Ветеранрин Советдин правленида

Сулейман-Стальский райондин администрациядин патав тешкилнавай дяведин, зегьметдин, Яракьлу къуватринни къайдаяр хуьдай органрин ветеранрин Советди (преседатель Ислеман Ризаев) акьалтзавай несилдиз ватанпересвилин тербия гунин жигьетдай гьар йисуз виле аквадай мярекатар тухузва. Вичиз гузвай тапшуругъар адаян тагана, вахтунда, нетижаяр арадал гъуналди кьилиз акъудзава.

И кардин себебрикай сад Советдин кьиле акъвазнавай кас Афгъанистандин женгера лигим хьанвай, тербиядин къадир авай, вичизни а женгерин орденарни медалар авай кас хьун я. Ада пландин бинедаллаз кIвалахзава, са пунктни хкуд тавуна абур галай-галайвал кьилиз акъудиз чалишмиш жезва. Адан кIвалахдилай администрацияди разивал ийизва. Алай йисуз ветеранрин Совет тешкилайдалай инихъ 40 йис жезвайди фикирда кьуналди, мадни Афгъанистандай Советрин армия хтай чIавалай инихъ 33 йис жезвайдини рикIел алаз, тухудай серенжемриз талукь яз план-график туькIуьрнава.

Алай йисан пландин бинедаллаз и йикъара Советдин сифтегьан заседание хьана. Ана Афгъанистанда кьиле фейи дяведин иштиракчияр тир Загьиров Жаруллагьа, Набиев Мидада, Мусаев Эседулагьа, Манатов Казбека, Савзиханов Шамсудина, Шайдаев Эмира ва масабуру иштиракна.

Ризаев Ислемана Советдин правленидал алай месэлайрикай, рикIе авай крарикай, мукьвара тухудай мярекатрикайни куьрелди суьгьбетна.

ЦIийи Мамрач хуьряй тир Манатов Казбека Герейханован хуьруьн юкьвал алай парк мадни гуьрчегарунин, аваданламишунин ва и паркуниз лайихлу тIвар гунин месэла къарагъарна. Заседанидин иштиракчийри им хъсан фикир тирди, и парк шегьредай физвай виридаз аквазвайди къейдна. Манатов Казбека вичиз Магьмутан хуьре дяведин ветеранрин тIварцIихъ, абур рикIел хуьнин лишан яз, памятник эцигиз кIанзавайдини лагьана. Адан фикиррин тереф правленидин вири членри хвена.

Анал гьакI Ленинграддин блокададиз талукь яз райондин ветеранрикай ктаб акъудиз эгечIнавайди, аниз герек шикилар, рикIел хкунар кIватIзавайдакайни ихтилатар хьана.

Эхирдай Ризаев Ислемана правленидин заседанидин иштиракчийрин фикир «Афгъанистан наша память и боль» тIвар алаз Афгъанистандин женгера иштиракай районэгьлийриз, абурун командирризни талукь яз ктаб акъудзавайдакайни малумат гана. Гьукуматди афгъанвийриз гун герек тир кIвалерин месэлани гьялун патал талукь дережада гъиле авайдини рикIел гъана.

Райсудин Набиев, зегьметдин ветеран