Асланан нубатдин гъалибвал
Кьасумхуьрелай тир машгьур спортсменрин тухумдин векил Аслан Къурбанова универсальный женгерай (и жуьредай ам 4 сеферда дуьньядин чемпион я), самбодай, дзюдодай, юкьва кутIундай чIулар кьуна къуршахар кьунай къазанмишай агалкьунрикай чи газетда са шумудра хабар ганай.
И йикъара А. Къурбанова 18 йисалай виниз яшар хьанвай итимрин ва дишегьлийрин арада самбодай Кеферпатан Кавказдин федеральный округдин кIвенкIвечивал патал Грозный шегьерда кьиле фейи акъажунра иштиракна. 88 килограммдин заланвал авай спортсменрин арада Аслана сифтедай пуд спортсмендин, финалдани дзюдодай Россиядин чемпион А. Шангенован винел гъалибвал къачуна, 1-чка кьуна. Аслан медалдиз, пулдин приздиз ва самбодай Вирироссиядин Федерациядин Президент С. В. Елисееван къул алай дипломдиз лайихлу хьана.
Чна нубатдин агалкьун Асланаз ва адан дах, Россиядин лайихлу тренер Юрий Къурбановаз мубаракзава.
Гила Аслан Къурбанова 2023-йисан февралдин вацра Пермь шегьерда самбодай кьиле фидай Россиядин чемпионатда иштиракда. Гьанани Асланахъ агалкьунар хьун чи мурад я.
Хазран Кьасумов
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
