Лезги руш – «сифте чубарук»
Лезги халкьдин векилар тир гзаф гадайрикайни рушарикай азаддаказ къуршахар кьунай, самбодай, дзюдодай, каратэдай, армрестлингдай ва спортдин маса жуьрейрай неинки Дагъустан Республикада ва Россиядин Федерацияда, гьакIни дуьньяда машгьур спортсменар хьана.
Малум жезвайвал, яваш-яваш абуру спортдин маса, чпиз «мукьва» тушир жуьреярни муьтIуьгъарзава. Конькийрай авахьунин (конькобежный) спортдай лезги руш Камила Ханбалаевади Россиядин чемпионвилин тIвар къачуни и кардин патахъай ачухдиз шагьидвал ийизва.
Камиладин диде-бубадин ери-бине Сулейман-Стальский райондай я. Руш дидедиз Махачкъала шегьерда хьана. Камила эхиримжи йисара Москва шегьерда яшамиш жезва, школада кIелзава ва конькийрай авахьунин спортдал машгъул жезва. Уьлкведа жаван спортсменрин арада тухвай хейлин турнирра лезги руша гъалибвилер къачуна. Камила международный турниррин гъалибчи ва призерни я.
Алатай йисан декабрдин вацра К. Ханбалаевади чIехи кьве турнирда иштиракна ва вичихъ спортдин и жуьредай еке гележег авайди къалурна. ИкI, Коломна шегьердин конькобежный центрада «Золотые коньки» тIвар алаз Вирироссиядин акъажунар кьиле фена. Ана Россиядин 32 региондай тир 13-15-йисан яшара авай 180-далай виниз конькийрай авахьунин спортсменри иштиракна. Акъажунрин программадик 500, 1000, 1500, 3000 метрдиз конькийрал алаз чукурун, I0 гьалкъада масстарт ва многоборье (500 м. + 1000 м. + 1500 м. + 3000 м.) квай.
Рушарин арада многоборьедин нетижайрай 1-чка Камила Ханбалаевади кьуна, Россиядин чемпионвилин тIвар къачуна.
Гуьгъуьнлай Камила Ханбалаевади, Россиядин хкянавай командадик кваз, Россиядинни Китайдин хъуьтIуьн жегьилрин къугъунра иштиракна. Россиядин командадик, Камиладилай гъейри, Лилита Гарибян ва Анастасия Семенова квай.
Къизилдин 8, гимишдин 8 ва буьруьнждин 9 медаль къачуналди Россиядин командадикай къугъунрин чемпион хьана.
- Гуьгъуьнин сезондиз зун яшарин «Старший возраст» категориядал элячIзава, — лагьана Камила Ханбалаевади Россиядинни Китайдин хъуьтIуьн къугъунра гъалиб хьайидалай гуьгъуьниз журналистриз гайи интервьюда. – Ана командадин чукурун жеда – им зун патал цIийивал я. Тренировкаяр тухуда, алахъда, жуван рикI алай спортдин жуьредай мадни чIехи агалкьунар къазанмишиз чалишмиш жеда.
Чаз соцсетрай жагъай делилралди, Камила Ханбалаева конькийрал авахьунин спортдай ихьтин чIехи дережа къачунвай неинки сад лагьай лезги, гьакIни сад лагьай дагъустанви – «Сифте чубарук» я.
Вахъ уьмуьрда ва спортда мадни еке агалкьунар ва гъалибвилер хьурай, Камила!
Хазран Кьасумов
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
