Меню
6+

Сайт «Кюре»

18.01.2022 09:49 Вторник
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Оперативный штабдин заседанидал

Алай йисан 10-январдиз Сулейман-Стальский райондин Кьил Нариман Абдулмуталибован регьбервилик кваз районда кардик квай коронавирусдиз акси Оперативный штабдин нубатдин (2022-йисуз сад лагьайди тир) заседание кьиле фена. Анал райондин территориядал коронавирусдин азардиз акси рапар ягъунин кIвалах тешкилнавай ва азардихъ галаз алакъалу яз районда арадал атанвай гьаларикай райондин ЦРБ-дин кьилин духтур Жафер Къурбанисмаилова малумат гана. Ада къейд авурвал, районда коронавирусдин азардик ва стIалжемдик начагъбурун кьадар тIимил хьун давам жезватIани, ковид азардихъ галаз алакъалу гьалар къизгъинбур яз ама. ЦIийи йисан суварихъ галаз алакъалу яз кIвалах тийидай йикъара начагъ 14 кас тайин хьана. Алай вахтунда больницада стIалжемдик начагъ 7 кас ава, абурукай анжах са кас ковид-азардик начагъ я. Гьа са вахтунда, 205 кас кIвалера медработникрин гуьзчивилик ква (абурукай 55 касдик COVID азар квайди тестикь хьанва), 16 кас стIалжемдик начагъ я.

ЦРБ-дин кьилин духтурди алава хъувурвал, эхиримжи вахтара коронавирусдин азардик ва стIалжемдик жегьиларни начагъ жезва, юкьван гьисабдалди начагъбурун яшар 35 йисаз барабар я.

Райондин территориядал гьалар секинвал кутадайбур я лугьуз жедач, азардин цIийи штамм-омикрон – пайда хьунни гуьзлемишзава. Илимрин ахтармишунри къалурзавайвал, коронавирусдин и жуьре лап хаталуди, фад-фад чкIидайди я, начагъ хьайибур сагъар хъувунни четин акъваззава.

Райондин больница рапаралди, герек маса шейэралди таъмин я. Инфекцийрин отделенида ачух койкаярни ава.

Коронавирусдин азардин аксина рапар ягъуникай рахадайла, Жафер Къурбанисмаилова къейд авурвал, икьван чIавалди районда 10890 касди рапар янава, ида рапар ягъун лазим тир инсанрин 38 процент тешкилзава. Гьа са вахтунда, райондилай къеце рапар язавай инсанрин кьадарни гзаф я. Санлай къачурла, ДР-дин руководстводин тапшуругъдихъ галаз кьадайвал, чIехи яшарин 60 процент инсанри азардин аксина рапар ягъун лазим я. Ихьтин нетижа къазамишун патал районда гьар юкъуз 700-800 касди рапар ягъун чарасуз я.

Общественный хатасузвал хуьнин рекьяй райадминистрациядин Кьилин заместитель Абуталиб Фатулаева заседанидал республикадин Оперативный штабдин протоколрин тапшуругъар ва цIийи къарарар кьилиз акъудзавай гьалдикай малумат гана. Ада гьакIни рапар ягъунин жигьетдай ял ядай йикъара агьалийрин активвал артух хьайиди къейдна, идай организацийриз, къуллугъриз ва агьалийриз чухсагъул малумарна. Гужлудаказ кIвалах тешкилунин нетижада 900-далай виниз инсанри рапар яна. Гьайиф хьи, абурукай саки 800 кас къурулушда учетда эцигиз хьанач, идакай республикадин талукь къуллугъар кхьинин къайдада хабардар ийида.

Коронавирусдиз акси Оперативный штабдин заседанидин нетижаяр райондин Кьил Нариман Абдулмуталибова кьуна. Ада къейд авурвал, эпидемиядин гьаларихъ, гьакIни коронавирус чукIунин вилик пад кьунихъ элкъуьрнавай ДР-дин руководстводин протоколрин тапшуругъар ва цIийи къарарар кьилиз акъудун патал райондин Оперативный штабдин членри, чкадин самоуправленидин органри, талукь вири къуллугъри тади серенжемар кьабулун лазим я.

- Гзаф чкайра коронавирусдихъ галаз алакъалу гьалар къурху кутадайбур я, — къейдна Нариман Абдулмуталибова. – Чи райондани бедбахтвилин вакъиаяр хьана. Азарди гьар гьи патахъай хьайитIани гьар са хизандиз вичикай хабар гана. Хаталу азарди сагъар хъувур инсанризни таъсир ийизва. Коронавирусдин азардин вилик пад кьун ва жув, гьакIни жуван багърийрин, къуни-къуншийрин сагъламвал хуьн патал чахъ авайди са рехъ я: азардин аксина рапар ягъун.

Оперативный штабдин заседанидал эпидемиядин гьаларихъ, коронавирусдин азардин вилик пад кьунихъ ва рапар ягъунихъ галаз алакъалу тир маса месэлайризни килигна.

Х.Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

10