Эфендиева Рена Зияудиновна
И йикъара чав Москвадай чIулав хабар агакьна, 84 йисан яшда аваз музыкадин алемда жанлу гел тур чи баркаллу руш, бажарагълу пианистка, 1968-йисалай ДАССР-дин лайихлу артистка, 1976-йисалай ДАССР-дин халкьдин артистка, лап хъсан инсан Эфендиева Рена Зияудиновна рагьметдиз фена.
Рена Эфендиева 1938-йисан 28-октябрдиз Махачкъалада интернациональный хизанда дидедиз хьана. Адан буба лезгийрин машгьур писатель Зияудин Эфендиев Сулейман-Стальский райондин Цмуррин хуьряй тир. Адан диде казачка тир.
Дяведин йисара Рена Эфендиева Цмуррин хуьре яшамиш хьана.
Аялзамаз музыкальный школада, гуьгъуьнлай училищеда кIелай Р. Эфендиева бажарагълу композитор Готфрид Гьасанован ученица тир.
Гнесинрин тIварунихъ галай институт акьалтIарайдалай гуьгъуьниз 1962-йисалай Рена Эфендиевади махсус фортепианадай муаллимвиле кIвалахна.
1970-йисара Р. Эфендиевади Дагъустандин филармонидин регьбер яз кIвалахна. Гуьгъуьнлай вичи акьалтIарай училищедиз регьбервал гана.
Рена Зияудиновна Москвада, Санкт-Петербургда кьиле фейи Дагъустандин литературадинни искусстводин йикъарин иштиракчи тир.
Ам сольный концертар гваз уьлкведин са шумуд шегьерда халкьдин вилик экъечIна.
1984-йисалай Рена Эфендиева Москвада яшамиш жезвай. Ам А. Г. Шниткедин тIварунихъ галай МГИМ-дин доцент тир.
Эфендиева Рена Зияудиновна чи арадай акъатунин хажалатдин пар паюналди, чна адан хизандиз ва вири мукьва-кьилийриз башсагълугъвал гузва.
Адан экуь къамат гьамишалугъ яз чи рикIера амукьда.
Райондин культурадин отдел
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
