Вирида сад хьиз рапар ягъа

Коронавирусдин нубатдин лепе хкаж жезвай арада абур акатунин хаталувал иллаки чIехиди я.

Сулейман-Стальский райондани ковид-инфекция чукIунин гьалар къалабулух кутадайбур я. Начагъбурун кьадар къвердавай артух жезва.

Алай вахтунда кIвалера духтуррин гуьзчивилик 16 кас ква. Абур духтуррихъ галаз алакъада ава, пешекарри гайи меслятрал амал ийиз, чеб сагъар хъийизва.

Лугьузвайвал «Омикрон» штаммдин цIийи жуьре регьятдиз алатзава. ЯтIани чун мукъаят хьана кIанда. Чи хизанар, мукьва-кьилияр коронавирусдик, гьакIни гриппдик начагъ хьунин вилик пад кьун патал чна духтуррин ихьтин меслятрал амал авуна кIанда:

- эгер квез куь гьал хъсан аквазвачтIа, масабурухъ галаз алакъа хуьмир;

- начагъ хьанватIа, кIвале акъваз;

- жува-жув сагъар хъувунал машгъул жемир, духтурдиз кIвализ эвер це;

- мукьвал-мукьвал кIвале михьи гьава тура;

- сагъламвал хуьн патал гьар 6 вацралай коронавирусдиз акси раб ягъа;

- мукьвал-мукьвал гъилер чуьхуьх;

- гзаф инсанар кIватI жезвай чкайра маска алукIа.

Чи райондин больницада экспресс тестар ийизва. Ядай бес кьадар рапарни чкадал алазва. Авай гьалариз дуьз къимет гана, инсанри вакцинадин рапар ягъун чарасуз я. Райондин больницадин пешекарар чкадал фена рапар ягъизни гьазур я.

Асият Мирзалиева