КIварчагъвийри духтурриз чухсагъул лугьузва

Адан аксина Сулейман-Стальский райондани еке кIвалах тухузва. ИкI, райондин руководстводин тапшуругъдалди райондин центральный больницадин медработникри хуьрериз физ, чкайрал агьалийриз рапар (вакцина) ягъунин кIвалах тешкилнава.

Алатай гьафтеда ЦРБ-дин духтуррин са десте, кьиле участковый духтур-терапевт Наргиз Гьажимирзоева аваз, КIварчагъ дередин хуьрериз фена, ана коронавирусдиз акси рапар ягъунин кIвалах кьиле тухвана.

- Хаталу азардиз акси рапар ягъунин терефдарар агьалияр чеб я, — лагьана чаз КIварчагърин хуьруьн поселенидин администрациядин кьилин заместитель Рашид Эседулаева. – Гуьгьуьллувилелди къе рапар ягъиз неинки КIварчагъай, гьакIни Экендилай, НуьцIуьгъай ва Зизикай тир 30-далай виниз агьалияр атанва. Райондин центральный больницадиз фена рапар янавай инсанрин кьадарни тIимил туш.

Райондин центральный больницадин участковый духтур, терапевт Наргиз Гьажимирзоевади чаз лагьайвал, хуьрерин агьалийриз регьятвилер хьун патал медработникар чкайрал физва, рапар язава. Эхиримжи йикъара рапар язавай инсанрин кьадар артух хьанва. Агьалийри аннамишзавайвал, рапар ягъуналди, чавай коронавирусдин вилик пад кьаз жеда.

Чна КIварчагъ дереда рапар язавай са шумуд касдихъ галазни ихтилатар авуна. Хуьруьн юкьван школадин муаллим Насир Къурбанова чаз лагьайвал, муаллимар ва школадин техработникар инсанрихъ галаз сих алакъада жезва, гьавиляй абуру сифте нубатда рапар ягъун лазим я. Школадин вири муаллимри рапар янава.

- Зи яшар 65 йисалай алатнава, — лагьана чаз НуьцIуьгърин хуьряй тир зегьметдин ветеран Загьидин Тажибова. – За Кьасумхуьрел фена кьве сеферда рапар яна, са жуьрединни кефи чIур хьун, ифинар акьалтун за гьисснач. Идалди заз лугьуз кIанзава хьи, халкьари лугьузвай бязи гафар бине авачирбур я. Низ вичин ва багърийрин сагъламвал мягькем хьана кIанзаватIа, коронавирусдин вилик пад кьаз кIанзаватIа, духтуррин патав фена, рапар ягъа. Им вахтунин истемишун я.

Чна ихтилатар авур КIварчагъ дередин агьалийри чкадал атунай ва коронавирусдин аксина рапар ягъунай райондин центральный больницадин медработникриз ва и кIвалах тешкилунай райондин руководстводиз чухсагъул лугьузва.

Текст кхьейди ва шикил ягъайди Хазран Кьасумов я