Багъларихъ гележег ава

Эхиримжи йисара Дагъустанда багъманчивал вилик тухуниз екедаказ фикир гузва. И кар себеб яз тек са интенсивный багъларин майданар 4000 гектардив агакьзава. Инвесторрин гьевеслу и кардин тереф Россиядин хуьруьн майишатдин рекьяй гьукуматди хуьзва.

Шадвал кутадай кар ам я хьи, къенин юкъуз республикада багъманчивал гьам дуьзендин, гьамни дагъдин мулкарал вилик физва. Анра емишар гьасилдай къулай шартIар ава, еридин суьрсетдин патахъай муьштерийрин игьтияжни артух я. И кар чаз Сулейман-Стальский районда «Паласа» ООО-да инвестицийрин проект уьмуьрдиз кечирмишуни тестикьарзава. Ина 260 гектардилай виниз майданра ичерин суперинтенсивный багълар кутунва. Мадни, карханадихъ 20 гектар хутарин ва 30 гектар кIерецин багъларни ава. Виридалайни умудлувал кутазвай кар я ам хьи, карханада 600 гектарда шуьмягъин багълар кутунва. Им Россияда шуьмягъин виридалайни чIехи багъ я.

Мукьвал йикъара Дагъустан Республикадин хуьруьн майишатдин ва суьрсетдин министрдин заместитель Шарип Шарипов ва Сулейман-Стальский райондин Кьил Нариман Абдулмуталибов проект уьмуьрдиз кечирмишзавай гьалдихъ галаз таниш хьана. И проектдай йисан эхирдалди мад 400 гектарда шуьмягъин багълар кутун лазим я, ида шуьмягъин багъларин майданар 1000 гектардив агакьардай мумкинвал гуда. Багълариз яд стIал-стIал къайдада гудай къурулуш кардик ква. Ида дигидай яд кьенятдивди ишлемишдай мумкинвал гузва.

Карханада санал 50 агъзур тонн емишар хуьдай чкани (плодохранилище) эцигун фикирдик ква. Ам кура-кура (поэтапно) эцигда.

Инвестицийрин проект уьмуьрдиз кечирмишзавай гьаларихъ галаз чкадал фена таниш хьайидалай гуьгъуьниз ДР-дин хуьруьн майишатдин ва суьрсетдин министрдин заместитель Шарип Шарипова хуьруьн майишатдин пешекаррихъ галаз совещание тухвана, анал проект уьмуьрдиз кечирмишунин ва жуьреба-жуьре рекьерай проектдин тереф хуьнин месэлайриз килигна. Шарип Шарипова къейд авурвал, «Паласа» ООО-да уьмуьрдиз кечирмишзавай проект Дагъустан Республикада виридалайни чIехиди я. И проектдиз ДР-дин Минсельхозпродди вири рекьерай куьмек гузва, и кар гележегдани давамда.

ДР-дин хуьруьн майишатдин ва суьрсетдин министрдин заместитель Шарип Шарипова лагьайвал, мукьвал тир вахтара республикада «Абрикос Дагестана» лишандик кваз фестиваль, адан сергьятра аваз «Дагъдин ва дагъдин ценерив гвай багъманчивал: вилик финин мумкинвилер ва гележег» илимдинни тежрибадин конференция кьиле тухуда, анал районда уьмуьрдиз кечирмишзавай проектдин менфятлувал раижда.

Х. Гьажибалаев