Духтур-эндокринолог, илимрин кандидат

Ихьтинбурукай яз чавай Кьасумхуьрелай тир Алиметоврин баркаллу тухумдин тIварни кьаз жеда. Вилик йисара и тухумдай чIехи дережайрин руководителар, жуьреба-жуьре пешейрин иесияр, алимар акъатна, абур гилани ава. Мадни шадвал кутадай кар ам я хьи, Алиметоврин тухумдин баркаллу рехъ и тухумдин векилар тир жегьил несилдини уьзуьагъдаказ давамарзава. Абурукай садакай чна газет кIелзавайбуруз куьрелди суьгьбет ийида.

Карина Альбертовна Алиметова – кьилин категориядин духтур-эндокринолог, медицинадин илимрин кандидат, «2017-йисан виридалайни хъсан духтур» (ДР-да) тIварцIин сагьиб…

Гьелбетда, Карина Альбертовна и чIехи дережайриз садлагьана акъатнач. Къастунал кIевивили, дерин чирвилери, духтурвилин пешедал рикI хьуни ам и дережадиз акъудна.

- Духтурар Алиметоврин тухумуда са шумуд кас ава, зи дахни духтур я, — лугьузва Карина Альбертовнади. – Пеше хкягъуниз заз и кардини еке таъсир авуна.

К. Алиметовади 2001-йисуз Дагъустандин государстводин медицинадин академиядин «Лечебное дело» факультет лап хъсан къиметар аваз акьалтIарна.

2001-йисалай 2003-йисалди Карина Альбертовна ДГМА-дин эндокринологиядин кафедрадин клинический ординатурада умуми эндокринологиядин пешедай гьазурвал акун кьиле фена. Гьа 2003-йисуз ада Даггосмедакадемияда духтур-эндокринологвилин сертификат къачуна.

2003-йисуз К. А. Алиметова Дагъустан Республикадин диагностический центрадин эндокринологиядин отделенидиз духтур-эндокринологвилин кIвалахал кьабулна.

Лагьана кIанда, К. Алиметова гьеле ДГМА-да кIелдай йисарилай илимдин кIвалахдал машгъул жезвай. Академиядин 65 йис тамам хьуниз талукьарна Махачкъалада тухвай 55-студентрин ва жегьил алимрин илимрин конференциядин докладрин тезисрин кIватIалда адан «Некоторые морфологические изменения в надпочечниках спинальных животных» ва «Цитомегаловирусная инфекция у беременных г. Махачкалы» илимдин макъалаяр гьатна.

2007-йисуз Карина Альбертовнадикай IV-Вирироссиядин тиреидологический конгрессдин иштиракчи хьана.

2008-йисуз Москвада Россиядин дипломдилай гуьгъуьнин образованидин медицинадин академияда эндокринный хирургиядин терефни галаз эндокринологиядай пешекарвилин дережа хкаждай курсара хьана.

2008-йисалай К. Алиметовадикай ДГМА-дин заочный аспирант, эндокринологиядин кафедрадин ассистент хьана. Илимдин кIвалахдин тема: «Клинико-эпидемиологическая характеристика Эндемического зоба и йододефицитных состояний в Республике Дагестан».

2009-йисуз К. Алиметовади Кисловодск шегьерда «Актуальные проблемы диабетологии» конференцияда иштиракна, махсус диплом къачуна. Тезисрин кIватIалдиз «Мониторинг йододефицита в Республике Дагестан на фоне его профилактики» илимдин макъала акъатна.

2010-йисуз Дагъустан Республикадин здравоохраненидин министерстводин аттестационный комиссиядин къарардалди Карина Альбертовнадиз «Эндокринология» пешедай сад лагьай пешекарвилин категория гана.

2011-йисуз ам Москвада Россиядин медицинадин илимрин академиядин Эндокринологиядин Илимрин Центрадин бинедаллаз нейроэндокринологиядай кIелунин курсара хьана.

Карина Альбертовнади 2012-йисуз Дагъустандиз хтана, медицинадин рекьяй вич машгъул жезвай хилерай са бязи месэлаяр тайин авун (ренальная экскреция йода, частоты зоба) патал дагъдин, дагъдин ценерив гвай ва дуьзендин районрай материал кIватIна. Мадни, ада Махачкъалада, гьакIни вичи гуьзчивалзавай ийизвай районра аялрик зоб кIватIа ахтармишна.

2013-йисуз К. Алиметова «Российская медицинская академия последипломного образования Минздрава России» ДПО-дин ГБОУ-дин эндокринологиядай сертификационный циклдин курсарани хьана.

Гуьгъуьнлай Карина Альбертовнади Сеченовский медицинадин университетда ва НИИ-да диетологиядай чирвилерин дережани хкаж хъувуна.

КьетIен алакьунрин ва бажарагъдин сагьиб тир чи баркаллу руш К. А. Алиметовади 2017-йисуз «Клинико-эпидемиологическая характеристика и профилактика эндемического зоба и йододефицитных состояний в Республике Дагестан» темадай агалкьунралди диссертация хвена, медицинадин илимрин кандидатвилин тIвар къачуна.

Виридуьньядин коронавирусдин азар чкIанвай вахтунда К. Алиметовадин къайгъуяр мадни артух хьана. Ада цIудралди инсанар и хаталу азардикай хвена, и рекье ада галатун тийижиз зегьмет чIугвазва. Идай чи баркаллу районэгьли ДР-дин диагностический Центрадин кьилин духтур З. А. Каплановадин къул алай Гьуьрметдин грамотадиз лайихлу хьана.

Хайи райондин, Лезгистандин тIвар хкажзавай вахъ кIвалахда ва илимдин рекье мадни еке агалкьунар хьурай, гьуьрметлу Карина Альбертовна!

Асият Мирзалиева,

Хазран Кьасумов