Бахтлувилин рекье авайди

Инсандикайни гьа икI лугьуз жеда: адани, я вахтуниз, я хъутIалризни килиг тавуна, уьмуьрдин рехъ датIана давамда.

Ингье, вичиз гьахълудаказ муаллимрин хуьр лугьузвай Курхуьрел дидедиз хьайи, республикадин, уьлкведин тIвар дуьньядин майданда машгьур авур алимарни шаирар акъатай Алкьвадрин хуьруьн юкьван школада физкультурадин муаллимвиле кIвалахзавай Агъамирзе Агъамирзоев уьмуьрда 60 йисан рекьиз фенва. Гьа рехъ гьихьтинди хьана?

А. Агъамирзоев 1962-йисан 16-ноябдиз Курхуьрел чпи яргъал йисара производствода гьакъисагъвилелди зегьмет чIугур Шайда Мирзебалаевичан ва Нурат Идрисовнадин чIехи ва гьуьрметлу хизанда дидедиз хьана.

Муьжуьд аял хьайи и хизанда кьве аял гъвечIизамаз регьметдиз фена. Муькуь 6 аял диде-бубади халис зегьметкешар, гъвечIид-чIехид чидай инсанар яз уьмуьрдин шегьредал акъудна.

Курхуьруьн 1-нумрадин юкьван школада 8-класс акьалтIарай Агъамирзе 1977-йисуз З. Батирмурзаеван тIварунихъ галай Хасавюртдин педагогвилин училищедин физический культурадин отделенидик экечIна. Им дуьшуьшдин кар тушир, гьикI лагьайтIа, зиринг гадади школада кIелдай йисара районда кьезил атлетикадай, волейболдай, путар хкажунай тухузвай спортдин акъажунра са шумуд йисуз кIвенкIвечи чкаяр кьунай.

Спортдал машгъул хьун, турнирра иштиракун А. Агъамирзоева педучилищеда кIелдай йисарани давамарна.

1980-йисуз педучилище акьалтIарай жегьил пешекарди вичин зегьметдин рехъ Аламишедин (Эминхуьруьн) юкьван школада физкультурадин муаллимвиле кIвалах авунилай башламишна.

1981-йисан майдилай 1983- йисан майдалди А. Агъамирзоева КIварчагърин хуьре ачухай ял ягъунинни производстводин школьникрин лагерда тербиячи (воспитатель) яз, гуьгъуьнлай 3 йисуз Сардархуьруьн юкьван школада физкультурадин муаллим яз кIвалахна.

1986-йисалай инихъ Агъамирзе Шайдаевича Алкьвадрин юкьван школада вичин рикI алай пешедай кIвалахзава.

- Чи школадиз кIвалахал атай сифте йикъарилай Агъамирзе Шайдаевича вич физический культурадин рекьяй хъсан чирвилер, алакьунар авай муаллим, хъсан тешкилатчи, несигьатчи яз къалурна, — лугьузва школадин директор Гьамид Рашидович Гьамидова. – Адан кIвалахдин нетижа яз школадин командайри ва кьилдин жаван спортсменри районда ва адалай къеце тухузвай турнирра кIвенкIвечи чкаяр кьазва.

А. Агъамирзоевахъ галаз авур суьгьбетдай малум хьайивал, алай вахтунда школада волейболдай, столдин теннисдай ва футболдай секцийри кIвалахзава. Школадин рушарин команда зональный турниррин призер я.

Агъамирзе Шайдаевича школада спортдин рекьяй вердишвилер гайи гадайрикай тIвар-ван авай спортсменар хьанва. Абурукай яз завай грепплингдай Россиядин чемпион, жегьилрин арада ММА-дай Россиядин Кубокдин призер Имам Юсуфован, жегьилрин арада далу кIаникна штанга хкажунай Европадин ва дуьньядин чемпионатрин призер Бугьадин Рамазанован, ушу-саньдадай Дагъустандин чемпион, ММА-дин Комбатдай кубокдин призер, джиу-джитсудай Дагъустандин чемпион Камил Абдурагьманован ва масабурун тIварар кьаз жеда.

А. Агъамирзоева чаз школадихъ галай хъсандиз гьар са шейинив дуьзмишнавай мини-футболдин майдан, гегьенш спортзал къалурна. Муаллим инанмиш я хьи, школадай гележегда машгьур спортсменар мадни акъатда. Ина умуд кутаз жедай гадаярни ава, рушарни.

1993-йисуз Агъамирзе Шайдаевича Дагъустандин Гьукуматдин педагогвилин институтдин физический культурадин факультетни (заочно) кIелна акьалтIарна.

Яргъал йисарин намуслу ва бегьерлу зегьметдай А. Агъамирзоеваз «РФ-дин образованидин Гьуьрметлу работник», «Дагъустан Республикадин образованидин отличник» лагьай гьуьрметдин тIварар гана. Мадни, адаз «Дагъустан Республикадин лайихлу муаллим» тIвар гун патал документар талукь идарадиз ракъурнава.

- Агъамирзе Шайдаевич районда физический культурадин тарсар гузвай лап хъсан муаллимрин жергеда ава, — лагьана чаз райондин образованидин управленидин начальник Гьуьсейн Шихбабаева. – Тежрибалу муаллимди вичин девлетлу тежриба жегьилриз гузва. Мадни, Агъамирзе муаллимди районда кьезил атлетикадай тухузвай акъажунра судьявални ийизва. Гьакъикъатдани, Агъамирзе Шайдаевич вичи хкянавай пешедин устад я. Адан кIвалахдилай чун гзаф рази я, чна адал дамахзава.

Чаз малум хьайивал, А. Агъамирзоев, чешнелу муаллим, хъсан несигьатчи, общественник хьиз, туькIвей, хуьре-кIвале гьуьрмет авай хизандин кьилни я. Ада вичин уьмуьрдин юлдаш Фариза Тажибовнадихъ галаз ферли 3 велед – 2 рушни 1 гада – тербияламишна. ЧIехи руш Сабинади Сийидрин хуьруьн фельдшервилинни-акушервилин пунктунин заведующий яз, Индиради Кьасумхуьрел вичин аптекада, гада Шайдади Санкт-Петербургда кIвалахзава.

Агъамирзе Шайдаевичан 60 йис тамам хьайи юкъуз школадин муаллимрин коллективди чаяр хъвадай са гъвечIи межлисни къурмишнавай. Анални юбилярдиз кIвалахдин юлдашри хуш келимаяр, тостар лагьана.

Школадин директор Гь. Гьамидова мярекатдал Агъамирзе Шайдаевичав райондин образованидин управленидин, образованидин работникрин профсоюздин комитетдин ва школадин дирекциядин Гьуьрметдин грамотаяр, гьакIни школадин муаллимрин коллективдин патай пишкешарни гана.

… «Ашкъидалди кIвалахал физвай ва шадвилелди кIвализ хквезвай инсан бахтлу кас я», — лагьанай туьркерин шаир Надым Хикмета. Зи фикирдалди, тамам 42 йисан къене ашкъидалди кIваляй школадиз кIвалахал физ-хуьквезвай Агъамирзе Шайдаевич Агъамирзоевни бахтлу кас я.

60 йисан юбилей мубарак авуналди, чаз лугьуз кIанзава: ви бахтлувилин рехъ яргъиди ва бегьерлуди хьурай, гьуьрметлу Агъамирзе Шайдаевич!

Хазран Кьасумов

Шикилда: А. Агъамирзоев