Аслан Къурбанов – Россиядин чемпион!
И йикъара неинки Сулейман-Стальский райондин агьалийрик, гьакIни вири лезгийрик, дагъустанвийрик шадвал ва дамах кутадай хабар агакьна: Кьасумхуьрелай тир Аслан Къурбановакай самбодай Россиядин чемпион хьана! Эгер чун ягъалмиш туштIа, Аслан Къурбанов Россиядин чемпионвилин тIварцIиз лайихлу хьанвай сад лагьай дагъустанви я. Ваз аферин, Аслан!
«… ЧIехи гъалибвал гъвечIи агалкьунрикай ибарат я», — кхьенва Забит Ризванова вичин са эсерда. Аслан Къурбановни и чIехи дережадиз «гъвечIи-гъвечIи агалкьунралди» хкаж хьана. Лап жегьил вахтарилай за Асланан дах, азаддаказ кьуршахар кьунай, дзюдодай СССР-дин спортдин мастер, РФ-дин лайихлу тренер Юрий Къурбановахъ галаз дуствилин алакъаяр хуьзва. Гьавиляй Аслан ва адан гъвечIи стха, Россиядин Яракьлу Къуватра къуллугъзавай офицер-самбодай РФ-дин спортдин мастер Ибрагьим заз школада кIелзавай йисарилай чида.
Асланакай рахайтIа, школада кIелдай йисара ада вичин дахдин гъилик самбодай ва дзюдодай вердишвилер къачуна, вичин устадвал хкажна. Школьникрин арада ада са шумудра райондин, республикадин ва Вирироссиядин турнирра кIвенкIвечи чкаяр кьуна.
Гуьгъуьнлай, студент тир йисара, Аслана неинки самбодай ва дзюдодай, гьакIни универсальный женгерай ва маса жуьрейрайни (мисал яз, юкьва кутIуннавай чIулар кьуна юкьварар кьунай) чIехи дережадин турнирра ва чемпионатра агалкьунар къазанмишна. Мисал яз, Аслан Къурбанов универсальный женгерай 4 сеферда дуьньядин чемпион, самбодай ва дзюдодай Россиядин Кубокдин призер я.
Алай йисан мартдин вацра Пермь шегьерда самбодай кьиле фейи Россиядин чемпионатда Аслан Къурбанова 88 килограммдин заланвиляй 1-чка кьуна ва Россиядин чемпионвилин тIвар къачуна. Финалда Аслана са шумудра Россиядин, 2 сеферда дуьньядин чемпион Сергей Кирюхинал гъалибвал къачуна.
Чна чи кьегьал хва Аслан Къурбановаз, адан дах Юрий Ибрагьимовичаз ва машгьур спортсменар тир Къурбановрин тухумдиз чIехи агалкьун мубаракзава.
Хазран Кьасумов
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
