Алим Селимов – дуьньядин чемпион

Абурун жергеда вичин ери-бине Кьасумхуьрелай тир, алай вахтунда Беларуссияда яшамиш жезвай грекринни римлуйрин къайдада кьуршахар кьунай кьве сеферда дуьньядин чемпион Алим Селимова гьахълудаказ кьетIен чка кьазва.

Алим Селимов 1983-йисан 26-январдиз Кьасумхуьрел Максиман хизанда кьуд лагьай велед яз дидедиз хьана. Адан вад йис хьайила дах регьметдиз фена. Веледриз, лугьудайвал, бубавални дидевал школада муаллимвиле кIвалахзавай дидеди авуна.

КIуьд йисан яшда авайла Алим азаддиз кьуршахар кьунал машгъул хьана. И кардиз адан сифте тренер хьайи Юрий Къурбанова ва вични спортдин и жуьредал машгъул жезвай, гуьгъуьнлай тренер хьайи чIехи стха Муслима еке таъсир авуна.

9-класс куьтягьай Алим Селимов Дагъустандин промышленностдинни экономикадин колледждик экечIна. Инани Алима спортдал рикIивай машгъул хьун давамна. Адакай жаванрин арада Дагъустандин ва республикадин са шумуд турнирдин чемпион хьана, ада Россиядин кIвенкIвечивал патал кьиле фейи акъажунра иштиракна.

Гьелбетда, чIехи дережада тухузвай турнирра иштиракун ва анра вичин алакьунар къалурун патал къаюмвалдайбур тахьайвиляй А. Селимовал четинвилерни ацалтна. И кар кьатIай са дустуни Алимаз Беларуссиядин Гомельский областдин Мозырь шегьерда Къурушрин хуьряй тир вичин халу Малик Энжиевич Эскендарова грекринни римлуйрин жуьредай кьуршахар кьунай тренервиле кIвалахзавайди лагьана ва адан патав фин меслят къалурна.

Гьа икI алакьунар авай жегьил Беларуссиядиз акъатна, 1999-йисалай ам Малик Эскендарован гъилик олимпиададин резерв патал кьуршахар кьунай жегьил пагьливанар гьазурдай Гомелдин махсус школада кьуршахар кьунал машгъул хьана. Гуьгъуьнлай Алим «спортдин тренер» пешедай олимпиададин резерв патал пагьливанар гьазурдай Гомелдин гьукуматдин училищедикни экечIна.

А. Селимова жегьилрин арада тухвай хейлин турнирра ва Беларуссиядин кIвенкIвечивал патал 2002-йисуз тухвай акъажунра гъалибвилер къачуна.

Беларуссиядин хкянавай командадик кваз Алим Селимова гуьгъуьнлай грекринни римлуйрин жуьреда кьуршахар кьунай Польшадин кIвенкIвечивал патал кьиле тухвай ачух акъажунра иштиракна. Аниз Россиядай, Украинадай, Чехиядай, Великобританиядай 200-далай виниз пагьливанар атанвай. Алим Селимован заланвилин категориядай (84 кг.) турнирда чпин къуватар 28 спортсменди ахтармишна. Алима турнирда 1-чка кьуна ва Польшадин чемпионвилин тIвар къачуна.

2005-йисуз Беларуссиядин хкянавай командадик кваз Алим Селимова Венгрияда кьиле фейи дуьньядин чемпионатда иштиракна. Финалда Россиядай тир Европадин ва Олимпиададин чемпион Алексей Мишинан винел гъалибвал къачуналди, Алимакай дуьньядин чемпион хьана.

Грекринни римлуйрин милли командадин спортсмен-инструктор яз, 2006-йисуз А. Селимоваз «Зегьметда къазанмишнавай агалкьунрай» медаль гана.

2009-йисуз Алим Селимова Ф. Скоринадин тIварунихъ галай Гомелдин гьукуматдин университетдин физкультурадин факультет куьтягьна. Армиядин жергейра къуллугъ авурдалай гуьгъуьниз чи машгьур ватанэгьлиди Гродненский госуниверситетдин социологиядин факультетни заочнидаказ кIелна акьалтIарна.

2011-йисуз Алим Селимова Стамбул шегьердин «Синан Эрдем Даум» спортдин аренада грекринни римлуйрин жуьреда кьуршахар кьунай кьиле фейи дуьньядин чемпионатда иштиракна ва 84 килограммдин заланвилин категориядай кьвед лагьай сеферда дуьньядин чемпионвилин тIвар къачуна.

Алим Селимов спортдин и жуьредай дуьньядин чемпионвилин тIвар къачунвай сад лагьай дагъустанви я.

Гьайиф хьи, сагъламвилин месэла себеб яз Алимавай Китайдин Пекин шегьерда кьиле фейи Олимпиадада иштиракиз хьанач.

Алим Селимов са шумудра Беларуссиядин чемпион, военныйрин арада кьиле фейи дуьньядин чемпионатдин призерни я.

Спортдин рекье къазанмишай зурба агалкьунриз килигна Алим Селимоваз 2012-йисуз Беларуссиядин спортдин лайихлу мастервилин тIвар гана.

2015-2018-йисара А. Селимова Минскда футболдин «Динамо» клубдин генеральный директорвиле кIвалахна, 2018-йисалай ада «Динамо-Брест» клубдин футболдин академиядин директорвиле кIвалахзава. Гьа са вахтунда ада грекринни римлуйрин жуьреда кьуршахар кьунай Беларуссиядин хкянавай командада тренервални ийизва.

Алим Селимова, хизанни галаз Гомель шегьерда яшамиш жезватIани, Дагъустандихъ, хайиди тир Сулейман-Стальский райондихъ галазни сих алакъа хуьзва. Ам «Сулейман-Стальский райондин гьуьрметлу агьали» тIварцIин сагьибни я.

Хайи югъ мубарак авуналди, Алим Селимовахъ спортдин рекье, кIвалахда мадни еке агалкьунар, мягькем сагъламвал хьана кIанзава чаз.

Хазран Кьасумов

Шикилда: Алим Селимов