Манийрин устад Селимат

ГьикI лагьайтIа, гьар нивай хьайитIани манияр лугьуз, шиирар теснифиз, кьуьлер ийиз, далдам-чIагъан ягъиз жедач. РикIел Польшадин литературадин машгьур векилрикай сад тир Альфред Конара лагьай гафар къвезва: «Бажарагъ валай гьич садани чир тавунвай тайин са кIвалах ийиз алакьун я».

Макъалада ихтилат гьа и бажарагъ себеб яз Лезгистанда машгьур манидар, Сулейман-Стальский районда вичиз гьахълудаказ «Халкьдин манийрин устад» лугьузвай Селимат Гьажиевадикай физвайди фикирда кьуна, заз лезги халкьдин арадай акъатай бажарагълу манидаррин тIварарни кьаз кIанзава: Рачаб Сафаров, Эслихан Агъаева, Жамал Шагьмарданов… Абурун арада завай Курхуьрелай тир рагьметлу Бесханум Гьажиевадин – Селиматан дидедин тIварни дамахдивди кьаз жеда. Культработник, райондин Культурадин дворецдин художественный самодеятельностдин иштиракчи яз Б. Гьажиевади 50 йисалай виниз халкьдиз къуллугъна. «Дагъустан Республикадин культурадин лайихлу работник» гьуьрметдин тIварцIиз лайихлу хьайи Бесханум Гьажиевадиз КIварчагърин хуьряй тир культработник ва шаир Салигь Селимова шиирни багъишнай:

Вуна билбил ийида бенд,

Ягъиз гьар аваз, Бесханум.

ЛагьайтIани «Сегьнедин гъед»,

Лайих тIвар я ваз, Бесханум.

Катран мукай кард къарагъда, лугьузва халкьдин мисалда. Рагьметлу Бесханум Гьажиевадин руш Селиматакайни къе сегьнедин гъед хьанва.

- Закай культработник, манидар хьуниз зи дидеди авур таъсир екеди я, — лугьузва Селимат Гьажиевади. – Районда ва адалай къеце тухузвай культурадин, шадвилерин мярекатра хьиз, дидедин сивел кIвалени гьамиша мани жедай. Мадни, заз дидедиз халкьдин патай авай кIанивал, гьуьрметни аквазвай. Гьавиляй за дидедин кар, рехъ давамарун кьетIна.

С. Гьажиевади и келимаяр лагьайла, рикIел шаир Рамазан Каитова кхьей цIарар къвезва: «Вичин дидед, бубад къадир авайди, лугьуда хьи, я девлетар галайди».

Эхь, Селиматахъ къе «девлетар» ава, абур адан ширин сесиникай, лугьузвай манийрикай, халкьдин патай авай кIанивиликай ибарат я.

Манияр лугьуз С. Гьажиевади Курхуьруьн юкьван школада кIелдай йисара башламишна, школьникрин арада районда тухвай са шумуд конкурсдани кIвенкIвечи чкаяр кьуна.

Ваъ, Селиматаз махсус чирвилер къачун патал я институтда, я училищеда кIелдай мумкинвал хьанач. Анра гудай чирвилер жегьил рушаз бажарагъди эвезна. Алакьунар, манияр лугьунин ширин сес, дидедин «тарсар» ва бажарагъ себеб яз 1996-йисуз Селимат Гьажиева райондин Культурадин дворецдиз манияр лугьудайди (солистка) яз кIвалахал кьабулна. Гьа йикъалай инихъ ада районда ва Кьиблепатан Дагъустанда тухузвай гзаф фестивалра, конкурсра ва культурадинни шадвилин маса мярекатра иштиракзава, анра алакьунар къалурзава.

- Зи рикI вилик йисара Рагьимат Гьажиевади, Эслихан Агъаевади, Дурия Рагьимовади ва машгьур маса манидарри тамамариз хьайи, гьакIни халкьдин куьгьне манийрал гзаф ала, — лугьузва Селимат Гьажиевади. – Гьавиляй зи репертуарда гьа манийри кьилин чка кьазва. Тамашачийри, иллаки жегьилри вилик йисарин манияр хушвилелди кьабулзава, ида зак шадвални кутазва. ГьикI лагьайтIа, куьгьне манияр – им чи халкьдин тарих я.

Гьа са вахтунда, бажарагълу манидар С. Гьажиева райондин Культурадин дворецда кардик квай ва республикада машгьур фольклордин «Куьре» ансамблдин художественный руководителни я. 12 касдикай ибарат тир и коллективдин концертрин программайрани халкьдин манийри кьетIен чка кьазва. Имни, гьелбетда, Селимат Гьажиевадин кIвалахдин, алахъунрин, бажарагъдин нетижа я.

- За виликдай хейлин йисара Бесханум бахдихъ галаз санал гзаф кьадар фестивалра, мярекатра иштиракайди я, гила и кар Селимат вахахъ галаз давамарзава, — лугьузва машгьур манидар ва культработник Ярагьмед Ярагьмедова. – Завай инанмишвилелди лугьуз жеда хьи, дидедиз хьиз, Селимат Гьажиевадизни шукур хьайи Халикьди бажарагъдин патай пай ганва. Гьакъикъатдани, Селимат вах чи дамах я.

Манидар Селимат Гьажиева Мегьарамдхуьруьн районда тухвай «Самурдин зул» фестивалдин, Дербентда тухвай «Дурия Рагьимовадин конкурсдин» лауреат, ДР-дин культурадин министерстводин, «Шарвили» эпосдин суварин тешкиллувилин комитетдин, Сулейман-Стальский райондин администрациядин ва культурадин отделдин патай ганвай гзаф кьадар грамотайрин, дипломрин сагьиб я.

Вахъ кIвалахда ва искусстводин рекье мадни еке агалкьунар хьурай, манийрин устад Селимат!

Текст кхьейди ва шикил ягъайди Хазран Кьасумов я