«Шарвили» эпосдин мярекатар – районда

Гьайиф хьи, вири дуьнья къарсатмишай коронавирус себеб яз, 2020-йисуз и сувар кьиле тухуз хьанач. Коронавирус чукIунин вилик пад кьунин мураддалди, Роспотребнадзорди эцигнавай эпидемиядиз акси сергьятвилер фикирда кьуна, республикада «Шарвили» эпосдин сувариз гьазурвилер акунин ва суварин мярекатар гьар са муниципалитетда кьилди-кьилди тухунин къарар кьабулна.

Къейд ийиз кIан-зава хьи, кьиле райондин Кьил Нариман Абдулмуталибов аваз райондин агьалийри Ахцегьа тухузвай «Шарвилидин» мярекатра гьар йисуз активвилелди иштиракзавайди я. Районда кардик квай тешкиллувилин комитетдин заседанидал икьрар хьайивал, районда «Шарвили» эпосдиз талукьарнавай асул мярекатар 25-июндиз Кьасумхуьрел, И. Гь. Тагьирован тIварунихъ галай Культурадин дворецдин вилик квай майдандал кьиле тухуда.

Идалайни гъейри, «Шарвили» эпосдиз талукьарна районда тухудай культурадинни илимдин са жерге мярекатрин ва серенжемрин план туькIуьрнава. Адан бинедаллаз, кьилди къачуртIа, аялри чIугунвай шикилрин ва художник Низами Агьмедханован кIвалахрин выставкаяр, флэшмобар, «Шарвили» эпосдин логотипар, значокар паюнин акцияр, Шарвилидикай ватанпересвилин ва авторвилин шиирар кIелунай конкурсапр тухуда. Мадни, чкадин телевиденидин каналрай вилик йисара «Шарвили» эпосдиз талукьарна Ахцегьа хьайи мярекатрикай передачаяр ва маса видеоматериалар къалур хъийида, «Куьредин хабарар» газетдин чинра эпосдиз талукь материалар, гьакIни «Шарвилидиз» талукьарна культурадин ва образованидин идарайра тухвай мярекатрикай макъалаяр гуда.

Вири материалар гьакIни Кьасумхуьруьн телевиденидин YouTube каналда, райондин официальный сайтда ва социальный сетрин чинра гуда.

Районда лезгийрин игитвилин эпосдин Йикъаз талукьарна музыкадинни шииратдин флэшмобни тухузва. Онлайн-мярекатда школайра кIелзавайбуру, аялрин бахчайра ва алава образованидин учрежденийра тербия къачузвайбуру, гьакIни муаллимри, аялрин бахчайра тербия гузвайбуру, культурадин идарайрин работникри иштиракзава. Абуру чпин нумраяр соцсетра (YouTube, Facebook, Instagram) эцигзава.

Флэшмобдин тешкилатчияр райондин образованидин ва культурадин управленияр я.

И йикъара райондин образованидин управленида лезгийрин игитвилин «Шарвили» эпосдиз талукьарна школьникрин арада тухвай конкурсдин нетижаярни кьуна. РУО-дин информациядинни методический центради тухвай муниципальный конкурсда райондин умуми образованидин школайрин 7-классра кIелзавайбуру иштиракна. Абуру шикилар жуьреба-жуьре рангар ва къайдаяр ишлемишуналди альбомдин кIалубдин чарчел чIугунвай.

Конкурсдин кIвалахриз «Центр» творчества «Цмур» АНО-дин директор Лейла Насрулаевадикай, «ИМЦ» МКУ-дин методист Назират Мегьамедовадикай, ЦIийи поселокдин, Курхуьруьн 1-нумрадин ва Кьасумхуьруьн 2-нумрадин юкьван школайрин ИЗО-дин муаллимар тир Эдик Мирзехановакай, Амахан Жаватовакай, Пчехан Азизовадикай ибарат тир жюриди къимет гана.

Конкурсда 1-чкадиз Эминхуьруьн юкьван школадин ученик Ибрагьим Селимов лайихлу хьана.

Кьвед лагьай чкаяр Хадижа Наврузбековади (Р. Халикьован тIварунихъ галай Кьулан СтIалрин юкьван школа) ва Милана Мурсаловади (Кьасумхуьруьн 2-нумрадин юкьван школа), 3-чкаяр Аминат Идрисовади (Курхуьруьн 1-нумрадин юкьван школа), Фатима Къазимегьамедовади (Агъа-СтIалрин юкьван школа) ва Нарима Мифталиевади (Уллу-Гъетягърин юкьван школа) кьуна.

Конкурсда тафаватлу хьайибуруз райондин образованидин управленидин Гьуьрметдин грамотаяр гана.

Хазран Кьасумов