Гуьлселем дидедин уьмуьрдин рехъ
Гьар гьина чун хьайитIани яргъара,
Ви тIварцIелди, маякдал хьиз, хуькведа.
Ви лайлайдин ван ама зи япара,
Гьар са чIавуз ви муьгьуьббат екеда.
А. Камилов
1962-йисуз Уллу-Гъетягърин хуьре дидедиз хьайи зи аял вахтар хайи хуьре акъатна. Гьеле школадиз фидалди 5 йисан яшда аваз чIехи стхадин 12 ва виридалайни гъвечIи стхадин 3 югъ тирла, чи буба – дах вахтсуздаказ регьметдиз фена.
ЦицIибар галай верч хьиз чун вири аял хьана ва хажалатди рикI атIанвай дидедал аруш хьана жедай. Са тIимил вахт арадай фена, бубадин тIвар эцигнавай гъвечIи стха са гьал кIвачел акьалтайла, регьметлу кьуьзуь Нурмет бубадин хиве кIвалин дердияр ва 6 аялдиз тербия гун гьатнавай. Диде «Мукьтадиран» колхоздин маларин фермадиз дояркавилиз кIвалахал фенвай.
1970-йисара «Мукьтадиран» тIвар алай колхоздикай «Айдинбековский» совхоз арадал атана. ЧIехи стхадилай гатIунна чна дидедиз гьам кIвале, гьамни фермадал, калер ацаз, алафар гуз, михьивилер ийиз куьмекар гудай. Нурмет бубади, вичин суруз нур къурай, я Аллагь, чаз диде кIвалахдилай хуькведалди дидевал, гьар са аялдиз кьетIен фикир гудай.
Тарсар кIелайдалай кьулухъ, чIехи гадаярни галаз, фу чрадай куьлер гъиз тамуз фидай. Зегьмет чIугвадай касдал баркаллани къведа лугьудай чаз дидеди, гьакI хьунни авуна.
Малдарвиле яргъал йисара, намуслувилелди зегьмет чIугунай ам са шумуд сеферда райондин, хуьруьн Советдин депутатвиле, 1980-йисуз ДАССР-дин Верховный Советрин депутатвиле хкяна. Югъ-йиф талгьана зегьмет чIугунай адаз Зегьметдин Баркалладин 2 ва 3-дережайрин орденар, са шумуд медаль, Дагъустандин Верховный Советдин Президиумдин, КПСС-дин райкомдин патай грамотаяр ганва.
1982-йисуз пенсиядиз фенатIани, чи дидедин къайгъуяр къалин тир, адан хиве эвленмишдай сад хьиз агакьнавай аялар авай. Четин зегьмет авай кIвалах ятIани, ада 1993-йисалди дояркавал авунай.
Вад аялди институтар ва сада техникум акьалтIарна. Гьар садакай чешнелу хизандин кьилер хьана.
2011-йисуз чаз дидевални-бубавал авур, вичин чан эцигна чун хвейи, чи играми, ширин диде регьметдиз фена.
Ваз Аллагьди регьметар гурай, женнет кьисмет хьурай, чан диде!
Дуьньядал жез хьайитIа, вири вун хьтин дидеяр хьурай!
Вири дидейриз алукьзавай дидейрин югъ мубаракрай, квез чандин сагъвал, веледрикай рикIиз архайинвал хьурай.
С. Баламетова
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
