар хъийидач. Ви чан сагърай буба, ваз алукьзавай Гъалибвилин сувар мубаракрай!

Камал буба: — Чухсагъул. Куьнни бахтлу хьурай, дуьнья ислягь хьурай куь кьилел, бубадин пIарлаяр!

Ведущий: — Ягълухдалди вилерал алай накъвар михьиз -михьиз, ветеранди вичин рехъ давамарна.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

11