Чи йикъарин игитар

Сулейман-Стальский райондин Кьил Нариман Абдулмуталибова администрацияда НуьцIуьгърин ва Сийидрин хуьрера яшайишдин кIвалера цIай кьур дуьшуьшра викIегьвал ва дирибашвал къалурай инсанар кьабулна, абурув пишкешар вакана. ИкI, цIай хкадарунин карда кьетIен гьалара къалурай жуьрэтлувиляй Чухсагъулдин чарариз Саратов шегьердин «Нордекс» ООО-дин къуллугъэгьли нуьцIуьгъви Расим Тагьирбеков (ам ЦIийи йисан суваррин йикъара хуьруьз отпускадиз хтанвайди тир), Сийидрин хуьряй тир Сефербег Давудов, Ариф Мисриханов ва Максим Мусаханов лайихлу хьана.

- Лап хаталу дуьшуьшра куьне дирибашвал, дагъвийриз хас тир ватанпересвал къалурна, цIай хкадарунин карда пожарно-спасательный къуллугъдин работникриз еке куьмек гана, — чпиз гьахълудаказ чи йикъарин игитар лугьуз жедай инсанрихъ элкъвена лагьана Нариман Абдулмуталибова. – Чанни къурбанд ийиз гьазур тир куь гьерекатар себеб яз кьетIен гьалара мусибатдин вакъиайрикай хуьз алакьна. Ихьтин куьмекдай чун квез буржлу я. Чухсагъул лугьуналди, чаз квехъ мягькем сагъламвал, хизандин бахтлувал, берекат хьана кIанзава.

Гуьруьшдал халис дагъвийрин къилих къалурай Расим Тагьирбековаз, Сефербег Давудоваз, Ариф Мисрихановаз ва Максим Мусахановаз чухсагъулдин ва разивилин келимаяр райадминистрациядин ГО-дин ва ЧС-дин отделдин начальник Тарлан Султанагьмедова, Кьасумхуьруьн поселенидин администрациядин кьил Далгат Бабаева, общественный хатасузвал хуьнин рекьяй райадминистрациядин Кьилин заместитель Абуталиб Фатулаева ва маса юлдашрини лагьана.

Райондин Кьил Нариман Абдулмуталибова, гьакIни Тарлан Султанагьмедова, Абуталиб Фатулаева ва цIай хкадарунин карда иштиракай хуьрерин агьалийри рикIел хкайвал, НуьцIуьгърин хуьре Хидир ва Назимат Гьуьсеналиеврин кIвале цIай 3-январдин нянрихъай акьуна. Идан себебни газдин пичинин турба хьана. КIвале аяларни авай, абур къугъунрал машгъул тир. Са кIвалелай цIай вири дараматдиз чкIана. Хабар гана тади гьалда атай МЧС-дин пешекарар цIай хкадарунив эгечIна. И карда абуруз хуьруьнвийрини екедаказ куьмекар гана. И карда хуьруьз отпускадиз хтанвай Расим Тагьирбекова еке жуьрэтлувал къалурна. Шехьзавай аялрин ван хьайи Расим, вичин уьмуьр хаталувилик кутуна, кьилел кьежирнавай рух вегьена, цIай кьуна кузвай кIвализ гьахьна, 6 аял анай къецел акъудна.

- Ихьтин дуьшуьшда заз жувакай фикирдай мажал авачир, цIун хурай аялар акъудна кIанзавай, — лагьана гуьруьшдал вичиз гайи суалдиз жаваб яз Расим Тагьирбекова.

Мадни, гуьруьшдал лагьайвал, Сийидрин хуьре Шамсудин Алисултанован кIвалера цIай 8-январдиз акьуна. Виликамаз кьунвай гьисабралди, кIвалера цIай газдин пич дуьз тахьун хьун я. И кIвалера хъуьтIуьн вахтунда касни яшамиш жезвачир. Иесияр кIвализ суваррин йикъара хтанвай. Абуру пичина цIай амаз туна. ЦIун ялавар къуншийриз акуна, абуру кIвалин иесийриз ва пожарно-спасательный къуллугъриз хабар гана. Махсус пуд машиндин, инсанрин куьмекдалди цIай хкадарна. Кьилди къачуртIа, хуьруьнвияр тир Максим Мусаханова, Сефербег Давудова ва Ариф Мисриханова иллаки дирибашвал къалурна. Абурун, гьакIни куьмекдиз атай маса хуьруьнвийрин чалишмишвал ва гьерекат себеб яз эменнидин са пай къутармишиз алакьна.

Райондин администрацияда кьиле фейи гуьруьшдал рахай жавабдар ксари цIай кьуна кузвай кIваляй ругуд аял цIун ялаврайни ажалдин къармахрай акъудай Расим Тагьирбеков гьукуматдин награда гун патал къалурунин теклиф гъана. Райондин Кьил Нариман Абдулмуталибова и теклифдин тереф хвена ва райондин администрациядин талукь къуллугъриз герек документар гьазурунин ва абур Дагъустан Республикадин Гьукуматдиз агакьарунин тапшуругъ гана.

Райондин Кьил Нариман Абдулмуталибова алава хъувурвал, санлай лезги халкьдиз, дагъвийриз хьиз, вичиз гьахълудаказ арифдаррин, камалэгьлийрин, кьегьал рухвайринни баркаллу рушарин макан лугьузвай СтIал Сулейманан райондин агьалийриз рикIин захавал, мердвал, кIеве авайдаз куьмекдин гъил яргъи авун ва ихьтин маса хесетар хас я. НуьцIуьгъа ва Сийида бедбахтвилин дуьшуьшар хьайила и кар мад сеферда тестикь хьана. Лугьудайвал, игитар яз хазвайди туш, игитар жезвайди я.

Са рахунни алачиз, Расим Тагьирбеков, Сефербег Давудов, Ариф Мисриханов ва Максим Мусаханов хьтин кьегьал, жумарт рухвайрал райондин агьалийри дамахзава. Халис дагъвийрин къилих авай абуруз аферин ва баркалла!

Х.Кьасумов