Пешедин устадрихъ галаз гуьруьш

Им неинки пешекар художникрин, гьакIни рангаралди шикилар чIугунин устIарвал квай гьар са касдин югъ я. Адет яз, и юкъуз шегьерра ва районра художникрин выставкаяр акъудзава, художникрихъ галаз гуьруьшар тешкилзава.

Международный художникрин йикъан сергьятра аваз 7-декабрдиз Кьасумхуьруьн телевиденидин (КТВ-дин) студиядин тавханада райондин Информагентстводин руководитель Гуллер Камилова, телевиденидин кьилин редактор Эльвира Небиева, корреспондент Мизамудин Магьмудов ва и цIарарин автор районда ва адалай къеце машгьур тир са шумуд художникдихъ галаз гуьруьшмиш хьана. Кьилди къачуртIа, гуьруьшдиз художникар тир Низами Агьмедханов, Жами Жумалиев, Шабан Жумалиев, Айвар Камилов атанвай. Абуру журналистриз чпин уьмуьрдин ва яратмишунрин рекьерикай итижлу ихтилатар авуна. Тверь шегьердин художественный училище акьалтIарай, Москвада художникрин центральный кIвале, Испанияда, Италияда вичин шикилрин выставкайриз тамашачийри еке къимет гайи ери-бине КIварчагърин хуьряй тир ва Москва шегьерда яшамиш жезвай художник Шабан Жумалиева авур ихтилатар иллаки таъсир ийидайбур хьана.

Гуьруьшдин эхирдай райондин Информагентстводин руководитель Гуллер Камиловади республикада ва федеральный дережада районлдин тIвар хкажзавай художникар тир Шабан Жумалиеваз, Низами Агьмедхановаз, Жами Жумалиеваз ва Айвар Камиловаз Международный художникрин югъ райондин Кьил Саид Темирханован, Инфформагентстводин работникрин ва райондин агьалийрин тIварунихъай мубаракна, абурухъ мягькем сагъламвал, яратмишунрин рекье мадни еке агалкьунар хьана кIанзавайди лагьана.