Салман Мегьамедрасулович Бабаеван 65 йис | Дережа кьакьан я, рикI – михьи

1. Халкьдин кьегьал

хва

«РикI михьи инсан вирт авай куьнуь я: вири адал алтIуш жеда. Халис игитдиз вичин викIегьвиликай хабар жериди туш; адан игитвал кьатIудайбур несилар я…» — кхьенай шаир ва фольклорист Забит Ризванова вичин «Весида».

КIеве гьатайла жуван хайиди тир райондин агьалийриз куьмекдин гъил яргъи авун, кутугай школа авачир вичин хайи хуьре алай аямдин школадин чIехи дарамат эцигиз гъиле кьун, ватанэгьлийрин гьарайдиз гьар сеферда «гьай» лугьун – бес им викIегьвал тушни?!

Чи суьгьбет Сулейман-Стальский райондин баркаллу рухвайрикай сад тир Салман Мегьамедрасулович Бабаевакай я. «Инсан», «Ватанперес» — С. Бабаевакай рахадайла и гафар чIехи гьарфунилай кхьиниз лайихлу я.

Коронавирусдин инфекциядихъ галаз женг чIугунин карда куьмек хьун патал Салман Мегьамедрасуловича вичин хсуси такьатрикай 5 миллион манат Сулейман-Стальский райондиз гана. И такьатрихъ ЦРБ-диз медицинадин рекьяй лап чарасуз герек аппаратура ва маса шейэр къачуна, духтурриз гьевеслу жедай мажибар гана.

Агъа-СтIалрин Къазмайрал алай школадин дарамат лап куьгьнеди тир. ЦIийиз эцигиз гъиле кьур школадин дараматни хандакIрилай винелди хкаж хьанач. Куьмекдиз Салман Мегьамедрасулович атана: ада вичин пулунин такьатрихъ ина 400 кIелзавайдан чкаяр авай алай аямдин школадин пуд мертебадин дарамат эцигзава. КIвалахарни хъсан еришар аваз кьиле физва. ЦIийи школа 2021-йисуз ачухун пландик кутунва.

- За Салман Мегьамедрасуловичал дамахзава, — лугьузва муниципальный райондин Кьил Нариман Шамсудинович Абдулмуталибоваа. – Ада райондиз гьамиша куьмекар гузва. Салман Мегьамедрасулович халкьдин кьегьал хва я!

Мергьеметлу кIвалахрай С. М. Бабаеваз райондин Кьил Н. Ш. Абдулмуталибова ва райондин центральный больницадин «Тади куьмекдин», терапевтический отделенийрин, поликлиникадин, инфекционный госпиталдин коллективри ва участковый звенодин медперсоналди Чухсагъулдин чарар кхьена.

С. М. Бабаевакай рахадайла, рикIел Дагъустандин халкьдин шаир Майрудин Бабаханова кхьенвай цIарар къвезва:

… Заз инсанар акуна

Ракъини хьиз нур гудай,

Ризкьи дардаз – фан тике,

Чка дардаз хур гудай.

2. Уьмуьрдин рекьер

Салман Бабаев районда ва адалай къеце гзафбуруз мукьувай хъсандиз таниш я. Мукьувай течирбуруз адакай, ада ийизвай хийирдин, мергьеметлувилин кIвалахрикай – крарикай ванер хьанва.

Агъадихъ заз чи газет кIелзавайбуруз Салман Мегьамедрасуловичан уьмуьрдин ва зегьметдин рекьикай куьрелди суьгьбет ийиз кIанзава.

С. М. Бабаев 1955-йисан 1-сентябрдиз дидедиз хьана. Ада 1971-йисуз Агъа-СтIал Къазмайрин муьжуьд йисан, 1973-йисуз Герейханован хуьруьн юкьван школа тафаватлудаказ акьалтIарна.

1978-йисуз Хабаровск шегьерда ракьун рекьин улакьрин инженеррин институт акьалтIарай Салман Бабаева вичин зегьметдин рехъ Дальный Востокдин ракьун рекьин Комсомольск-на-Амуре станциядал поезддин къуллугъчидин куьмекчи яз кIвалах авунилай башламишна. Ахпа адакай и шегьердин станциядин дежурный, диспетчер, Комсомольскдин отделенидин поездрин диспетчер хьана. Салман Мегьамедрасуловича вич гьа сифте йикъарилай хъсан чирвилер авай пешекар яз къалурна. Идан нетижа яз ам къуллугъдин гурарай датIана виликдини хкаж хьана. ИкI, Салман Мегьамедрасуловича 1980-1982-йисара кьилин инженервиле, 1982-1986-йисара Комсомольск-Сортировочный, Хабаровск-2 станцийрин, Байкало-Амурский ракьун рекьин начальниквиле кIвалахна.

Лагьана кIанда, Советрин девирда уьлкведа зурба эцигунрикай сад хьайи Байкало-Амурский ракьун рекьел ада жуьреба-жуьре къуллугъар тамамарна: Ургальский отделенидин руководитель, ракьун рекьин начальникдин заместитель, анин начальник.

2002-йисуз С. М. Бабаев РФ-дин МПС-дин (Министерство путей сообщения) къвалав гвай фирменный транспортдин сервисдин центрадин кьиле акъвазна. 2007-йисал кьван «РЖД» ОАО-дин вице-президентвиле кIвалах авур Салман Мегьамедрасулович 2011-йисуз коммерциядин кIвалахдин рекьяй и тешкилатдин вице-премьервиле тайинарна. Жавабдар и къуллугъдал чи баркаллу районэгьлиди та пенсиядиз экъечIай 2017-йисалди гьакъисагъвилелди кIвалахна.

3. Дережа къалурзавай

лишанар

С. М. Бабаеван къуллугъдин рекьикай рахадайла, чна са шумуд чкадал «кIвалахна» гаф ишлемишнава. И гафунин далдадихъ Салман Мегьамедрасуловичан уьмуьрда кьарай татай йикъар, ахвар тахьай йифер, адан зегьметди арадал гъайи «бегьерар» фикирдиз гъун четин туш. Идан гьакъиндай адаз ганвай наградайри ва гьуьрметлу тIварари шагьидвал ийизва. С. М. Бабаев «Знак Почета» ордендин, «Байкало-Амурский магистралдин 30 йис» медалдин, «Россиядин Федерациядин транспортдин лайихлу работник» тIварцIин, «Ракьун рекьин сейли работник», «Ракьун рекьин транспортда гьакъисагъвилелди зегьмет чIугунай» знакрин, 20-дав агакьна Гьуьрметдин грамотайрин сагьиб я.

2010-йисуз «Коммерсантъ» газетди адаз «Транспорт» номинациядай кьуд лагьай чка гана. «РЖД» ОАО-дин кIвалахар вилик тухуник еке пай кутунай, намуслувилелди къуллугъ авунай Салман Мегьамедрасулович компаниядин президентди «РЖД» ОАО вилик тухунин лайихлувилерай» сад лагьай дережадин знакдалди къейдна.

2019-йисан мартдиз С. Бабаев Москвадин «Локомотив» футболдин клубдин директоррин Советдин членвиле хкяна.

… И йикъара чи баркаллу районэгьли, рикI михьи, гъил ачух Салман Бабаеван 65 йис тамам жезва. Чна адаз хайи югъ рикIин сидкьидай мубаракзава. Адахъ чандин сагъвал, яргъал йисарин уьмуьр, кIвалахда, гьар са карда мадни зурба агалкьунар хьун чи мурад я.

Хазран Кьасумов, РФ-дин журналистрин Союздин член

Шикилда: С. М. Бабаев